كومپانيا مەملەكەتتىك «چەكتەردى بەر – جۇلدەنى ۇتىپ ال» باعدارلاماسىنىڭ ارىپتەسى اتانىپ, ەندى ياندەكس Go سياقتى تاكسي قىزمەتتەرى ارقىلى تولەنگەن چەكتەرگە دە كەشبەك قايتارىلادى.
باعدارلاما Amian ءموبيلدى قوسىمشاسى ارقىلى ىسكە اسىرىلادى. قوسىمشانى App Store نەمەسە Google Play پلاتفورمالارىنان تەگىن جۇكتەۋگە بولادى. كەشبەك الۋ ءۇشىن پايدالانۋشى قىزمەت ءۇشىن تولەم جاساپ, تولەم چەگىن ساقتاپ, ونى Amian قوسىمشاسىنا جۇكتەۋى قاجەت. وسىلايشا چەكتە كورسەتىلگەن سومانىڭ 2 پايىزى قايتا ەسەپتەلىپ, بانك كارتاسىنا نەمەسە ءموبيلدى بالانسقا اۋدارىلادى.
سونىمەن قاتار باعدارلاما اياسىندا ءتۇرلى جەڭىلدىكتەر مەن سىيلىقتار ۇسىنىلادى. ماسەلەن, ءار توقساندا ءار وڭىردەن ەڭ كوپ چەك جىبەرگەن 20 ادام 100 مىڭ تەڭگەدەن الادى. ياندەكس لاۆكا سەرۆيسى ارقىلى العاشقى تاپسىرىس بەرگەندەرگە 50% جەڭىلدىك بەرىلەدى. ال Anutime كارشەرينگىنەن 5 مىڭ تەڭگەلىك جەڭىلدىك نەمەسە باسقا دا سىيلىقتار قاراستىرىلعان. باعدارلاما مەملەكەتتىك كىرىستەر كوميتەتىنىڭ باستاماسىمەن جۇزەگە اسىرىلىپ وتىر.
