زياتكەرلىك بايگەنىڭ جەڭىمپازدارى

جاس فيزيكتەر

ۇلتتىق قۇراما جاقىندا فرانتسيانىڭ پالەزو قالا­سىندا وتكەن IPhO-2025 حالىق­ارالىق فيزيكا وليمپياداسىندا بەس مەدال جەڭىپ الدى.

بيىلعى سايىسقا 90 ەلدەن 400-دەن استام دارىندى وقۋشى قاتىسقان. جاس فيزيكتەرىمىز بۇل جولى دا ۇزدىكتەر قاتارىنان كورىنىپ, ەكى كۇمىس, ءۇش قولا مەدالدى ولجالاپ قايتتى. تارقاتىپ ايتساق, استانا قالاسىنداعى نازارباەۆ زياتكەرلىك مەك­تەبىنىڭ 11-سىنىپ وقۋشىسى امىربەك ازاتبەكوۆ پەن ال­ماتى قالاسىنداعى نازارباەۆ زيات­كەرلىك مەكتە­بىنىڭ 12-سىنىپ وقۋشىسى بەكا­سىل ەلۋ­باي ەكىنشى ورىن السا, استانا قالاسىنداعى «Spectrum» حالىقارالىق مەكتە­بىنىڭ 12-سىنىپ وقۋ­شىسى ءامىر پىشەنباەۆ, استا­نا قالا­سىن­داعى Nurorda مەك­تەپ-لي­تسەيىنىڭ 10-سىنىپ وق­ۋ­شى­سى نۇرگۇل ەگەنبەر­گەنوۆا جانە استانا قالاسىن­داعى «Spectrum» حالىقارالىق مەكتە­بىنىڭ 12-سىنىپ وقۋشىسى ارتۋر كيم ءۇشىنشى ورىننىڭ تۇعى­رىنان كورىندى.

كوماندانىڭ عىلىمي جەتەكشىلەرى – PhD دوكتورى, سۋلەيمان دەميرەل ۋنيۆەرسيتەتىنىڭ اسسيستەنت-پروفەسسورى سامات ماقسۇ­توۆ جانە حالىقارالىق وليم­پيادالاردىڭ جۇلدەگەرى اليشەر ەركەباەۆ.

ايتا كەتەيىك, فيزيكادان حالىقارالىق وليمپيادا 1967 جىلدان بەرى وتكىزىلەدى جانە بۇل سايىس الەمدەگى ەڭ بەدەلدى پاندىك جارىستاردىڭ ءبىرى سانالادى. ال ۇلتتىق قۇراما IPhO وليمپياداسىنا 1997 جىل­دان بەرى تۇراقتى قاتىسىپ كەلەدى.

ماتەماتيكا مىقتىلارى

اۋستراليادا وتكەن IMO-2025 حالىقارالىق ماتەماتيكا وليمپياداسىندا قازاقستان قۇراماسىنىڭ قورجىنى تاعى التى مەدالمەن تولىقتى. جىل سايىن ءداستۇرلى تۇردە ۇيىمداستىرىلاتىن بۇل ءبىلىم بايگەسىنە بيىل 112 ەلدەن 650-گە جۋىق ۇزدىك جاس ماتەماتيك قاتىسىپ, باق سى­ناعان. ەل نامىسىن قور­عاعان وقۋشىلارىمىز ءتورت كۇمىس, ەكى قولا مەدالعا قول جەتكىزىپ, ۇزدىكتەر قاتارىنان كورىندى. بۇل – ۇلكەن جەتىستىك.

حالىقارالىق IMO وليمپياداسىنا قازاقستان قۇراما كومانداسى العاش رەت 1993 جىلى قاتىستى. سودان بەرى جۇلدە قورجىنىمىز 16 التىن, 55 كۇمىس, 81 قولا مەدالمەن تولىقتى. ال بيىل­عى ناتيجەگە كەلەر بولساق, الماتى قالاسىنداعى «Hai­ley­bury Almaty» مەك­تە­بى­نىڭ وقۋشىلارى 11-سىنىپ وقۋ­شىسى اميرلان امان­جو­لوۆ پەن 12-سىنىپ وقۋشىسى ميرون يۋركەۆيچ, استانا قالاسىنداعى «Spec­trum International School» مەكتەبىنىڭ 11-سىنىپ وقۋ­شىسى مارعۇلان شارەل, الماتى قالاسىنداعى رفمم مەكتەبىنىڭ 11-سىنىپ وقۋشىسى امير ساحيپوۆ كۇمىس مەدالعا يە بولسا, اقتوبە وبلىسىنداعى ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى ەرقانات كەنشىلىك پەن الماتى قالاسىنداعى Nurorda مەكتەبىنىڭ 10-سىنىپ وقۋشىسى ەراسىل التىنبەك قولا مەدالعا قول جەتكىزدى. ولارعا جەتەكشىلىك ەتكەن — PhD دوكتورى اسىلبەك يساحوۆ پەن حالىقارالىق وليم­پيا­دالاردىڭ جەڭىمپازى قانات ساتىلحانوۆ.

ۇزدىك بيولوگتەر

قازاقستان قۇراماسى في­ليپ­پيندە وتكەن IBO-2025 حالىقارالىق بيولوگيا وليمپياداسىندا ءتاۋىر ناتيجە كور­سەتىپ, ءتورت قولا مەدالدى قانجىعاعا بايلادى.

وسىنداي ۇزدىك ناتيجە كور­سەتكەن قازاقستان كومان­داسىنىڭ قۇرامىندا پاۆ­لودار وبلىسىنداعى ء«بىلىم-يننوۆاتسيا» ليتسەي-ينتەر­ناتىنىڭ 10-سىنىپ وقۋشىسى ەرسۇلتان قايىركەن, وسكە­مەن قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى باتىر ەر­جان ۇلى, استانا قالاسىن­داعى نازارباەۆ زياتكەرلىك مەكتەبىنىڭ 12-سىنىپ وقۋشىسى ايعانىم بالتاشەۆا, ال­ماتى قالاسىنداعى ء«بىلىم-يننوۆاتسيا» ليتسەي-ينتەر­ناتىنىڭ 8-سىنىپ وقۋشىسى اليحان اشىرحانوۆ بار. كوماندانىڭ عىلىمي جەتەك­شىلەرى – وتاندىق عىلىمدى بەلسەندى دامىتىپ جۇرگەن جاس بيولوگ-عالىمدار لەيلا اسقاروۆا مەن يلياس ساكيموۆ.

ايتا كەتەيىك, بيىل بۇل ءبىلىم دوداسىنا 80 ەلدەن 320-دان استام دارىندى جاس قاتىستى. جالپى, IBO-2025 وليمپيا­داسى ەكى كەزەڭنەن تۇرادى. العاشقى تەوريالىق بولىمدە وقۋشىلار مولەكۋلالىق جانە جاسۋشالىق بيولوگيا, گەنەتيكا, ەكولوگيا, ەۆوليۋتسيا جانە بيوجۇيەلەۋ بويىنشا كۇردەلى ەسەپتەردى شەشەدى. ال پراكتيكالىق كەزەڭدە زەرت­حانالىق جۇمىستارمەن اينالىسىپ, بيولوگيالىق ۇدەرىس­تەردى تالدايدى.

ۇلتتىق قۇراما 1994 جىلدان بەرى IBO وليمپياداسىنا قاتىسىپ كەلەدى. وسى ۋاقىت ىشىندە وزات وقۋشىلارىمىز 2 التىن, 18 كۇمىس جانە 56 قولا مەدال, سونداي-اق 12 قۇرمەت گراموتاسىن جەڭىپ الدى. ەسكە سالا كەتەيىك, 2024 جىلى بۇل وليمپيادا استانا قالاسىندا ۇيىمداستىرىلدى.

دارىندى وقۋشىلاردى, ولاردىڭ ۇستازدارى مەن اتا-انا­لارىن وسى جارقىن جەڭىس­پەن قۇتتىقتايمىز!