پوليتسيا دەپارتامەنتىنىڭ ەكسترەميزمگە قارسى ءىس-قيمىل باسقارماسى مەن سىرىم اۋداندىق پوليتسيا قىزمەتكەرلەرى بىرلەسىپ جۇرگىزگەن جەدەل-ىزدەستىرۋ ءىس-شارالارىنىڭ ناتيجەسىندە سىرىم اۋدانىنىڭ اۋىلدارىنىڭ ءبىرىنىڭ ەكى تۇرعىنى زاڭسىز قارۋ مەن ەسىرتكى زاتتارىن ساقتاعانى ءۇشىن ۇستالعان.
كۇدىكتىلەردىڭ تۇرعىن ۇيلەرىنە جۇرگىزىلگەن ءتىنتۋ بارىسىندا ءبىر كۇدىكتىدەن تىركەلمەگەن اڭشى مىلتىعى, وق-دارىلەر جانە جاسىل ءتۇستى, ۇنتاقتالعان وسىمدىك تەكتەس (ەسىرتكى زاتىنا ۇقساس) 500 گرامنان استام زات, قولدانىلعان 6 شپريتس پەن پلاستيك بوتەلكە (بۇلار ەسىرتكى قولدانۋعا ارنالعان بولۋى مۇمكىن) تابىلسا, ەكىنشى كۇدىكتىنىڭ ۇيىنەن گازەتكە ورالعان وسىمدىك تەكتەس زات, اۋلاسىنان ءۇش پاكەت وسىمدىك تەكتەس زات, وسىمدىك زاتى بار ءۇش شپريتس, ەسىرتكىنى دايىنداۋعا جانە تۇتىنۋعا ارنالعان ارنايى قۇرىلعىلار شىققان.
«اتالعان فاكتى بويىنشا قىلمىستىق ءىس قوزعالدى. بارلىق تاركىلەنگەن زاتتارعا سوت-حيميالىق جانە بالليستيكالىق ساراپتاما تاعايىندالدى. قازىرگى ۋاقىتتا ەسىرتكى زاتتارىنىڭ شىعۋ كوزىن انىقتاۋعا باعىتتالعان تەرگەۋ امالدارى ءجۇرىپ جاتىر» دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
باتىس قازاقستان وبلىسى
