مەملەكەت باسشىسى قاسىم-جومارت توقاەۆتىڭ: «جاس عالىمداردى جان-جاقتى قولداۋ – مەملەكەت ءۇشىن باسىمدىقتىڭ ءبىرى بولۋى قاجەت. ولار – ءبىزدىڭ ينتەللەكتۋالدىق كاپيتالىمىزدىڭ نەگىزى» دەگەن ءسوزى مەملەكەتتىك ساياساتتىڭ وزەگىنە اينالدى. بۇگىنگى تاڭدا جاس عالىمداردى جان-جاقتى قولداۋعا ءمان بەرىلىپ وتىر. عىلىم كوميتەتىندە وتكەن كەزدەسۋدە 2025 جىلعا ارنالعان باسىم باعىتتار ايقىندالدى. اتاپ ايتقاندا, كەڭەستىڭ عىلىم سالاسىنداعى نورماتيۆتىك-قۇقىقتىق بازانى جەتىلدىرۋگە قاتىسۋى, جاستاردىڭ عىلىمي باستامالارىن قولداۋ جانە جاس زەرتتەۋشىلەردى عىلىمي ۇدەرىستەرگە بەلسەندى تارتۋ ماسەلەلەرى تالقىلاندى. كەزدەسۋ بارىسىندا عىلىم كوميتەتىنىڭ توراعاسى جاس عالىمداردىڭ ۇلتتىق عىلىمدى دامىتۋداعى ءرولىن ەرەكشە اتاپ ءوتتى.
– سىزدەر عىلىمنىڭ بولاشاعى عانا ەمەس, ونىڭ بۇگىنىنە سەرپىن بەرۋشى كۇشسىزدەر. سىزدەردىڭ بويلارىڭىزدا قۋات, تىڭ كوزقاراس, باتىل يدەيالار مەن ناتيجەگە ۇمتىلىس سياقتى وزگەرىس ەنگىزۋگە قاجەتتى نارسەنىڭ ءبارى بار. ءبىز سىزدەردىڭ ەڭبەكتەرىڭىزدى جوعارى باعالايمىز جانە ءار قادامدارىڭىزعا قولداۋ كورسەتۋگە دايىنبىز. عىلىمداعى ارماندارىڭىزدى ىسكە اسىرۋ ءۇشىن قاجەتتى جاعدايلاردى جاساۋ – ءبىزدىڭ ورتاق ماقساتىمىز, – دەدى ول.
كەڭەس جاس عالىمداردىڭ باستامالارىن ۇسىناتىن جانە ىلگەرىلەتەتىن ءتيىمدى الاڭعا اينالۋدى كوزدەيدى. سونىمەن قاتار ول عىلىمي جاستار مەن مەملەكەتتىك ينستيتۋتتار اراسىندا كەرى بايلانىستى قامتاماسىز ەتۋدىڭ ماڭىزدى تەتىگى بولماق. عىلىم كوميتەتى اشىق ديالوگ پەن سىندارلى ىنتىماقتاستىققا دايىن ەكەندىگىن ءبىلدىرىپ, جاس عالىمداردى عىلىمي ورتا دامۋىنا قاتىستى شەشىمدەر قابىلداۋ ۇدەرىسىنە بەلسەندى قاتىسۋعا شاقىردى.
ايتا كەتەيىك, 2023 جىلدان باستاپ ەلىمىزدە عىلىمي جوبالاردى قارجىلاندىرۋ كولەمى ەكى ەسە ارتتى. بولىنگەن قاراجاتتىڭ 30 پايىزى تىكەلەي 40 جاسقا دەيىنگى جاس زەرتتەۋشىلەردىڭ جوبالارىن قولداۋعا باعىتتالعان. بۇل ءوز كەزەگىندە جاستاردىڭ عىلىمدا تۇراقتاپ قالۋىنا, يدەيالارىن ىسكە اسىرۋىنا مۇمكىندىك بەرىپ وتىر.
سونداي-اق ءۇش جىلدىق گرانتتار ارقىلى جۇزەگە اسىرىلاتىن ءىرى باستاما «جاس عالىم» باعدارلاماسى ىسكە قوسىلدى. ونىڭ شەڭبەرىندە جاس زەرتتەۋشىلەرگە تۇراقتى تۇردە قارجىلاي قولداۋ كورسەتىلىپ, عىلىمي زەرتتەۋلەرىن جۇيەلى تۇردە جالعاستىرۋعا جاعداي جاسالعان.
عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ جانىنان جاڭا زەرتحانالار دا اشىلىپ جاتىر. وندا شەتەلدە ءبىلىم الىپ, تاجىريبە جيناپ كەلگەن جاس مامانداردى تارتۋعا باسىمدىق بەرىلىپ وتىر.
