وسكەمەن. 17 اقپان. «نۇر وتان» پارتياسى تارباعاتاي اۋداندىق فيليالى جانىنداعى «جاس وتان» جاستار قاناتىنىڭ ۇيىمداستىرۋىمەن ۇلى جەڭىستىڭ 70 جىلدىعىنا وراي «ارداگەرلەردى ارداقتايىق» جوباسى شەڭبەرىندە «قولعابىس» اكتسياسى ءوتتى. بۇل تۋرالى egemen.kz ءتىلشىسى حابارلادى.
تارباعاتايلىق جاستار ساتپاەۆ اۋىلدىق وكرۋگىنىڭ كوكتۇبەك ەلدى مەكەنىندە تۇراتىن جالعىزىلىكتى قارت قاجكەن سەيىتوۆتىڭ ءۇيىنىڭ الدى مەن اۋلاسىنىڭ ماڭايىنداعى قارىن كۇرەپ, وتىن-سۋىن تاسىپ, قوراجايىنىڭ توبەسىن بۇتىندەپ بەردى. ال قىزدار قاريانىڭ ءۇيىنىڭ جيناپ, ەدەنىن جۋىپ كومەك كورسەتتى. سونداي-اق س.بورانباەۆا, ج.قايىربەكوۆا سىندى اكىمشىلىك قىزمەتكەرلەرى دە جاستاردىڭ اكتسياسىنا قاتىسىپ, وزدەرى دايارلاعان سىيلىقتارىن ارداگەرگە تابىس ەتتى.
اكتسياعا كوكتۇبەك ورتا مەكتەبىنىڭ «قولقانات» اتتى وقۋشىلار توبى مەن اۋىل جاستارى قاتىستى. اۋىل قارتتارى جاستارعا ريزاشىلىقتارىن ءبىلدىرىپ, اق باتالارىن بەردى.
بۇل يگى باستاما اۋدان كولەمىندە جالعاسىن تاپتى. ياعني تارباعاتايلىق جاستار اۋدانداعى 17 اۋىلدىق وكرۋگ پەن 65 ەلدى-مەكەندە تۇراتىن بارلىق قارت ادامدارعا جاردەم كورسەتۋدە.
«جالپى, اۋدان جاستارى وسىنداي يگى باستامالاردى قولعا الىپ, قارتتارعا سىي-قۇرمەت كورسەتۋدى داستۇرگە اينالدىرىپ كەلەدى. سوعىس ارداگەرلەرىنە, جالعىز باستى انالارعا, تىل جانە ەڭبەك ارداگەرلەرىنە ۇنەمى كومەك كورسەتىپ, قول ۇشىن بەرىپ وتىرامىز. وسىنداي ساۋاپتى دا يگى شارا كوپكە ۇلگى ەكەنى ءسوزسىز», – دەدى پارتيانىڭ اۋدانداعى فيليالىنىڭ «جاس وتان» جاستار قاناتىنىڭ اتقارۋشى حاتشىسى دارحان كارىباەۆ.
دۋمان اناش.
دەرەك: ەgemen.kz.
سۋرەت: «نۇر وتان» پارتياسى شقو فيليالى.
