كۇز تابيعاتتىڭ سىناعى دەسەك, قىس – شىنايى توزىمدىلىكتى تەكسەرەتىن كەزەڭ. ال وسى سىن ساعاتقا ەلدىڭ ەنەرگەتيكالىق جۇيەسىن تاس-ءتۇيىن ءازىر ەتۋ – «KEGOC» اكتسيونەرلىك قوعامىنىڭ تىكەلەي مىندەتى. كومپانيانىڭ قاراماعىندا بۇگىندە ەلىمىزدىڭ بارلىق اۋماعىن قامتيتىن 28 مىڭ شاقىرىمدى قۇرايتىن ترانزيتتىك تاسىمالداۋ جەلىسى مەن 83 قوسالقى ستانساسى بار.
مۇنىڭ ءبارىنىڭ شاشاۋىن شىعارماي ۇستاپ تۇرۋ ءۇشىن كومپانيا ناۋقاندىق جوندەۋ جۇمىستارىن جىل سايىن جۇرگىزەدى. ول ءساۋىر ايىندا باستالىپ, قازان ايىنا دەيىنگى ارالىقتى قامتيدى. بۇگىندە كومپانيا جەر-جەردە جوندەۋ جۇمىستارىن ەڭسەرىپ قالدى. كەشەگى كۇنى شالعاي جاتقان ەلدى مەكەندەردەگى جوندەۋ جۇمىستارىنا باق وكىلدەرى كۋا بولدى. ءتىلشى قاۋىمى ات باسىن تىرەگەن مەكەن – اقشاتاۋ كەنتىنىڭ بويىنداعى جەلىلەر. قازىردە مۇندا جوندەۋ جۇمىسى كەستەگە ساي ساپالى ورىندالىپ جاتىر.
كومپانيانىڭ دەرەكتەرىنە جۇگىنسەك, بەكىتىلگەن وندىرىستىك جوسپارعا سايكەس, 2025 جىلى 99 اۋە ەلەكتر جەتكىزۋ جەلىسى مەن 43 قوسالقى ستانسا جابدىعى جوندەۋدەن وتۋگە ءتيىس ەكەن. قازىردە ونىڭ 57-ءسى مەن 14 جابدىعى ساپالى تۇردە جاڭارتىلىپ ۇلگەرگەن.
جۇمىس ەلىمىزدىڭ بارلىق وڭىرىندە قاۋىرت. ويتكەنى ءار كۇن ەرتەڭگى جارىق ءۇشىن زور مانگە يە. ايتالىق, «ورتالىق جەت» فيليالىندا دا مامىردان بەرى قىزۋ ەڭبەك ءجۇرىپ جاتىر. بۇل وڭىردە 12 جەلى مەن 18 جابدىق جوندەلۋگە ءتيىس بولسا, ونىڭ 8 جەلىسى مەن 6 جابدىعى بۇگىندە تولىق جاڭارتىلعان. جوسپار – كەستەگە ساي, قاداعالاۋ – ناقتى. ەرتە كوكتەمدە باستاۋ العان جوندەۋ ازىرگە قارقىنىنان جاڭىلا قويعان جوق.
اقشاتاۋ-قايراقتى ارالىعىنداعى جەلىلەر دە ءجىتى نازاردا. بۇل اۋماققا جاقىن ورنالاسقان بالقاش ايماقتىق ەلەكتر تورابى – ترانزيتتىك 220 كۆ 2188-ج اۋە ەلەكتر جەتكىزۋ جەلىسى. وسى ناۋقان اياسىندا بالقاش وڭىرىندە 220 كۆ قۋاتتى جەلىلەر جوندەۋدەن وتۋدە. بۇل – بالقاش قالاسى مەن اقتوعاي اۋدانىنا تىرەك بوپ تۇرعان ماڭىزدى جەلى. سول سەبەپتى دە جۇمىستىڭ ساپاسىنا ايرىقشا ءمان بەرىلەدى. مۇندا ارنايى بريگادا ۋاقىتپەن ساناسپاي ەڭبەك ەتۋدە.
ء«بىزدىڭ باستى مىندەتىمىز – كۇزگى-قىسقى كەزەڭگە دەيىن بارلىق جابدىقتى ساپالى ءارى ۋاقىتىلى دايىنداۋ. بۇل – تەك تەحنيكالىق تالاپ ەمەس, تۇتاس ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋدەگى ماڭىزدى قادام. جوندەۋ ناۋقانىنىڭ ءاربىر كەزەڭى ناقتى باقىلاۋدا, ءبىز بەكىتىلگەن مەرزىمنەن اۋىتقىماي جۇمىس ىستەپ كەلەمىز. قازىرگى ۋاقىتتا بالقاش اەت-ءتىڭ ترانزيتتىك 220 كۆ 2188-ج اۋە ەلەكتر جەتكىزۋ جەلىسىندە جوندەۋ جۇمىسى جۇرگىزىلىپ جاتىر. بۇل جەلى اقتوعاي اۋدانى مەن بالقاش قالاسىن جارىقپەن قامتاماسىز ەتۋدە شەشۋشى ءرول اتقارادى. سوندىقتان ءاربىر ۋچاسكەدەگى ساپالى جۇمىس – بالقاش ءوڭىرىنىڭ ۇزدىكسىز ەلەكترمەن جابدىقتالۋىنىڭ كەپىلى», — دەيدى «بالقاش» قوسالقى ستانساسىنىڭ ەلەكتر جەلىلەرىن جوندەۋ جونىندەگى 4-رازريادتى ەلەكترمونتەرى ءادىلجان يساباەۆ.
بريگادا مۇشەلەرى جەلىلەردى جان-جاقتى تەكسەرۋدە. قاجەت بولعان جاعدايدا ونىڭ جابدىقتارى اۋىستىرىلىپ, كەم-كەتىكتەرى بۇتىندەلەدى. ءار كۇن, ءار ءسات – جاۋاپتى.
– ءبىز اۋە ەلەكتر جەلىلەرىنىڭ بويىنداعى ءار تىرەكتى تولىققاندى تەكسەرىستەن وتكىزۋدەمىز. اقاۋ انىقتالسا, بىردەن قوسالقى بولشەكتەردى الماستىرىپ, جاڭارتامىز. ءار تىرەكتى جوندەۋگە جوبامەن 40 مينۋت ارالىعىندا ۋاقىت جۇمسايمىز. ءبىزدىڭ بريگادادا توعىز مامان بار. بەس ەلەكترمونتەر, ءبىر شەبەر جانە كولىك جۇرگىزۋشىلەرى. ءبىز بەسەۋ بولعاندىقتان, ءار تىرەك سايىن ءوزارا الماسىپ, كەزەكپەن جۇمىس ىستەيمىز. ءساتىن سالسا, جوندەۋ جۇمىستارىن بەكىتىلگەن كەستەگە ساي ءتامامدايمىز, – دەدى ەلەكترمونتەرى ۆيكتور سپيرين.
«KEGOC» اق-نىڭ بۇل ناۋقاندى جوسپارلى جانە جۇيەلى جۇرگىزۋى – ەلىمىزدىڭ سەنىمدى ءارى تۇراقتى ەنەرگەتيكامەن قامتاماسىز ەتۋگە سەپتەسەدى. قۋات – كوزگە كورىنبەيتىن كۇش. بىراق ونىڭ استارىندا كۇن سايىن سالقار دالادا, تىرەك باسىندا, ترانسفورماتور جانىندا تاۋەكەلگە بەل بايلاپ ەڭبەك ەتكەن جۇزدەگەن ينجەنەر مەن ەلەكترومونتەردىڭ تىنىمسىز ەڭبەگى جاتىر. بۇل ارادا سان ەمەس, ساپا نەگىزگى مانگە يە. سەبەبى ءاربىر اۋە جەلىسى – ەلدىڭ ستراتەگيالىق تىرەگى دەسەك, ارتىق بولماس.
قىزعالداق اسقارقىزى
