تانىسا كەلە سويلەسكەنىمىزدە, گۇلزار اتاقتى ءانشى يگىلىك وماروۆتىڭ نەمەرەسى بولىپ شىقتى. اكەسى عابدراحمان ءبىر كەزدەرى جاڭاارقا اۋدانىن باسقارعانى ەسىمىزگە ءتۇستى. قازىر امەريكادا ونەرىن شىڭداپ جۇرگەن گۇلزاردىڭ ول جاقتاعى لاقاپ اتى گۇلزار گابمان, الەۋمەتتىك جەلىلەردەن دە وسىلاي ىزدەسە شىعادى.
ءانشى 2022 جىلى «Viva-Music Carnigie Hall» بايقاۋىنا قاتىسىپ, ءبىرىنشى ورىننان كورىنىپ, جەڭىمپاز تانىلسا كەرەك. وندا حالىق اۋزىندا كەڭ تارالعان ۇلەبايدىڭ «دۋدارايىن» قۇيقىلجىتقان ەكەن. سودان بەرى ءۇش جىل وتكەندە گۇلزار اتاقتى ساحناعا قايتا كوتەرىلىپ وتىر. بۇل جولعى قۇرمەتتىڭ ورنى بولەك. سەبەبى مەن دەگەن الەمدىك ساحناگەرلەردىڭ ماڭدايىنا جازىلا بەرمەگەن كونتسەرت زالىنىڭ ۇجىمى مەن اتالعان بايقاۋدى ۇيىمداستىرۋشى تاراپ ءانشىنى اتتاي قالاپ, قۇرمەتتى قوناق رەتىندە شاقىرىپ, ءبىر ەمەس, ەكى بىردەي قازاق انىنە ورىن بەرىپ وتىر. گۇلزار شىرقاماي قالسىن با؟ بۇل جولى حالىق ءانى «اگۋگاي» مەن ەل اراسىنا يگىلىك وماروۆتىڭ ورىنداۋىندا كەڭ تارالعان سادىق كەرىمباەۆتىڭ ءانى «اقەركەنى» ورىنداپتى. «بيتلز» توبى, لايزا ميننەللي, فرەنك سيناترا, اندرەا بوچەللي, ماريا كاللاس سىندى الەمدىك جۇلدىزدار ونەر كورسەتكەن زالدا قازاق قىزىنىڭ ءان شىرقاۋى, ارينە, تاريحي وقيعا دەر ەدىك. مۇنى ءوزى دە وسىلاي شامالاپ وتىرعانىن ايتادى ءانشى.
«مەنى قولداپ, قوشەمەتتەپ كەلگەن وسىنداعى قازاق قاۋىمداستىعى وكىلدەرىنە العىسىم شەكسىز» دەيدى گۇلزار عابدراحمان.
