جۇبان مولداعاليەۆ اتىنداعى وبلىستىق امبەباپ عىلىمي كىتاپحانا ۇيىمداستىرعان كونفەرەنتسيادا فيلولوگيا, تاريح سالالارىنداعى عالىمدار مەن ءتۇرلى سالا ماماندارى اباي شىعارماشىلىعىنا قاتىستى وزەكتى ماسەلەلەردى تالقىلادى.
باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ, ۇلتتىق قۇرىلتاي مۇشەسى, جازۋشى باۋىرجان عۇبايدۋللين ابايدىڭ رۋحاني مۇراسى جالپى ادامزاتقا ورتاق, ال قازاق بالاسى ءۇشىن ەڭ باستى باعدار دەگەن وي ايتتى.
ماحامبەت ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ دوكتورى ابات قىدىرشاەۆ «اباي مۇراسى – ۇلتتىق قۇندىلىقتار ايناسى» اتتى بايانداماسىندا حاكىمنىڭ قاراسوزدەرىندەگى پالساپالىق مازمۇنعا توقتالسا, وسى وقۋ ورنىنىڭ تاعى ءبىر پروفەسسورى, فيلولوگيا عىلىمدارىنىڭ كانديداتى زەينوللا مۇتيەۆ اباي مەن فاريزا ولەڭدەرىندەگى ساباقتاستىق تۋرالى پىكىر ءوربىتتى. ادەبيەتتانۋشى عالىم, فيلولوگيا عىلىمدارىنىڭ كانديداتى ريتا سۇلتانعاليەۆا دا اباي دانالىعى تۋرالى ءسوز قوزعادى. ماحامبەت ۋنيۆەرسيتەتىندەگى قازاقستان تاريحى كافەدراسىنىڭ مەڭگەرۋشىسى, تاريح عىلىمدارىنىڭ كانديداتى ءالفيا بايبولسىنوۆا اباي مۇراسى – ۇلتتىق يدەولوگيانىڭ نەگىزى ەكەنىن قاداپ ايتتى. ارداگەر ۇستاز, جۇبانتانۋشى ۇزىلدىك ەلەۋبايقىزىنىڭ «ادامزات وركەنيەتىنىڭ تولىق يەسى – اباي تاعىلىمى» اتتى بايانداماسى جاس ۇرپاققا باعىشتالدى. ال وسى ءىس-شارانى ۇيىمداستىرعان جۇبان كىتاپحاناسىنىڭ ديرەكتورى شولپان ورازاەۆا باتىس قازاقستان وبلىسى كىتاپحانالارىندا اباي مۇرالارى قالاي ناسيحاتتالىپ جاتقانىنا توقتالدى.
كونفەرەنتسياداعى ۇزدىك باياندامالار جيناق رەتىندە جارىق كورەدى.
باتىس قازاقستان وبلىسى
