سەمسەرلەسۋدەن الەم چەمپيوناتى 1921 جىلدان بەرى ۇيىمداستىرىلىپ كەلەدى. 1937 جىلى رەسمي جارىس مارتەبەسىنە يە بولدى. بۇل باسەكەلەردە وزگەلەرگە قاراعاندا قارت قۇرلىق وكىلدەرىنىڭ تابىسى تولاعاي. 1921–2023 جىلدار ارالىعىندا وتكەن ءدۇبىرلى دودالاردا جەڭىپ العان جۇلدەلەرىنىڭ سانى جونىنەن العاشقى توعىز ورىن ەۋروپالىقتاردىڭ ەنشىسىندە. ۇزدىك وندىقتى اقش (12+16+18) تۇيىندەسە, 11-ورىندى ۋكراينا (12+12+20) ەنشىلەپ وتىر. الەمدىك دودادا بارلىعى 29 مەملەكەتتىڭ ءانۇرانى شىرقالىپ, 44 ەلدىڭ تۋى كوكتە جەلبىرەدى.
جەكەلەگەن سپورتشىلار جايىندا ايتار بولساق, ەرلەر اراسىندا ەڭ كوپ ولجاعا كەنەلگەن – الادار گەرەۆيچ. حح عاسىردىڭ 30–60 جىلدارى ارالىعىندا اتوي سالعان ماجارستاننىڭ ماقتانىشى الەم چەمپيوناتىندا 19 (14 التىن+2 كۇمىس+3 قولا) جۇلدە ولجالادى. گەرەۆيچپەن يىق تىرەسە ونەر كورسەتكەن يتاليالىق ەدواردو ماندجاروتتي 26 (13+8+5) مەدالدى مويىنىندا جارقىراتتى. كسرو اتىنان قاتىسقان ستانيسلاۆ پوزنياكوۆ (10+5+2), ۆلاديمير نازلىموۆ (10+3+2), الەكساندر رومانكوۆ (10+2+3), ماجارستاندىق پال كوۆاچتىڭ (10+2+0) قورجىندارىندا 10 التىننان بار. ايەلدەر اراسىندا يتاليالىق ماريا ۆالەنتينا ۆەتستساليمەن ەشكىم تەڭەسە المايدى. حح عاسىردىڭ سوڭى مەن ءححى عاسىردىڭ باسىندا باق سىناعان ول جەڭىس تۇعىرىنا 26 (16+6+4) مارتە كوتەرىلدى. ماجارستاننىڭ مىقتىسى يلونا ەلەك 18 (11+5+2) جارىستان ولجالى ورالدى. ول 1933–1956 جىلدارى جاسىنداي جارقىلدادى. جاڭا عاسىر تابالدىرىقتان اتتاعان تۇستا اسقان شەبەرلىگىمەن ءدۇيىم جۇرتتى ءتانتى ەتكەن اپەنين تۇبەگىنىڭ تاعى ءبىر ارۋى ارياننا ەرريگو 22 (10+7+5) دودادا دارالاندى.
الەم چەمپيوناتىندا جەڭىس تۇعىرىنا كوتەرىلگەندەر قاتارىندا ەلىمىزدىڭ دە وكىلى بار. ول – رۋسلان قۇربانوۆ. 31 جاستاعى التايدىڭ تۋماسى 2023 جىلى ميلاندا وتكەن جارىستىڭ سەمسەر جاتتىعۋىندا قولا مەدالعا قول جەتكىزدى. ر.قۇربانوۆ تەك ماجارستاندىق ماتە تاماش كوح پەن يتاليالىق داۆيدە دي ۆەروليدەن قالىپ قويدى. ەكىنشى قولا مەدالدى فرانتسيالىق رومەن كانون يەلەندى. رۋسلاننىڭ ازيا ويىندارىنىڭ ءۇش دۇركىن جۇلدەگەرى, قۇرلىقتىڭ ءتورت دۇركىن چەمپيونى, دۇنيەجۇزىلىك ۋنيۆەرسيادانىڭ ەكى دۇركىن جۇلدەگەرى دەگەن اتاقتارى تاعى بار.
تبيليسيدە, وكىنىشكە قاراي, جەكەلەگەن سايىستا بىردە-ءبىر جەرلەسىمىز جەڭىس تۇعىرىنا كوتەرىلە المادى. ەسەسىنە كوماندالىق جارىستا جولىمىز بولدى. قۇرامىندا رۋسلان قۇربانوۆ, ۆاديم شارلايموۆ, ەلمير ءالىمجانوۆ, كيريلل پروحودوۆ سىندى سايىپقىراندارى بار كوماندامىز جارتىلاي فينالعا دەيىن بارلىق قارسىلاسىن سىپىرا ۇتتى. ولاردىڭ قاتارىندا رەسەي, قىتاي, يتاليا سەكىلدى مىقتى ۇجىمدار بولدى. ودان كەيىن جاپونياعا ءبىر عانا ۇپايمەن ەسە جىبەردى. ءۇشىنشى ورىن ءۇشىن تارتىستا فرانتسيانىڭ نوياندارىن 45:31 ەسەبىمەن ايقىن ۇتىپ, قولا مەدالدى ولجالادى.
