مەملەكەتتىك كىرىستەر كوميتەتىنىڭ اۋديت دەپارتامەنتى بەرەشەكپەن جۇمىس باسقارماسىنىڭ باسشىسى قايسار ارىننىڭ تۇسىندىرۋىنشە, كاسىپكەر الدىمەن سالىق ورگانىنا وزىنە قانداي كومپانيا قانشا قارىز ەكەنىن كورسەتە وتىرىپ ءوتىنىش بەرەدى. سونىڭ نەگىزىندە سالىق ورگاندارى دەبيتورعا رەسمي حابارلاما جولدايدى.
«مىسالعا, سىزگە ءبىر كومپانيا 200 مىڭ تەڭگە قارىز دەلىك. ال ءسىزدىڭ سالىق بەرەشەگىڭىز 150 مىڭ تەڭگە بولسا, ءبىز تەك سول 150 مىڭ تەڭگەنى وندىرۋگە حابارلاما جىبەرە الامىز. ودان اسىرۋعا قۇقىعىمىز جوق», دەدى قايسار ارىن.
حابارلاما العان دەبيتور 20 كۇن ىشىندە بەرەشەك سوماسىن ناقتىلاپ, ءوزارا ەسەپ ايىرىسۋ اكتىسىن جاساپ سالىق ورگانىنا ۇسىنۋى ءتيىس. ەگەر بۇل مەرزىمدە ەشقانداي جاۋاپ بولماسا, سالىق ورگانى تەكسەرۋ جۇرگىزۋگە قۇقىلى. قارىز ناقتى انىقتالعان جاعدايدا, دەبيتور كومپانيادان وندىرىلەدى جانە كاسىپكەردىڭ سالىق بەرەشەگى سونىڭ ەسەبىنەن جابىلادى.
2026 جىلدان باستاپ جاڭا سالىق كودەكسىنە ساي, ەگەر دەبيتور ەشقانداي جاۋاپ قايتارماسا, سالىق ورگاندارى وعان ايىپپۇل سالىپ, ەسەپشوتىن بۇعاتتاي الادى.
«بۇل كاسىپكەرلەردىڭ ءوز قارىزىن ءوندىرىپ الۋىنا جاقسى مۇمكىندىك. ويتكەنى وزىنە قارىز كومپانيا بورىشتى تولەمەي جۇرسە, اقشانى ءوندىرىپ الۋ ءۇشىن سوتقا جۇگىنۋىنە تۋرا كەلەدى. ال سوت ۇدەرىسى 2 ايدان ءبىر جىلعا دەيىن سوزىلۋى مۇمكىن. ال مىنا جەردە ناقتى قۇجاتتارمەن دالەلدەنسە, 20 كۇن ىشىندە ءوزىنىڭ سالىق قارىزىن جاۋىپ الۋىنا بولادى», دەپ ءتۇسىندىردى قايسار باقىت ۇلى.
جاڭا سالىق كودەكسى 2026 جىلدىڭ 1 قاڭتارىنان باستاپ كۇشىنە ەنەدى.
