فوتو: gov.kz
رەيد بارىسىندا ماماندار بىرنەشە ماڭىزدى ماسەلەگە نازار اۋداردى. اتاپ ايتقاندا ءورت قاۋىپسىزدىگى ەرەجەلەرىنىڭ ساقتالۋى, سانيتارلىق تالاپتاردىڭ ورىندالۋى جانە سالىقتىق ەسەپ بەرۋدىڭ دۇرىستىعىن تەكسەردى.
كاسىپكەرلەرگە ساۋدا ورىندارىندا تازالىقتى ساقتاۋ, ەۆاكۋاتسيالىق شىعۋ جولدارىنىڭ اشىق بولۋىن قامتاماسىز ەتۋ, ونلاين-تكم (تەكسەرۋ-كاسسالىق ماشينا) قولدانۋ جانە جەكە تۇلعالار اراسىنداعى بانكتىك اۋدارىمدار ارقىلى ەسەپ ايىرىسۋدان باس تارتۋ قاجەتتىگى ەسكەرتىلدى. ەسكە سالساق, مۇنداي وپەراتسيالارعا سالىق كودەكسىنىڭ 166-بابىنا سايكەس كاسىپكەرلىك قىزمەتتە تىيىم سالىنعان.
سونىمەن قاتار, رەيد بارىسىندا جەكە دەرەكتەر ماسەلەسى دە قوزعالدى. ساۋدا وكىلدەرىنە بانكتىك كارتالار ارقىلى ەسەپ ايىرىسۋ كەزىندە تۇتىنۋشىلاردىڭ جەكە دەرەكتەرىن بەرۋگە نەمەسە تاراتۋعا جول بەرىلمەيتىنى ايتىلدى.
«ماقساتىمىز – ايىپپۇل سالۋ ەمەس, ەسكەرتۋ. ءبىز كاسىپكەرلەردىڭ ەرەجەلەردى ءبىلىپ, جاۋاپكەرشىلىكتى تۇسىنگەنىن جانە قاتەلىككە جول بەرمەۋىن قالايمىز. مۇنداي رەيدتەر زاڭناماداعى ماڭىزدى جاڭاشىلدىقتاردى سول جەردە ءتۇسىندىرىپ, بۇل بيزنەستىڭ قاۋىپسىزدىگى مەن تابىسىنا تىكەلەي اسەر ەتەتىنىن كورسەتۋگە كومەكتەسەدى. وسىلايشا جۇرتشىلىقتىڭ اقپاراتتاندىرۋ دەڭگەيىن ارتتىرۋ جانە قاۋىپسىزدىكتى قامتاماسىز ەتۋ», دەدى استانا قالالىق ينۆەستيتسيالار جانە كاسىپكەرلىكتى دامىتۋ باسقارما باسشىسىنىڭ ورىنباسارى ماقسات جاناباەۆ.
