TUMO – Alem.ai عيماراتىنىڭ 2 جانە 3 قاباتتارىندا ورنالاسادى. مۇندا جىلىنا 5000 وقۋشىنى تەگىن وقىتۋ جوسپارلانىپ وتىر.
Astana Hub باسقارۋشى ديرەكتورى ۆالەريا ءتيونىڭ ايتۋىنشا, جاقىن ارادا alem.ai سايتىندا ءوتىنىم قابىلداۋ باستالادى. ەشقانداي ىرىكتەۋ تالاپتارى جوق. الداعى 3-5 جىلدا بۇل جوبانى ەلىمىزدىڭ بارلىق ايماقتارىنا, سونىڭ ىشىندە شالعاي ەلدى مەكەندەرگە دەيىن كەڭەيتىپ, ءاربىر وقۋشىعا وسىنداي مۇمكىندىكتى قولجەتىمدى ەتۋ كوزدەلىپ وتىر.
«ەندى ەرەسەكتەرگە ارنالعان باعدارلامالارعا توقتالايىق. Tech Orda باعدارلاماسى 2021 جىلدان بەرى جۇمىس ىستەپ كەلەدى. وسى ۋاقىت ىشىندە باعدارلاما اياسىندا 10 مىڭعا جۋىق ادام باعدارلامالاۋ, Big Data, كيبەرقاۋىپسىزدىك جانە باسقا دا باعىتتار بويىنشا وقۋدان ءوتتى. تۇلەكتەردىڭ 88%-ى جۇمىسقا ورنالاسقان. Tech Orda – وقۋعا 6 اي جانە ودان دا ۇزاق ۋاقىت قاجەت ەتەتىن 72 جەكە IT-مەكتەپتىڭ كۋرستارىنا تەگىن قول جەتكىزۋگە مۇمكىندىك بەرەدى. جاساندى ينتەللەكت پەن باعدارلامالاۋدى تەرەڭىرەك مەڭگەرگىسى كەلەتىندەر ءۇشىن TomorrowSchool مەكتەبى قۇرىلدى. بۇل – ەلىمىزدەگى العاشقى peer-to-peer فورماتىنداعى جي مەكتەبى. بۇل فورماتتا ءداستۇرلى مۇعالىمدەر جوق, ستۋدەنتتەر ءبىر-بىرىنە كومەكتەسۋ ارقىلى وقيدى. وقۋ ۇزاقتىعى – ەكى جىل, وسى ارالىقتا ستۋدەنتتەر 50-دەن استام جوبانى جۇزەگە اسىرىپ, 20-عا جۋىق باعدارلامالاۋ ءتىلىن مەڭگەرەدى.
ءبىز ستۋدەنتتەرگە تەگىن وقۋ, تاۋلىك بويى جۇمىس ىستەيتىن كامپۋس, ساراپشىلاردىڭ لەكتسيالارى, ستۋدەنتتىك كلۋبتار, سونداي-اق وڭىرلەردەن كەلگەندەرگە تەگىن تۇرۋ ورنىن ۇسىنامىز», دەدى ۆالەريا تيو.
بۇل مەكتەپكە قالاي تۇسۋگە بولادى؟ باعدارلامالاۋ بويىنشا الدىن الا ءبىلىم نەمەسە جۇمىس تاجىريبەسى قاجەت ەمەس. تەك پلاتفورماداعى لوگيكا مەن ەستە ساقتاۋ قابىلەتىن تەكسەرەتىن ويىنداردان ءوتىپ, كامپۋستا بولاتىن 4 اپتالىق وقىتۋعا قاتىسۋ قاجەت. وسى جوباعا قازىردىڭ وزىندە 12 مىڭنان استام ءوتىنىم كەلىپ تۇسكەن. جاڭا كەزەڭگە قابىلداۋ ءالى جالعاسىپ جاتىر. تاعى ءبىر ايتا كەتەرلىگى, TomorrowSchool ستۋدەنتتەرىنىڭ 30%-ىن قىزدار قاۋىمى قۇرايدى. سونىمەن قاتار Astana Hub ايەلدەرگە ارنالعان ءبىلىم جوبالارىن دا قولداپ كەلەدى. مىسالى, IT-Áiel باعدارلاماسى TechnoWomen قاۋىمداستىعىمەن بىرلەسىپ ءۇشىنشى جىل قاتارىنان جۇزەگە اسىپ جاتىر. وسى ۋاقىت ىشىندە 5,5 مىڭ ايەل وقۋدان ءوتتى.
Astana Hub باسقارۋشى ديرەكتورى جاساندى ينتەللەكت نەگىزدەرىن ونلاين فورماتتا قايدان وقۋعا بولاتىنىن دا ايتتى.
«ونلاين فورماتتاعى تەگىن كۋرستارعا توقتالساق, ءبىز ءۇش سەرىكتەستىك جوبانى ۇسىنامىز. ءبىرىنشىسى – «جي نەگىزدەرى: ChatGPT» كۋرسى. بۇل كۋرس Lerna جانە Skillbox پلاتفورمالارىمەن بىرلەسىپ ازىرلەنگەن. وسى كۋرسقا 220 مىڭنان استام ادام تىركەلىپ, 124 مىڭنان استامى وقۋدى ءساتتى اياقتادى. ەكىنشىسى – Udacity پلاتفورماسىمەن بىرلەسكەن QazCoders باعدارلاماسى. باعدارلاما 4 كۋرستان تۇرادى, ونىڭ ءبىرى جي-گە ارنالعان. ناۋرىز ايىندا ىسكە قوسىلىپ, 4000 ادامدى قامتىدى. ءۇشىنشىسى – «دەرەكتەردى تالداۋ جانە Python نەگىزدەرى». بۇل ەندى «ياندەكس پراكتيكۋممەن» سەرىكتەستىكتە جۇزەگە اسقان جوبا. ساۋىردە ىسكە قوسىلىپ, 1500-دەن استام قاتىسۋشىنى تارتتى», دەدى ۆالەريا تيو.
اتالعان كۋرستارعا تەگىن قاتىسۋ ءۇشىن Astana Hub ءموبيلدى قوسىمشاسىن جۇكتەپ, AI Movement بولىمىنەن ءوزى قالاعان كۋرستى تاڭداۋ كەرەك.
ء«بىزدىڭ كۋرستاردى اياقتاپ, جي سالاسىندا ستارتاپ جاساعىسى كەلەتىندەرگە اشىلاتىن مۇمكىندىكتەر ەسىگى كوپ. مىسالى, حاكاتونعا قاتىسۋعا بولادى. قىركۇيەك ايىندا وتەتىن Decentrathon 4.0 – ەلىمىزدەگى ەڭ ءىرى مۋلتيلوكاتسيالىق حاكاتون. بۇل – ءتورتىنشى رەت ۇيىمداستىرىلىپ وتىرعان ءىس-شارا, وعان ادەتتە 2500-دەن استام ادام قاتىسادى, مىڭداعان شەشىم ازىرلەنەدى. جەڭىمپاز كوماندالار دەمەۋشىلەردەن اقشالاي سىيلىقتار الادى. ەگەر سىزدە كوماندا دا, جوبا دا بولماسا, بىراق بەلگىلى ءبىر سالادا ساراپشى بولساڭىز, AI Preneurs باعدارلاماسىنا قاتىسا الاسىز. بۇل – جاساندى ينتەللەكت سالاسىنداعى يننوۆاتسيالىق ستارتاپتار قۇرۋعا ارنالعان كوماندالاردى قالىپتاستىرۋدى كوزدەيتىن باستاما. جي سالاسىنداعى ادامي كاپيتالدى دامىتۋ ارقىلى ءبىز باسەكەگە قابىلەتتى ەكونوميكا مەن بولاشاق قوعامىنىڭ نەگىزىن قالاپ جاتىرمىز.
ءبىزدىڭ ماقسات – تەك وقىتۋ ەمەس, وسۋگە, شىعارماشىلىققا جانە ناقتى وزگەرىستەرگە جول اشاتىن قۇرالدار ۇسىنۋ», دەدى Astana Hub باسقارۋشى ديرەكتورى ۆالەريا تيو.
تسيفرلىق دامۋ, يننوۆاتسيالار جانە اەروعارىش مينيسترلىگى جاساندى ينتەللەكت جانە يننوۆاتسيالاردى دامىتۋ كوميتەتى توراعاسىنىڭ ورىنباسارى الىبەك سايلانباەۆ ChatGPT-ءدىڭ كومەگىنە جۇگىنگەن كەزدە دەرەكتەردى ۇرلاتىپ الماۋ ءۇشىن قانداي ساقتىق شارالارىن قولدانۋ كەرەكتىگىن ايتتى.
«مىسالى, كوبىمىز WhatsApp قوسىمشاسىن قولدانامىز. WhatsApp-تا دا سۇراق قويىپ, دەرەكتەر الماسامىز. ChatGPT دە تۋرا سونداي, ياعني سەرۆەرلەرى شەتەلدە ورنالاسقاندىقتان, دەرەكتەر باسقا جاققا تارالۋى مۇمكىن. دەگەنمەن ChatGPT-دە دەرەكتەردىڭ قاۋىپسىزدىگىنە ارنالعان ارنايى فۋنكتسيا بار. ەگەر «باپتاۋ» بولىمىنە كىرىپ قاراساڭىز, «مەنىڭ دەرەكتەرىمدى قولدانبا» دەگەن باتىرما بار. سونى باسساڭىز دەرەكتەرىڭىزدى ءوز مودەلدەرىندە قولدانبايدى», دەدى الىبەك سايلانباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
