قىرعىزستاندا وتكەن ءداستۇرلى ونەر سالاسىنداعى ءىرى حالىقارالىق فەستيۆالگە 37 ەلدەن جۇزدەن استام ورىنداۋشى جينالدى. بايقاۋدىڭ قازىلار القاسى – الەمنىڭ ءار تۇكپىرىنەن كەلگەن مۋزىكا زەرتتەۋشىلەرى, ەتنوگرافتار مەن ونەر شەبەرلەرى. ولار قاتىسۋشىلاردىڭ ورىنداۋىنداعى شىعارمالاردىڭ تۇپنۇسقالىق ساقتالۋىنا, ءداستۇرلى اسپاپتاردى مەڭگەرۋ شەبەرلىگىنە جانە ۇلتتىق ءداستۇردى جەتكىزۋ دەڭگەيىنە باسا نازار اۋداردى.
قازاقستان اتىنان بۇل دوداعا ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ستۋدەنتى سالتانات قايراتقىزى ەرسۇلتان قاتىستى. سالتانات بۇعان دەيىن «انيماتسيالىق كينو رەجيسسۋراسى» ماماندىعىن تامامداعان, ال قازىر ۋنيۆەرسيتەتتە ء«داستۇرلى ءان» باعىتى بويىنشا 3-كۋرستا وقيدى. بايقاۋ بارىسىندا ول اسان قايعىنىڭ تولعاۋىن, نارتايدىڭ تەرمەسىن جانە ەلمۇرا جاڭابەرگەننىڭ «ارالىم» اتتى شىعارماسىن ورىندادى. سالتانات وسىلايشا قىل قوبىزدىڭ قوڭىر ۇنىمەن جىر-تەرمە ورىنداپ, قازىلار القاسىن ءتانتى ەتتى. ناتيجەسىندە جەكە ورىنداۋشىلار اراسىندا ءبىرىنشى ورىنعا لايىق دەپ تانىلدى. بۇل جەڭىس – تەك سالتاناتتىڭ عانا ەمەس, كۇللى قازاق ونەرىنىڭ مەرەيىن وسىرگەن ۇلكەن جەتىستىك.
