«مەن الماتىدا تۋىپ-ءوستىم. قازىر 24 جاستامىن. 19 جاسىمنان باستاپ ماتەماتيكا پانىنەن ساباق بەرىپ كەلەمىن. وتباسىم قاراپايىم: انام – لوگوپەد, اكەم – ينجەنەر. انام مەنىڭ پەداگوگيكالىق قابىلەتىمدى العاشقىلاردىڭ ءبىرى بولىپ بايقاعان. باسىندا باعالارىم جوعارى بولعان جوق, كوبىنە ءۇش الاتىنمىن. بىراق 8-سىنىپتان كەيىن فيزيكا-ماتەماتيكا مەكتەبىنە اۋىسىپ, جاقسى مۇعالىمنىڭ ارقاسىندا پانگە قىزىعۋشىلىعىم وياندى», دەيدى ول.
جاس ۇستاز ءال-فارابي اتىنداعى قازۇۋ-دا راديوتەحنيكا جانە تەلەكوممۋنيكاتسيالار ماماندىعى بويىنشا ءبىلىم العانىمەن, كەيىن بۇل سالانىڭ وزىنە جات ەكەنىن تۇسىنگەن. وسى كەزدەن باستاپ رەپەتيتور بولىپ, اقىرىندا ۇستازدىققا بەت بۇرعان. «پاندەميا كەزىندە ونلاين فورماتقا العاش كوشكەندەردىڭ ءبىرىمىن. وسى ءسات مەن ءۇشىن ۇلكەن مۇمكىندىككە اينالدى. وقۋشىلار كوپتەپ كەلە باستادى. سارافاندىق جارناما ارقىلى كليەنت كوبەيىپ, ءوز اۋديتوريام قالىپتاستى. كەيىن قازاق ۇلتتىق پەداگوگيكالىق ۋنيۆەرسيتەتىندە ماگيستراتۋرا ءبىتىرىپ, ءوزىم وقىعان №134 ليتسەيگە ۇستاز بولىپ ورنالاستىم», دەيدى پەداگوگ.
ول بۇگىنگى ءبىلىم بەرۋدەگى باستى ماسەلە – ءپاننىڭ شىنايى ومىرمەن بايلانىسىن تۇسىندىرە الماۋ ەكەنىن ايتادى. سوندىقتان ءوزىنىڭ اۆتورلىق ادىستەمەسىندە ەڭ الدىمەن فورمۋلانىڭ ومىردەگى ماڭىزىن كورسەتىپ الۋعا تىرىسادى. «مىسالى, اعاشتىڭ بيىكتىگىن قالاي ەسەپتەيمىز؟ بالالارمەن بىرگە تاۋعا شىعامىز, مەدەۋدەگى كولىكتەردى ساناپ, ەكولوگيالىق اسەرىن سالىستىرامىز. وقۋشىلار وزدەرى قوعامدىق كولىككە كوشۋدىڭ جولدارىن ۇسىنادى. تالداۋ, ەسەپ, قورىتىندى – ءبارى ماتەماتيكا ارقىلى جاسالادى. بالالار ويلانىپ, ورتاعا پىكىر ايتادى. مەن ءۇشىن ەڭ ماڭىزدىسى – ولاردىڭ ساناسىنا وي سالۋ», دەيدى ماتەماتيكا ءپانى مۇعالىمى.
ە.سولونيتسىن – زاماناۋي مۇعالىم. ول «TikTok», «Instagram» جەلىلەرىندە 350 مىڭنان استام وقىرمانى بار بلوگەر. بۇل پلاتفورما وعان ءبىلىم بەرۋ جۇيەسىن تەرەڭىرەك تۇسىنۋگە مۇمكىندىك بەرگەن. «بلوگ جۇرگىزۋ ارقىلى قانداي تاپسىرما بەرۋگە بولادى, نە قىزىقتى, نە قيىن – ءبارىن سارالايمىن. جەكە كۋرستار اشىپ, 6-سىنىپ وقۋشىلارىمەن جۇمىس ىستەي باستادىم. جاڭا جىلدان باستاپ 7–8-سىنىپتارعا دا توپ اشقىم كەلەدى», دەيدى ول.
جاس مۇعالىمنىڭ تاعى ءبىر ۇستانىمى – بالا ۇستازدان قورىقپاۋى كەرەك. ساباق قىزىقتى بولۋى ءۇشىن ءوزى دە جىگەرلى ءارى سەرگەك بولۋعا تىرىسادى. «مەنى كەيدە مەكتەپ كۇزەتشىلەرى «وقۋشى» دەپ شاتاستىرىپ, توقتاتادى. ال سىنىپتا باسىندا ءتارتىپ ورناتۋ قيىن بولدى. قازىر بالالارمەن جاقسى بايلانىس ورنادى. ولار مەنى اعاسىنداي كورەدى. مەنىڭشە, بالا ءۇشىن وقۋ – اۋىر جۇك ەمەس, قىزىقتى ساپار بولۋى كەرەك. قاتال مۇعالىمدەر كوپ وقۋشىنىڭ پانگە دەگەن ىنتاسىن جوعالتادى», دەيدى ول.
سولونيتسىن ەلىمىزدە STEM تۇجىرىمداماسىنىڭ كەڭ تارالۋىن قولدايدى. ول پانارالىق بايلانىستى كۇشەيتۋ كەرەكتىگىن ايتادى. سەبەبى ماتەماتيكا – تەك فورمۋلا ەمەس, ومىرگە قاجەت تۇسىنىك. «جەكەمەنشىك مەكتەپتەردە ماتەماتيكا بيولوگيامەن, ەكولوگيامەن بايلانىستىرىلادى. ال قاراپايىم مەكتەپتەردە بۇل تاجىريبە جوق. قارجى دا, قولداۋ دا از. كوپ مۇعالىمدەر باياعى تاسىلمەن ساباق بەرەدى. ال قازىر زامان وزگەردى. بالانىڭ نازارىن ۇستاي المايتىن ۇستاز – جاڭا ءبىلىم بەرۋ جۇيەسىندە كوپكە بارا المايدى», دەيدى ەۆگەني.
ونىڭ ۇستازدىق ميسسياسى – بالانىڭ لوگيكاسىن وياتىپ, ساناسىنا ءدان ەگۋ. ول بولاشاقتا سول ءدان تامىر جايىپ, ۇلكەن وزگەرىستەرگە ۇلاسادى دەپ سەنەدى. ەلىمىزدەگى ەڭ كرەاتيۆتى ۇستاز – وسىلايشا وقۋشى جۇرەگىنەن ورىن تاۋىپ وتىر.
