قازىرگى ۋاقىتتا ءبىر مەزگىلدە 6 اۆتوماتتاندىرىلعان گاز تاراتۋ ستانساسىنىڭ (اگتس) قۇرىلىسى بەلسەندى تۇردە ءجۇرىپ جاتىر. ولار: «قاپال», «جانسۇگىروۆ», «سارقان», «قويلىق», «قابانباي», ء«ۇشارال». اتالعان 6 ستانسانىڭ ىشىندە 4-ەۋى – «قاپال», «جانسۇگىروۆ», «سارقان» جانە ء«ۇشارال» – بەرىكتىك پەن گەرمەتيكالىلىققا سىناقتان ءساتتى ءوتتى. بۇل – قىسىممەن جۇمىس ىستەيتىن جابدىقتاردىڭ قاۋىپسىزدىگى مەن سەنىمدىلىگىن قامتاماسىز ەتۋدىڭ ماڭىزدى قادامى.
جوسپاردان الدا كەلە جاتقان قۇرىلىس جۇمىسىنا 126 ارنايى تەحنيكا بىرلىگى تارتىلعان. 288 جۇمىسشى ەڭبەك ەتىپ جاتىر. اگتس-تەردىڭ جالپى دايىندىعى 74% دەپ باعالانادى. گاز قۇبىرىن پايدالانۋعا بەرۋ 2025 جىلعى تامىزعا جوسپارلانىپ وتىر. قۇبىردىڭ ۇزىندىعى – 302,441 كم. جوبالىق قىسىم – 9,8 مپا. جوبا اياسىندا 6 گاز قۇبىرى-بۇرماسى مەن 6 اۆتوماتتاندىرىلعان گاز تاراتۋ ستانساسى سالىنىپ جاتىر.
جوبا مەملەكەت باسشىسىنىڭ تاپسىرماسىمەن قولعا الىنعان. گاز قۇبىرىنىڭ قۇرىلىسى 2024 جىلعى تامىزدا پرەمەر-مينيستر ولجاس بەكتەنوۆتىڭ جەتىسۋ وبلىسىنا جۇمىس ساپارى بارىسىندا باستالعان ەدى.
جوبانى ىسكە اسىرۋ ناتيجەسىندە اقسۋ, سارقان جانە الاكول اۋداندارىنىڭ 66 ەلدى مەكەنىندە تۇراتىن 134 مىڭنان استام تۇرعىن تابيعي گازعا قوسىلۋ مۇمكىندىگىنە يە بولادى. بۇل ءوز كەزەگىندە كاسىپكەرلىك بەلسەندىلىكتىڭ ارتۋىنا, شاعىن جانە ورتا بيزنەستىڭ دامۋىنا, سونداي-اق جاڭا جۇمىس ورىندارىنىڭ اشىلۋىنا مۇمكىندىك بەرەدى.
