تاير قۇر سوزبەن شەكتەلمەي, اۋاداعى ىلعالدى اۋىزسۋعا اينالدىراتىن قۇرىلعى جاساپ شىعاردى. بۇل قۇرىلعىعا «AquaAeris» دەگەن ات بەرىلگەن. قازىردىڭ وزىندە حالىقارالىق بايقاۋلاردا توپ جارعان.
– بالا كەزىمنەن ءتۇرلى قۇرىلعى قۇراستىرۋعا اۋەس بولدىم. 8-سىنىپتا تەڭىزدەگى مۇناي اعىپ كەتكەن جەرلەردى انىقتايتىن اۆتونومدى كەمە جاساپ, رەسپۋبليكالىق روبوتتار وليمپياداسىندا جۇلدە الدىم. كەيىن قوقىستى سۇرىپتاۋ جۇيەسىن ويلاپ تاپتىم. بىراق مەنى شىن مازالاعان, ويلاندىرعان ماسەلە – اۋىزسۋدىڭ جەتىسپەۋشىلىگى ەدى. مۇعالىمدەر سۋ – ادام اعزاسى ءۇشىن ەڭ ماڭىزدى رەسۋرس ەكەنىن ايتىپ, ونىڭ قورى جىلدان-جىلعا ازايىپ بارا جاتقانىن ءتۇسىندىردى. وسىدان كەيىن مەن اۋانى بالاما سۋ كوزى رەتىندە قولدانۋعا بولاتىنى تۋرالى ويلانا باستادىم. نزم-دە وقىپ ءجۇرىپ, فيزيكا پانىنە قىزىعۋشىلىعىم ارتتى. ءتۇرلى ينجەنەرلىك جوبالاردان كەيىن «AquaAeris» قۇرىلعىسىنىڭ يدەياسى كەلدى, – دەيدى تاير.
تاير ۋاشەۆ – فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى. ونىڭ ايتۋىنشا, «AquaAeris» قۇرىلعىسىنىڭ جۇمىس ىستەۋ جۇيەسى وتە قاراپايىم. قۇرىلعىداعى جەلدەتكىشتەر اۋا اعىنىن ىشكە تارتىپ, ونى ارنايى كامەرادا سالقىنداتادى. اۋا شىق نۇكتەسىنە دەيىن سالقىنداعاندا, ىشىندەگى ىلعال كوندەنساتسيالانىپ, سۋعا اينالادى. بۇل سۋ سۇزگىدەن ءوتىپ, مينەرالدانادى. ناتيجەسىندە, تازا, ىشۋگە جارامدى سۋ دايىن بولادى. قۇرىلعى تاۋلىگىنە 20 ليترگە دەيىن اۋىزسۋ وندىرە الادى. تاعى ءبىر ەرەكشەلىگى – ەكولوگيالىق تازا بولۋى. ول كۇن باتارەياسى مەن جەل تۋربيناسىنان قۋات الىپ جۇمىس ىستەي الادى. بۇل اسىرەسە, ەلەكتر جارىعى تۇراقتى ەمەس, شالعاي اۋىلدار ءۇشىن اسا ماڭىزدى شەشىم بولماق.
تاير مەن ونىڭ كومانداسى 2024 جىلدىڭ قازان ايىندا «Tidal Tumble» جوباسىنا بىرىگىپ, «AquaAeris»-ءتىڭ العاشقى ءپروتوتيپىن جاساپ شىعارعان. سول قۇرىلعىمەن «Almaty Tech Cup» جارىسىنا قاتىسىپ, 130 كوماندانىڭ اراسىنان ۇزدىك ۇشتىككە كىرىپ, «Robot Design» اتالىمىندا ءبىرىنشى ورىن الدى. وسى جەتىستىكتەن كەيىن كوماندا اقش-تىڭ ۆۋستەر قالاسىندا وتكەن حالىقارالىق «Waffle fll» چەمپيوناتىنا شاقىرتۋ الادى. مۇندا 108 ەلدەن كەلگەن 650 ۇزدىك توپ اراسىندا جالعىز ورتالىق ازيا كومانداسى رەتىندە قاتىسادى. جارىس ناتيجەسىندە «Engineering Excellence» اتالىمىندا ەكىنشى ورىندى يەلەنىپ, روبوت ويىنى ناتيجەسى بويىنشا التىنشى ورىنعا تۇراقتاعان.
– قازىلار ءبىزدىڭ جوبانىڭ يدەياسى مەن ينجەنەرلىك ورىندالۋىن ەرەكشە اتاپ ءوتتى. اقش, قىتاي, وڭتۇستىك كورەيا سەكىلدى الپاۋىت ەلدەرمەن قاتارلاسا جارىسۋ مەن ءۇشىن ۇلكەن ماقتانىش. ەلىمىزدىڭ تۋىن حالىقارالىق ساحنادا كوتەرۋ بالا كەزدەن بەرگى ارمانىم ەدى. وسىنداي جەڭىس ماعان سەنىم سىيلايدى. قازىر «AquaAeris»-ءتى جەتىلدىرىپ, الداعى جىلى ەلىمىزدە وندىرىسكە شىعارۋدى جوسپارلاپ وتىرمىز. بۇل قۇرىلعى اسىرەسە سۋ تاپشىلىعى قاتتى سەزىلەتىن وڭىرلەردە ادامدارعا كومەكتەسەدى دەپ سەنەمىن, – دەيدى تاير.
جاس ونەرتاپقىشتىڭ باستى ماقساتى – تەك بايقاۋلاردا جۇلدە الۋ ەمەس, شىن مانىندە قوعامعا پايدالى تەحنولوگيا جاساۋ. بولاشاقتا «electrical engineering» نەمەسە «computer science» باعىتى بويىنشا جوعارى وقۋ ورنىنا ءتۇسىپ, ينجەنەر بولۋدى ارماندايدى.
