بيىلعى قىسقى ازيا ويىندارىندا (حاربين, قىتاي) فريستايل-اكروباتيكا سپورتىنان ۇلتتىق قۇراما ساپىندا شىمكەنتتەن 6 سپورتشى قاتىستى. جارىس قورىتىندىسىندا شەرزود حاشيرباەۆ ءبىرىنشى ورىن الىپ, تاريحي جەڭىسكە قول جەتكىزدى. ءۇندىستاندا قازاق كۇرەسىنەن وتكەن الەم چەمپيوناتىندا ەرسۇلتان مۇزاپپاروۆ پەن جۇماجان قوجامبەكوۆ چەمپيون اتاندى. اۋىر سالماق بويىنشا ايەلدەر كۇرەسىندە البينا باحيەۆا بەس قارسىلاسىن دا شاق كەلتىرمەي التىننان القا تاقتى. سلوۆەنيادا سپورتتىق گيمناستيكادان وتكەن الەم كۋبوگىندە دياس تويشىبەك گيمناستيكالىق ات سناريادىمەن سىنعا ءتۇسىپ, جەڭىمپاز اتاندى. شىمكەنتتە جالاۋى جەلبىرەگەن ۇلتتىق تەڭگە ىلۋدەن العاشقى الەم چەمپيوناتىندا ءتولتاي باقىت, تۇلكىباي ازات باس جۇلدەگە يە بولدى. استانادا ۇيىمداستىرىلعان بوكستان الەم كۋبوگىندە ماحمۇد سابىرحان چەمپيون اتاندى. گەرمانياداعى جازعى ۋنيۆەرسيادادا تاەكۆوندو سپورتىنان ساميرحون اباباكيروۆ التىن الدى. اتى اتالعان بارلىق سپورتشىنى قالا اكىمى ارنايى قابىلداپ, سىي-سياپات كورسەتتى.
«شىمكەنت قالاسىندا جىل باسىنان بەرى بىرنەشە ءىرى سپورتتىق ءىس-شارالار جۇزەگە اسىرىلدى. جارىستاردا شىمكەنتتىك تە ورەندەر جۇلدەگە تالاستى. ولاردىڭ كوپشىلىگى ورىن سانى جاعىنان العاشقى ۇشتىكتەن كورىنىپ, تەك مەگاپوليستىڭ عانا ەمەس, تۇتاس قازاق ەلىنىڭ مەرەيىن ۇستەم ەتتى. سپورتتىق بايقاۋلاردى اتاپ وتسەك, «Zhaksykul mergen cup» ءداستۇرلى ساداق اتۋدان ازيا كۋبوگى ءوتتى. جارىستا التى شەتەل مەن ەلىمىزدىڭ وڭىرلەرىنەن 100-گە جۋىق سپورتشى سىنعا ءتۇستى. ناتيجەسىندە, مەگاپوليس مەرگەنى ءبىر قولا مەدالدى قانجىعاعا بايلادى. بايگەدەن ەلىمىزدىڭ چەمپيوناتىنىڭ ىرىكتەۋ ءتۋرنيرى كىل مىقتى شابارمانداردى جينادى. ونى تاماشالاۋعا 3000-عا جۋىق كورەرمەن كەلدى. سايىس بارىسىندا ات قۇلاعىندا ويناعاندار قىز قۋ, كوكپار, اۋدارىسپاق سەكىلدى ۇلتتىق سپورت تۇرلەرى بويىنشا ونەرلەرىن كورسەتتى. تەڭگە ىلۋدەن مەرگەندەر ەرەسەكتەر اراسىندا ءىىى ازيا كۋبوگىندە سايىستى. وندا 7 مەملەكەتتەن كەلگەن 60 سپورتشى جۇلدەگە تالاستى. قالانىڭ سۇرمەرگەندەرى بۇل سايىستا ءبىر كۇمىس جۇلدەگە يە بولدى. تاەكۆوندو يتف سپورتىنان ازيا كۋبوگىندە 7 مەملەكەتتەن 850-گە جۋىق سپورتشى باق سىنادى. شىمكەنت قالاسىنىڭ سپورتشىلارى سول جارىستا 7 التىن, 1 كۇمىس, 1 قولا مەدال جەڭىپ الدى. تاعى ءبىر سايىس – گرەك-ريم كۇرەسىنەن جاسوسپىرىمدەر اراسىنداعى تۋرنير جەڭىستىڭ 80 جىلدىعى مەن اۋعان سوعىسى قۇرباندارىن ەسكە الۋعا ارنالدى. وعان ەلىمىزدەن بولەك, ءۇش شەتەلدەن قاتىسۋشىلار كەلدى. جارىستا قالا سپورتشىلارى 2 التىن, 2 كۇمىس, 1 قولا مەدال يەلەندى. سونداي-اق قازاقستان حالقىنىڭ بىرلىگى كۇنىنە وراي «بىرلىك» جۇگىرۋ جارىسى ۇيىمداستىرىلدى. وعان 600-گە جۋىق ءتۇرلى ەتنوس وكىلدەرى قاتىستى. تەننيستەن Junior Billie Jean King Cup Final, Juniors Davis Cup Final Qualifying تۋرنيرلەرى ءوتتى. وعان 15 ەلدەن 80-گە جۋىق سپورتشى شاقىرىلدى. ەلىمىزدىڭ قىزدار قۇراما كومانداسى 4-ورىننان كورىنىپ, الەم چەمپيوناتىنا جولداما الدى. بۇل جەتىستىكتەر شىمكەنت قالاسىنىڭ سپورت ينفراقۇرىلىمىنىڭ دامۋى مەن سپورتشىلاردىڭ كاسىبي دەڭگەيىنىڭ جوعارى ەكەنىن تاعى ءبىر مارتە دالەلدەدى. قالا اكىمدىگى الداعى ۋاقىتتا دا بۇقارالىق, كاسىبي سپورتتى قولداۋدى جالعاستىرا بەرمەك», دەدى شىمكەنت قالاسى دەنەشىنىقتىرۋ جانە سپورت باسقارماسى باسشىسىنىڭ ورىنباسارى ەرمەك دارمەنوۆ.
ماماننىڭ ايتۋىنشا, شىمكەنتتە بالالار مەن جاسوسپىرىمدەردى جوعارى جەتىستىكتەر سپورتىنا باۋليتىن 11 وليمپيادالىق رەزەرۆتىڭ مامانداندىرىلعان سپورت مەكتەپتەرى جۇمىس اتقارادى. مەكتەپتەردە 40-تان استام سپورت تۇرلەرى قامتىلعان. ماسەلەن, بالالار مەن جاسوسپىرىمدەر ەركىن كۇرەس, دزيۋدو, ساداق اتۋ, قول كۇرەسى, كاراتە, تاەكۆوندو, گرەپپلينگ, گرەك-ريم كۇرەسى, رەگبي, ۋشۋ, باسكەتبول, فريستايل, كونكيمەن مانەرلەپ سىرعاناۋ, شورت-ترەك, شايبالى حوككەي, كوگالداعى حوككەي, كوركەم گيمناستيكا, ەستەتيكالىق گيمناستيكا سەكىلدى وزدەرى قالاعان سپورتتىق سەكتسيالارعا قاتىسا الادى. اتالعان سپورت مەكتەپتەرى دارىندى بالالاردى ىرىكتەۋ, ولاردى كاسىبي سپورتقا دايىنداۋ, حالىقارالىق دەڭگەيدەگى جارىستارعا شىعارۋ جونىندە جۇيەلى جۇمىستار جۇرگىزىپ كەلەدى.
سونىمەن بىرگە شىمكەنت شاھارىندا بۇگىندە 35 سپورت ۇيىمى جۇمىس ىستەيدى. بۇل ۇيىمداردا سپورتتىڭ 73 تۇرىنەن (وليمپيادالىق – 36, وليمپيادالىق ەمەس – 27, ۇلتتىق – 10) سپورتشىلار دايىندالادى. سپورتتىق سەكتسياعا جازىلعان 20 مىڭعا جۋىق ورەندى مىڭنان استام جاتتىقتىرۋشى سپورتقا باۋليدى. 2025 جىلى 61 سپورتتىق ءىس-شارا وتكىزۋ جوسپارلانعان بولسا, سونىڭ بۇگىنگە دەيىن 14-ءى وتكىزىلدى. جىل سوڭىنا دەيىن 47 ءىس-شارا ۇيىمداستىرۋ كوزدەلىپ وتىر. جان باسىنا شاققانداعى قارجىلاندىرۋ جۇيەسى ارقىلى 18 000 ۆاۋچەرگە 3,9 ملرد تەڭگە ءبولىنىپ, بالالار مەن جاسوسپىرىمدەردى سپورتتىق سەكتسيامەن قامتاماسىز ەتۋگە 120 كاسىپكەر اتسالىسىپ جاتىر. قازىرگى تاڭدا جان باسىنا قارجىلاندىرۋ جۇيەسى بويىنشا 16 381 بالا سپورتپەن قامتىلسا, 1130-ى كەزەكتە تۇر.
بۇگىنگى تاڭدا حالىق دەنساۋلىعىن نىعايتىپ, بۇقارالىق سپورتقا تارتۋ ماقساتىندا 27 سپورت نۇسقاۋشىسى 11 ساياباقتا تاڭعى جاتتىعۋلار وتكىزەدى. بۇل – ەلىمىزدى سالاماتتى قازاقستانعا اينالدىرۋ باعىتىندا قولعا الىنعان باستامانىڭ ىسكە اسقاندىعىنىڭ كورىنىسى. پرەزيدەنت قاسىم-جومارت توقاەۆ ايتىپ وتكەندەي, ۇلت ساۋلىعى بارىنەن دە ماڭىزدى بولۋعا ءتيىس. مەملەكەت باسشىسىنىڭ ارنايى تاپسىرماسىن ورىنداۋ ماقساتىندا بۇگىندە مەگاپوليستە حالىقتى بۇقارالىق سپورتقا تارتۋ ماقساتىنداعى جۇمىستار قارقىندى جۇرگىزىلىپ كەلەدى. وسى ءىس-شارالاردىڭ ناتيجەسىندە شاھاردا بۇقارالىق سپورتپەن قامتىلعان حالىقتىڭ ۇلەسى جىل سايىن ارتا ءتۇستى. بۇل دەنەشىنىقتىرۋ مەن سپورت ارقىلى تۇرعىنداردىڭ دەنساۋلىعىن نىعايتۋدى كوزدەيتىن مەملەكەتتىك ستراتەگيانىڭ جەمىس بەرە باستاعاندىعىن اڭعارتادى. ەلىمىز ورتا دەرجاۆالى مەملەكەت رەتىندە الدىنا ۇلكەن ماقساتتار قويىپ وتىر. ال اۋقىمدى ستراتەگيالىق جوسپارلاردى ىسكە اسىرۋ ءۇشىن ەڭ الدىمەن ۇلتتىڭ دەنساۋلىعى مىقتى بولۋى كەرەك.
قالادا 855 سپورت نىسانى بار (568 – سپورتتىق, 253 – ءبىلىم بەرۋ, 34 – سپورت مەكتەپتەرى). 2025 جىلعا بىرنەشە جاڭا سپورتتىق نىسانداردىڭ قۇرىلىسى مەن جوندەۋ جۇمىستارى جوسپارلانعان. اتاپ ايتقاندا, قالانىڭ قاراتاۋ اۋدانى اكىمشىلىك اۋماعىنان جاڭا فۋتبول ستاديونىنىڭ قۇرىلىسى قولعا الىنادى. پاراليمپيادالىق, سۋردوليمپيادالىق سپورت كەشەنى سالىنادى. شاھاردىڭ شەتكى ايماعىندا ورنالاسقان قايناربۇلاق, قاراباستاۋ, بادام ەلدى مەكەندەرىندە ءمودۋلدى سپورت نىساندارى بوي كوتەرەدى. №17 سپورت مەكتەبىندە جاڭا فۋتبول الاڭى مەن مانەجدەر پايدا بولادى. بۇدان بولەك, قاجىمۇقان اتىنداعى ستاديون, ورتالىق سۋ سپورت كەشەنى, مۇز سارايى, №17 سپورت مەكتەبىنىڭ مامين-سيبيرياك كوشەسىندەگى عيماراتىنا جوندەۋ جۇمىستارىن جۇرگىزۋ جوسپاردا تۇر. سالاعا جاۋاپتى ماماننىڭ مالىمدەۋىنشە, شالعاي ەلدى مەكەندەردە سپورت ينفراقۇرىلىمىنا ارنالعان جەر تەلىمدەرى زاڭداستىرىلدى. ەندى دەمەۋشىلەر ەسەبىنەن 3 جاڭا نىساننىڭ قۇرىلىسى قولعا الىناتىن بولادى.
«جوعارىدا اتالىپ وتكەندەي, 2025 جىلدىڭ العاشقى 5 ايىندا شىمكەنتتىك سپورتشىلار 656 جۇلدە جەڭىپ الدى. ەل بىرىنشىلىكتەرىنەن – 212 التىن, 207 كۇمىس, 223 قولا, ازيا چەمپيوناتتارىنان – 3 التىن, 6 كۇمىس, 1 قولا, الەم چەمپيوناتتارىنان 4 التىن بۇيىردى. قالامىزدا 1 قازاقستانعا ەڭبەگى سىڭگەن جاتتىقتىرۋشى, 8 حالىقارالىق سپورت شەبەرى, 17 قازاقستاننىڭ سپورت شەبەرى, 307 سپورت شەبەرلىگىنە ۇمىتكەر بالالار مەن جاسوسپىرىمدەردى سپورتقا جاتتىقتىرادى. شىمكەنتتىك 1 284 سپورتشى ۇلتتىق قۇراما ساپىندا ونەر كورسەتەدى. بيىلعى ماقساتىمىز – VI جاستار ويىندارىنا قاتىسۋ. مۇندا شىمكەنت كومانداسى باستى فاۆوريت سانالادى. سونداي-اق كەلەسى جىلى قىسقى وليمپيادادان جۇلدە الساق دەگەن ويىمىز بار. فريستايل اكروباتيكا سايىسى بويىنشا ۇمىتكەرىمىز دە جوق ەمەس. ودان بولەك, كەلەسى جىلى وتەتىن حح جازعى ازيا ويىندارىنا دايىندىقتى قازىردەن باستاپ كەتتىك. جالپى, شىمكەنت قالاسىندا سپورتتىڭ دامۋىنا مەملەكەت تاراپىنان بارلىق جاعداي جاسالىپ وتىر. ەڭ باستىسى, سپورتتىق ينفراقۇرىلىم مەن جوعارى سپورت شەبەرلىگىن شىڭداۋ ارقىلى مەگاپوليس ورەندەرى حالىقارالىق ارەنالاردا تابىستى ونەر كورسەتىپ كەلەدى», دەدى ە.دارمەنوۆ.
