وبلىس باسشىسىنىڭ اۋداندارعى ءىسساپارى كەزىندە وڭىردە ەگىن جانە مال شارۋاشىلىعىن دامىتۋ, سۋ ۇنەمدەۋ تەحنولوگيالارىن ەنگىزۋ, ينفراقۇرىلىمدى جاڭعىرتۋ باعىتىندا اتقارىلىپ جاتقان جۇمىستاردىڭ بارىسىنا نازار اۋدارىلىپ, شارۋالاردىڭ ۇسىنىس-پىكىرلەرى مەن ءوتىنىش-تىلەكتەرى تىڭدالدى.
ەربول قاراشوكەەۆ جۇمىس ساپارىنىڭ العاشقى نىسانى رەتىندە جۋالى اۋدانىنداعى «تەرىس-اشىبۇلاق» سۋ قويماسىنا بارىپ, ونىڭ قازىرگى جاي-كۇيىمەن جانە سۋ جيناۋ, ءبولۋ مۇمكىندىكتەرىن كوردى. 1963 جىلى پايدالانۋعا بەرىلگەن سۋ شارۋاشىلىعى نىسانىنىڭ جالپى اۋماعى 24 شارشى كشاقىرىمدى قۇرايدى. ورتاشا تەرەڭدىگى – 28,2 مەتر. بوگەتتىڭ ۇزىندىعى – 1 860 مەتر. سۋ قويماسىنىڭ جوبالىق سىيىمدىلىعى – 158,6 ميلليون تەكشە مەتر. سۋ وتكىزۋ قابىلەتى – سەكۋندىنا 36 تەكشە مەتر. اتالعان سۋ قويماسى ارقىلى 21 039 گەكتار جەر سۋارىلادى.
«قازسۋشار» رمك-نىڭ جامبىل وبلىسى بويىنشا فيليالىنىڭ ديرەكتورى قايرات امانوۆتىڭ ايتۋىنشا, 2019 جىلى سۋ قويماسىنداعى بوگەتتىڭ ەداۋىر بولىگىنە جوندەۋ جۇمىستارى جۇرگىزىلگەن. ال 2026-2028 جىلدار ارالىعىندا سۋ قويماسىن يسلام دامۋ بانكىنىڭ قارجىسى ەسەبىنەن قايتا جاڭعىرتۋ جوسپارلانىپ وتىر.
«كليماتتىڭ وزگەرۋى تىرشىلىك پەن تابيعاتقا ايتارلىقتاي اسەر ەتۋدە. مۇنداي جاعدايدا سۋ تاپشىلىعى ماسەلەسى بۇرىنعىدان بەتەر وزەكتى بولا تۇسەدى. سوندىقتان قولدا بار سۋ رەسۋرستارىن ۇقىپتى ءارى ءتيىمدى پايدالانۋ, زاماناۋي سۋارۋ تەحنولوگيالارىن ەنگىزۋ – اۋىل شارۋاشىلىعىنىڭ تۇراقتى دامۋىن قامتاماسىز ەتۋدىڭ باستى جولى. بۇل باعىتتا ناقتى ءارى جۇيەلى شارالار قابىلدانىپ, شارۋاشالارعا جان-جاقتى ءتۇسىندىرۋ جۇمىستارى جۇرگىزىلۋى ءتيىس», – دەدى وبلىس اكىمى.
مۇنان سوڭ ءوڭىر باسشىسى «Aznur Agro» اۋىل شارۋاشىلىعى وندىرىستىك كووپەراتيۆىنىڭ 400 باسقا ارنالعان تاۋارلى ءسۇت فەرماسىنىڭ قۇرىلىس جۇمىسىمەن تانىستى. 2023 جىلى جامبىل اۋدانىنىڭ كولقاينار اۋىلدىق وكرۋگىندە قۇرىلعان كووپەراتيۆ ەگىن جانە مال شارۋاشىلىعىمەن اينالىسادى. قاراماعىندا 223 گەكتار ەگىستىك جانە 2 000 گەكتار جايىلىم جەرى بار. 180 گەكتار القاپقا تامشىلاتىپ سۋارۋ, ال 43 گەكتارعا جاڭبىرلاتىپ سۋارۋ تەحنولوگياسى ەنگىزىلگەن.
ەربول قاراشوكەەۆ «قىزىل-ديحان» اۋىل شارۋاشىلىعى وندىرىستىك كووپەراتيۆىندە دە بولدى. كووپەراتيۆكە تيەسىلى جالپى جەر كولەمى – 1 510,9 گەكتار. ونىڭ ىشىندە 1 240 گەكتارى – ەگىستىك, 1 099,61 گەكتارى – سۋارمالى جەر, 134,9 گەكتارى – شابىندىق, 6 گەكتارى – جايىلىم. شارۋاشىلىقتىڭ يەلىگىندە 9 دانا تراكتور مەن وزگە دە اۋىل شارۋاشىلىعى تەحنيكالارى بار. بيىل 250 گەكتارعا كۇزدىك بيداي, 350 گەكتارعا جازدىق ارپا, 70 گەكتارعا داندىك جۇگەرى, 60 گەكتارعا قانت قىزىلشاسى, 10 گەكتارعا پياز, 187 گەكتارعا كوپجىلدىق ءشوپ ەگىلىپ, 313 گەكتار جەرگە ءسۇرى ورنالاستىرىلعان.
بۇدان سوڭ وبلىس اكىمى جامبىل اۋدانىنداعى «سازا» جانە «ايتاق» كانالدارىنىڭ قازىرگى جاعدايىن تەكسەردى. كەيىننەن ە. قاراشوكەەۆ «تاراز» يندۋستريالىق ايماعىندا ونەركاسىپتىك جوبالارعا ارنالعان دايىن وندىرىستىك الاڭداردى جانە «TRZ Agro» جشس-نىڭ كوكونىس ساقتاۋ قويماسىنىڭ قۇرىلىسىن كوزبەن كوردى. سونداي-اق بايزاق اۋدانىندا ورنالاسقان «سەڭكىباي» مەن «وتەمىس» كانالدارىن قايتا قۇرۋ جوباسى اياسىندا جۇرگىزىلىپ جاتقان قۇرىلىس جۇمىستارىنىڭ بارىسىن جەكە باقىلاۋىنا الدى. بۇدان بولەك, مىرزاتاي اۋىلىندا جاڭادان بوي كوتەرگەن ۆەتەريناريالىق پۋنكتتى ارالادى.
بۇدان سوڭ ەربول قاراشوكەەۆ «نۇرلى-جاي» شارۋا قوجالىعىنا باردى. قوجالىقتىڭ قاراماعىندا 45 گەكتار ەگىستىك پەن 3 500 گەكتار جايىلىم جەر بار. ماتەريالدىق-تەحنيكالىق بازاسى 22 بىرلىك اۋىل شارۋاشىلىعى تەحنيكاسىمەن جابدىقتالعان. 8 ادام تۇراقتى ەڭبەك ەتەدى. شارۋاشىلىقتا 850 باس مال بار, ونىڭ ىشىندە 200-ءى – اسىل تۇقىمدى ءمۇيىزدى ءىرى قارا. قازىرگى ۋاقىتتا 50 باستان جوعارى تاۋارلى ءسۇت فەرماسىنىڭ قۇرىلىسى جۇرگىزىلۋدە.
«اگروونەركاسىپ كەشەنىن دامىتۋدا تاۋارلى ءسۇت فەرمالارىنىڭ ۇلەسى ەرەكشە. مۇنداي جوبالار ءبىر جاعىنان ازىق-ت ۇلىك قاۋىپسىزدىگىن قامتاماسىز ەتسە, ەكىنشى جاعىنان اۋىل تۇرعىندارىنا تۇراقتى جۇمىس ورىندارىن اشادى. مەملەكەت تاراپىنان بۇل باعىتقا قولداۋ جالعاسادى»,– دەگەن ەربول قاراشوكەەۆ قۇرىلىس جۇمىستارىن جەدەل ءارى ساپالى ورىنداۋدى تالاپ ەتتى.
جامبىل وبلىسى
