ءبىزدىڭ مەكتەپ 2025 جىلى 19 اقپان كۇنى جاڭادان اشىلدى. جوبالىق قۋاتى 1 500 وقۋشىعا ارنالعان مەكتەبىمىزدى قاۋىپسىز مەكەمە دەپ ايتۋعا بولادى. ويتكەنى مۇندا وقۋشى قاۋىپسىزدىگىن قامتاماسىز ەتۋ قولعا الىنعان. اتاپ ايتقاندا, بارلىق «كەلەشەك مەكتەپتەرىندە», سونىڭ ىشىندە ءبىزدىڭ مەكتەپتە دە العاشقى مەديتسينالىق كومەك كورسەتەتىن پۋنكت, مەكتەپكە كىرىپ-شىعۋداعى باقىلاۋ, بەينەباقىلاۋ جۇيەسى, توتەنشە جاعدايلار كەزىندەگى قاۋىپسىزدىك, قوسالقى شىعۋ جولدارى, ءورت قاۋىپسىزدىگى جۇيەسى, زورلىق-زومبىلىقتىڭ, بۋللينگتىڭ الدىن الۋ باعىتىنداعى شارالار, سىنىپتاردىڭ, مەكتەپ اسحاناسىنىڭ, سپورت زالدىڭ سانيتارلىق جاعدايى, ەرەكشە ءبىلىم بەرۋ قاجەتتىلىگى بار وقۋشىلار ءۇشىن ارنايى جاعداي, پسيحولوگ ماماندارمەن جۇمىس جۇيەسى ىسكە قوسىلعان. سونىمەن قاتار وقۋشىلاردىڭ مەكتەپكە كەلىپ كەتۋ جولدارى دا باستى نازاردا.
ماسەلەن, ءبىزدىڭ مەكتەپتە وقۋشى مەن پەرسونال قاۋىپسىزدىگى ءۇشىن 180 بەينەباقىلاۋ كامەراسى ورناتىلعان. ولاردىڭ 116-سى مەكتەپ ىشىندە بولسا, 64-ءى مەكتەپ اۋلاسىندا ورنالاسقان. SOS تۇيمەلەرىنىڭ سانى – تورتەۋ. ال توتەنشە جاعداي كەزىندە قوسالقى 16 ەسىك قولدانىلادى. 12 تۋرنيكەت بار. مەكتەپتە ينتەرنەت جىلدامدىعى – 120 م/بيت سەكۋند, ول ەكى جەلىگە بولىنەدى. مەكتەپ عيماراتىنىڭ توبەسىنە شىعاتىن 2 ەسىك; 5 ليۋك باسپالداق قولدانۋعا دايىن تۇرادى. مەكتەپتە جالپى 66 ءورت سوندىرگىش, 30 گيدرانت ورناتىلعان, ول عيماراتتىڭ ءار قاباتىنا جانە جەرتولەگە رەتىمەن بولىنگەن. بۇعان قوسا مەكتەپتە 3 جەردە بايلانىس تەلەفونى قويىلعان.
«كەلەشەك مەكتەپتەرى» جوباسى اياسىندا سالىنعاندىقتان, مەكتەبىمىزدە بالا قاۋىپسىزدىگىن قامتاماسىز ەتەتىن جەكە سانيتارلىق بولمەلەر, كەڭ كابينەتتەر, جەدەلساتى, پاندۋستار, ارنايى بەلگىلەر, پسيحولوگ, لوگوپەد جانە دەفەكتولوگ كابينەتتەرى تولىق جابدىقتالعان.
مەكتەبىمىزدىڭ تاعى ءبىر ەرەكشەلىگى – كىرۋدى باقىلاۋ جۇيەسى ID كارتا ارقىلى وتەدى. باستاۋىش, ورتا جانە جوعارى بۋىن وقۋشىلارى بولەك-بولەك, وزدەرىنە ارنالعان ەسىكتەن كىرىپ, ءوز وقۋ بلوكتارىنا وتەدى.
ءبىزدىڭ مەكتەپ كۇنى كەشە اشىلسا دا, وقۋشىلارىمىزدى ءتۇرلى جاعدايدان ساقتاندىراتىن ءىس-شارالار كەشەنىن وتكىزىپ ۇلگەردىك. مىسالى «قاۋىپسىزدىك جانە ەلەكتر ەنەرگياسى: ترانسفورماتورلىق كۇركەلەر مەن ەلەكتر قوسالقى ستانتسيالارىنا نەگە جاقىنداۋعا بولمايدى» اتتى سىنىپ ساعاتىندا جەتەكشى ينجەنەر مەيرامگۇل بولاتقىزى وقۋشىلارعا ءتۇسىندىرۋ جۇمىسىن وتكىزدى. «قاۋىپسىز جول» جوباسى اياسىندا ازاماتتىق باستامالار قاۋىمداستىعى SAMGAU مۇشەلەرى جانە شاعان پوليتسيا ءبولىمى قىزمەتكەرلەرى مەكتەپتە باستاۋىش سىنىپ وقۋشىلارىمەن پروفيلاكتيكالىق اكتسيا ۇيىمداستىردى. انالار كۇنىنە جانە رەسپۋبليكالىق رەپرودۋكتيۆتى دەنساۋلىق اپتالىعىنا وراي وقۋشىلار №6 ەمحانانىڭ دارىگەرى جادىرا جاقسىلىققىزىمەن كەزدەستى. بقو توتەنشە جاعدايلار دەپارتامەنتى وكىلدەرىمەن دە تۇراقتى ءىس-شارالار ءوتىپ تۇرادى. بۋللينگتەن قورعاۋ قاۋىپسىزدىك ساباعى, «سالاماتتى ۇرپاقتىڭ – سالاۋاتتى ءومىرى» تاقىرىبىندا وتكەن قاۋىپسىزدىك ساباقتارى بالالارعا پايدالى بولعانى انىق. ال شاعان پوليتسيا ءبولىمى جەرگىلىكتى پوليتسيا قىزمەتى بولىمشەسىنىڭ كامەلەتكە تولماعاندار ىستەرى جونىندەگى ۋچاسكەلىك پوليتسيا ينسپەكتورى, پوليتسيا كاپيتانى ءمولدىر قاديمقىزى قاتىسقان «قاۋىپسىز قوعام», «قۇقىقتىق مادەنيەت جانە ونىڭ ماڭىزى» سەكىلدى كەزدەسۋلەر وقۋشىلارعا زاڭ مەن ءتارتىپتى ءتۇسىندىرىپ, ءوز قۇقىن قورعاۋعا كومەگىن تيگىزدى دەپ ويلايمىن.
شىندىعىندا وقۋشى قاۋىپسىزدىگىن قامتاماسىز ەتۋ – بولاشاق ءۇشىن جاسالعان قادام. قاۋىپسىز ورتادا تاربيەلەنگەن بالا ەركىن ويلايتىن, ءبىلىمدى, جاۋاپكەرشىلىگى جوعارى تۇلعاعا اينالادى. سوندىقتان ءبىلىم بەرۋ ۇيىمدارىندا قاۋىپسىزدىك ماسەلەسى ۇنەمى باستى نازاردا بولۋعا ءتيىس. مەملەكەتىمىز وسى ماسەلەنى ماڭىزدى دەپ تانىپ, العى شەپكە قويىپ وتىر. پرەزيدەنت تاپسىرماسىمەن سالىنعان ۇلتتىق جوبا – «كەلەشەك مەكتەپتەرى» تەك جاڭا عيمارات پەن زاماناۋي جابدىق ەمەس, ەڭ الدىمەن بالانىڭ جان-جاقتى قاۋىپسىزدىگىن قامتاماسىز ەتەتىن بىردەن ءبىر ورتاعا اينالدى.
سامال راحمەتۋللينا,
№52 مەكتەپتىڭ ديرەكتورى
ورال
