وسكەمەن. 17 اقپان. ا.س.پۋشكين اتىنداعى وبلىستىق كىتاپحانا حالىقارالىق كىتاپ سىيلاۋ كۇنىن اتاپ ءوتتى. «جاقسى كورەتىن كىتابىمدى سىزگە سىيلايمىن!» اكتسياسى اياسىنداعى مەرەكەدە كىتاپحاناعا كەلۋشىلەر سىيلىققا كىتاپ الۋ مۇمكىندىگىنە يە بولدى. بۇل تۋرالى egemen.kz ءتىلشىسى حابارلادى.
اتالعان شارادا وقىرماندار وزدەرىنىڭ سۇيىكتى اۆتورلارى مەن كىتاپتارى جونىندە جان تەبىرەنتەر پىكىرلەرىمەن ءبولىستى. كىتاپحاناعا الدىمەن قالا مەكتەپتەرىنىڭ وقۋشىلارى جينالدى. ولار «كىتاپ ەلى» كوڭىلدى-تانىمدىق ساياحات ويىنىنا قاتىستى. بالالار مەن ەرەسەكتەر كىتاپتار مەن شىعارمالار تۋرالى ماقال-ماتەلدەر مەن جۇمباقتار ايتىپ, ءتۇرلى اندەر ورىندادى. سونداي-اق كىتاپحانانىڭ جاس دوستارى مارتەبەلى كىتاپقا دەگەن وزدەرىنىڭ جۇرەكجاردى جىلى لەبىزدەرىن ارنادى. ءوزىنىڭ سۇيىكتى كىتابى جونىندەگى ويىن شەشەندىكپەن جەتكىزگەن وقىرماندار «سۇيىكتى كىتاپتار شەرۋى» اۋكتسيونىندا سىيلىق كىتاپتارعا يە بولدى.
قابيدوللا بالتەكەنوۆ, نادەجدا ليسەۆا, ليۋبوۆ نيككەل, ءۇمىتحان نۇرعاليەۆ, ليۋبوۆ ەۆستيفەەۆا سىندى كىتاپحانانىڭ ۇزدىك وقىرماندارى وزدەرىنىڭ كىتاپ وقۋ ەرەكشەلىكتەرى جونىندە اڭگىمەلەدى. سونىمەن بىرگە, قوناقتار پاپيرۋس جازبالارىنان باستاپ, ەلەكتروندى كىتاپحاناعا دەيىنگى ۋاقىتتى قامتىعان «مارتەبەلى كىتاپ» زياتكەرلىك ويىنىنا قاتىستى.
سونىمەن قاتار, كىتاپحانا وقىرماندارى وبلىستىق اۋرۋحاناعا بارىپ, اۋرۋحانانىڭ قىزمەتكەرلەرى مەن ەمدەلۋشىلەرىنە كىتاپ سىيلاپ, ءان ايتىپ بەردى. «100 قايىرىمدى ءىس» اتتى كىتاپحانا جانىنداعى كلۋب مۇشەلەرىنىڭ نازارىنان سوعىس ارداگەرلەرى دە تىس قالعان جوق. مايدانگەر قارت ا.كيمۋسوۆ كىتاپحانانىڭ ارنايى سىيلىعىنا يە بولدى.
دۋمان اناش.
دەرەك: egemen.kz
سۋرەت: ا.پۋشكين اتىنداعى وبلىستىق كىتاپحانا.
