فوتو: gov.kz
قالا اكىمدىگىنىڭ مالىمەتىنشە, مۇنداي شارا پاتسيەنتتەرمەن بىرگە كەلەتىن ادامداردىڭ مەديتسينالىق پەرسونالعا شابۋىل جاساۋ جاعدايلارىنىڭ جيىلەۋىنە بايلانىستى قابىلدانعان.
پوليتسيا قىزمەتكەرلەرى وقىس وقيعالار ءجيى بولاتىن قابىلداۋ بولمەلەرىندە كەزەكشىلىك ەتەدى.
ازاماتتاردىڭ قۇقىققا قايشى كەلەتىن ارەكەتتەرى تۋىنداعان جاعدايدا پوليتسيا قىزمەتكەرلەرى ولاردىڭ الدىن الۋ ءۇشىن زاڭ اياسىندا ارەكەت ەتۋگە قۇقىلى.
بۇگىندە كۇزەت بەكەتتەرى ەرەسەكتەرگە ارنالعان ءۇش قالالىق كوپسالالى اۋرۋحانادا, №2 قالالىق بالالار اۋرۋحاناسىندا جانە ەكى رەسپۋبليكالىق كلينيكادا ۇيىمداستىرىلعان.
جاقىن ارادا پوليتسيا دەپارتامەنتىمەن بىرلەسىپ №1 جانە №3 كوپسالالى بالالار اۋرۋحانالارىندا, سونداي-اق قالالىق پەريناتالدىق ورتالىقتا كۇزەت بەكەتتەرىن ورناتۋ ماسەلەسى قارالىپ جاتىر.
مەديتسينا جۇمىسكەرلەرى اتالعان باستامانى قولداپ, ونىڭ قاۋىپسىز جانە تۇراقتى جۇمىس ورتاسىن قۇرۋعا ىقپال ەتەتىنىن اتاپ ءوتتى.
«قاۋىپسىزدىك بەكەتتەرى – ءبىزدىڭ ءىس جۇزىندە قورعالعانىمىزدىڭ بەلگىسى. قابىلداۋ بولىمىندە تاۋلىگىنە ءتۇرلى جاراقاتتارى بار, ءارتۇرلى جاعدايدى باسىنان وتكەرگەن 400-گە جۋىق ادام جۇگىنەدى. ءبىز پاتسيەنتتەردىڭ عانا ەمەس, سونىمەن قاتار ولاردىڭ تۋىستارىنىڭ دا اگرەسسياسىنا تاپ بولامىز. بارلىعى شۇعىل كومەكتى قاجەت ەتەدى, ال مەديتسينالىق كومەك Triage سۇرىپتاۋ جۇيەسى بويىنشا جۇزەگە اسىرىلاتىنى ەسكەرىلمەيدى. ءار پاتسيەنتتىڭ وزىندىك «باسىمدىق دارەجەسى» بار. بىراق, وكىنىشكە قاراي, دارىگەرگە دەگەن قۇرمەت جوق», دەدى №2 كوپسالالى قالالىق اۋرۋحانانىڭ قابىلداۋ ءبولىمىنىڭ مەڭگەرۋشىسى ءمادينا تابىلدىقىزى.
ايتا كەتەيىك, پرەزيدەنت قاسىم-جومارت توقاەۆ فيزيكالىق كۇش قولدانعانى جانە مەديتسينا جۇمىسكەرلەرىنە قاتىگەزدىكپەن قاراعانى ءۇشىن جازانى قاتاڭداتۋدى تاپسىرعان بولاتىن.
