فيلم اتى اڭىزعا اينالعان "دوس-مۇقاسان" ءانسامبلىنىڭ قۇرىلۋ تاريحىن باياندايدى. پوليتەحنيكالىق ينستيتۋتتىڭ ستۋدەنتتەرى قۇرعان توپتىڭ شىعارماشىلىق جولى, كەڭەستىك كەزەڭدەگى شەكتەۋلەر, ونەر مەن عىلىم اراسىنداعى تاڭداۋ, قوعام تاراپىنان كورسەتىلگەن قىسىم سىندى وقيعالار تۋىندىدا كورىنىس تاپقان. فيلم ستسەناريىن ەفرات ءشارىپوۆ جازعان. پروديۋسەرى – ايگۇل بايبەك.
كينوتۋىندى قر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. تاريحي شىندىققا ساي بولۋى ءۇشىن ءانسامبلدىڭ تۇپنۇسقا مۇشەلەرى مۇرات قۇسايىنوۆ پەن دوسىم سۇلەيمەنوۆ كەڭەسشى رەتىندە قاتىسقان.
ءفيلمنىڭ باكۋدەگى پرەمەراسى اياسىندا ازەربايجاندىق مۋزىكانتتار مەن انشىلەردىڭ قاتىسۋىمەن كونتسەرتتىك باعدارلاما ۇيىمداستىرىلدى. بۇل شارا قازاقستان مەن ازەربايجان اراسىنداعى مادەني قارىم-قاتىناستىڭ دامىپ كەلە جاتقانىن كورسەتتى.
كەشكە قازاقستاننىڭ ازەربايجانداعى ەلشىسى ءالىم بايەل, شىعارماشىلىق جانە عىلىمي زيالى قاۋىم وكىلدەرى, ديپلوماتيالىق كورپۋس مۇشەلەرى, باق وكىلدەرى مەن قازاق دياسپوراسى قاتىستى.
ايتا كەتەيىك, قازاقستان كينوسىنىڭ ايلىعى اياسىندا باكۋدە تاعى بىرنەشە وتاندىق فيلمدەردىڭ كورسەتىلىمى وتەدى. ءىس-شارانى قر مادەنيەت جانە اقپارات مينيسترلىگىنىڭ قولداۋىمەن ۇلتتىق كينونى قولداۋ مەملەكەتتىك ورتالىعى ۇيىمداستىرىپ وتىر.
