قازاقستان وڭىرلىك ينتەگراتسيا باعىتىنان اۋىتقىمايدى

استانا. 17 اقپان. قازاقستان سىرتقى ەكونوميكالىق بايلانىستاردى جانە وڭىرلىك ينتەگراتسيانى كەڭەيتۋ باعدارىنان تانبايدى. پرەزيدەنت نۇرسۇلتان نازارباەۆ قازاقستاندا تىركەلگەن شەتەلدىك ديپلوماتيالىق ميسسيالار باسشىلارىمەن اقوردادا وتكەن كەزدەسۋدە وسىلاي دەدى. بۇل تۋرالى «قازاقپارات» حابارلادى. ەلباسى ءوز سوزىندە 2015 جىلدىڭ 1 قاڭتارىندا ەۋرازيالىق ەكونوميكالىق وداقتى قۇرۋ تۋرالى شارتى كۇشىنە ەنگەنىن ەسكە سالىپ, العاش رەت ەۋرازيادا رۋسۋرستىق الەۋەتى قۋاتتى, كولىكتىك-ەنەرگەتيكالىق جۇيەسى دامىعان ەكونوميكالىق بىرلەستىكتىڭ قۇرىلعانىن اتاپ ءوتتى. «ەاەو نەگىزىنە ەگەمەندىكتى قۇرمەتتەۋ, ەكونوميكالىق پراگماتيزم, تەڭدىك جانە اشىقتىق ۇستانىمدارى نەگىز قالاعاندىعىن ەرەكشە اتاپ وتكىم كەلەدى. ونسىز بىردە-ءبىر بىرلەستىك تىرشىلىك ەتە المايدى», - دەدى ن.نازارباەۆ. مەملەكەت باسشىسىنىڭ اتاپ وتۋىنشە, قازىردىڭ وزىندە ەاەو-نىڭ تارتىمدىلىعى جايىندا جەر-جەردە ايتىلىپ, وداقپەن ەركىن ساۋدا ايماعىن قۇرۋعا قىزىعۋشىلىق تانىتقان ەلدەردىڭ قاتارى 10-عا جەتىپ قالعان. «قازاقستاننىڭ ەۋروپالىق وداقپەن سەرىكتەستىك پەن ىنتىماقتاستىقتى كەڭەيتۋ تۋرالى جاڭا كەلىسىمشارت بويىنشا كەلىسسوزدەردى اياقتاۋى ماڭىزدى تابىس بولدى. اعىمداعى جىلى ءبىز قازاقستاننىڭ دۇنيەجۇىزىلىك ساۋدا ۇيىمىنا كىرەدى دەپ ەسەپتەيمىز.  بۇل سىرتقى ساۋدانىڭ ۇلعايا تۇسۋىنە سەپتىگىن تيگىزەدى», - دەدى قازاقستان كوشباسشىسى. ساكەن مايلىباي.