وسكەمەن. 17 اقپان. وسكەمەن قالاسىنداعى نازارباەۆ زياتكەرلىك مەكتەبىنىڭ وقۋشىلارى حالىقارالىق ينتەرنەت قاۋىپسىزدىگى كۇنىن اتاپ ءوتتى. بۇل تۋرالى egemen.kz ءتىلشىسى حابارلادى.
بۇل كۇنى وقۋشىلار ونلاين-تەحنولوگيانى قولدانۋداعى بىلىمدەرىن جەتىلدىرىپ, الەۋمەتتىك جەلىلەردەگى جاعىمسىز ۇردىستەردەن قورعانۋ ەرەجەلەرىن ۇيرەندى.
ەۋروپالىق كوميسسيانىڭ 2004 جىلى قابىلداعان «Safer Internet Day» باستاماسى جىل وتكەن سايىن وزەكتىلىگىن دالەلدەي تۇسۋدە. بۇل – اسىرەسە, بۇكىلالەمدىك توردى بەلسەندى پايدالانۋشىلار ەسەبىندە مەكتەپ جاسىنداعى بالالار مەن جاستار ءۇشىن ماڭىزدى بولىپ وتىر. بيىل اتالعان اكتسيا «بارلىعىمىز بىرگە وڭ ينتەرنەت جەلىسىن قۇرايىق» دەگەن ۇرانمەن ءوتىپ, الەمنىڭ 110 ەلىن قامتىدى.
نازارباەۆ زياتكەرلىك مەكتەبىنىڭ ءباسپاسوز حاتشىسى روزا قۇمارعوجينانىڭ ايتۋىنشا, بۇل ءىس-شارانىڭ باستاۋشىسى – حالىقارالىق مۇعالىمدەر. ياعني حالىقارالىق ساناتتاعى مۇعالىمدەر ستەندتەردى پايدالانۋ ارقىلى جانە قوسىمشا قۇرالدارمەن جەكە ساندىق قاۋىمداستىق مۇشەلەرىنىڭ ارەكەتتەرى قوعامعا قانداي زيان اكەلەتىنىن ءتۇسىندىردى. وقۋشىلار ۆيرتۋالدى الەمدە كەزدەسكەن دەربەس اككاۋنتتاردى بۇزۋ ارەكەتتەرىمەن, الەۋمەتتىك جەلىنى تەرىس بەت-بەينە قالىپتاستىرۋعا پايدالانىلاتىن جازبالارمەن تانىستى. سونىمەن قاتار, مۇعالىمدەر ينتەرنەتتە جەكە تۇلعا قالىپتاستىرۋدىڭ باسقا دا قىرلارى, ينتەرنەتتەگى جاۋاپكەرشىلىكتى ارتتىرۋ مەن مىنەز-ق ۇلىق داعدىلارى جونىندە ايتا كەلىپ, وقۋشىلاردىڭ دۇنيەتانىمدارىنا اسەر ەتەتىن قۇندى اقپاراتتارمەن ءبولىستى.
دۋمان اناش.
دەرەك: egemen.kz.
سۋرەت: وسكەمەن قالاسىنداعى نازارباەۆ زياتكەرلىك مەكتەبى.
