فوتو: قورعانىس مينيسترلىگى
جوبانى ىسكە قوسۋعا دايىندىق اياسىندا بولىمگە قورعانىس ءمينيسترىنىڭ تسيفرلاندىرۋ جونىندەگى ورىنباسارى دارحان احمەديەۆ كەلدى. دەلەگاتسيا قۇرامىنا ءماجىلىس دەپۋتاتى ولجاس قۇسپەكوۆ جانە «قازاقتەلەكوم» اق, «ترانستەلەكوم» اق, «BI Group» اق, «Invictus Fitness» جشس, «قازاقستان گاج ورتالىعى» اق جانە الماتى شاحمات كلۋبىنىڭ سەرىكتەس كومپانيالارىنىڭ وكىلدەرى كىردى. قاتىسۋشىلار ينفراقۇرىلىم نىساندارىمەن تانىسىپ, جاڭا فۋتبول الاڭى مەن ەلەكتروندى ءتيردىڭ اشىلۋىنا قاتىستى.
پيلوتتىق جوبادا ءاربىر اسكەري قىزمەتشىگە ناقتى ۋاقىتتاعى بيومەتريالىق كورسەتكىشتەردى باقىلاۋ ءۇشىن فيتنەس-بىلەزىك بەرىلەدى دەپ جوسپارلانىپ وتىر. دەرەكتەر مەديتسينالىق پەرسونال مەن كومانديرلەرگە قولجەتىمدى ورتالىقتاندىرىلعان مونيتورينگ جۇيەسىنە كەلىپ تۇسەدى, بۇل جەكە قۇرامنىڭ دەنساۋلىق جاعدايىن تۇراقتى باقىلاۋدى قامتاماسىز ەتەدى. بەينە تالداۋ جۇيەسى دە ەنگىزىلىپ جاتىر.
ءبولىم اۋماعىندا قۇرىلىس جانە جوندەۋ جۇمىستارى اياقتالۋعا جاقىن. سپورت نىساندارى جاڭارتىلىپ, ترەناجەرلەر ورناتىلىپ جاتىر, ويىن سپورت تۇرلەرىنە ارنالعان الاڭدار مەن كورەرمەندەرگە ارنالعان ايماقتار قۇرىلىپ جاتىر. لوگيكالىق ويلاۋدى دامىتۋ جانە زياتكەرلىك بەلسەندىلىكتى قولداۋ ءۇشىن شاحمات سەكتسيالارىن ىسكە قوسۋ دا جوسپاردا بار.
قورعانىس مينيسترلىگىنىڭ ءباسپاسوز قىزمەتىنىڭ مالىمدەۋىنشە جوبا اياسىندا تەلەكوممۋنيكاتسيا جانە IT سالاسىندا – «قازاقتەلەكوم» جانە «ترانستەلەكوم» كومپانيالارىمەن بىرلەسىپ بازالىق وقىتۋ باعدارلامالارى كوزدەلگەن. اسكەردەگى قىزمەت اياقتالعاننان كەيىن قاتىسۋشىلار اتتەستاتتاۋدان ءوتىپ, جۇمىسقا ورنالاسۋ كەزىندە پايدالى سەرتيفيكاتتار الا الادى. وعان قوسا ۇشقىشسىز ۇشاتىن قۇرىلعىلار مەن راديوبايلانىستى پايدالانۋ نەگىزدەرىنە وقىتۋ جوسپارلانعان. قوسىمشا قازاق جانە اعىلشىن تىلدەرىندە ساباقتار ۇيىمداستىرىلادى.
اسكەري قىزمەتشىلەردىڭ پسيحولوگيالىق كۇيىن قولداۋ ءۇشىن ەموتسيانى شىعارۋ بولمەسى اشىلادى. وفيتسەرلەر مەن سەرجانتتار ءۇشىن زاماناۋي, قۇزىرەتتى جانە سترەسسكە ءتوزىمدى اسكەري مامان قالىپتاستىرۋعا باعىتتالعان جەكە تۇلعانى دامىتۋ بويىنشا ترەنينگتەر قاراستىرىلعان.
ايتا كەتكەن ءجون, اسكەرگە شاقىرىلۋشىلاردى ىرىكتەۋدىڭ ىڭعايلىلىعى ءۇشىن جوبانىڭ رەسمي سايتى ازىرلەندى. پلاتفورمادا قىزمەتكە كىرۋ ءتارتىبى, ءوتۋ شارتتارى جانە ىرىكتەۋ كەزەڭدەرى تۋرالى اقپارات ورنالاستىرىلعان. اسكەرگە شاقىرىلۋشىلار ونلاين-تىركەۋدەن وتە الادى, سودان كەيىن ولاردىڭ ساۋالنامالارىن ءبولىم وكىلدەرى مەن جەرگىلىكتى اسكەري باسقارۋ ورگاندارىنىڭ قاتىسۋىمەن كوميسسيا قارايدى. ىرىكتەۋدەن وتكەن ۇمىتكەرلەر قابىلدانعانى تۋرالى حابارلاما الادى.
جوبا ءساتتى ىسكە اسىرىلعان جاعدايدا ونى قر قارۋلى كۇشتەرىنىڭ باسقا دا بولىمشەلەرىنە كەزەڭ-كەزەڭىمەن ەنگىزۋ جوسپارلانىپ وتىر.
