ەلوردالىق قۇتقارۋشىلارعا پاتەر كىلتى تابىستالدى

2024 جىلى استانا قالاسىنىڭ تجد قىزمەتكەرلەرىنە 50 پاتەر بەرىلگەن. ۇزدىك ءۇردىستى جالعاستىرۋ ماقساتىندا بۇگىن 15 مامان پاتەر كىلتىن قولىنا ۇستادى. جاڭا قونىس يەلەرىنىڭ قاتارىندا قۇتقارۋشىلار, جۇرگىزۋشىلەر جانە بولىمشە كومانديرلەرى بار. ولاردىڭ باسىم بولىگى سالادا ونداعان جىلدار قالتقىسىز قىزمەت ەتىپ كەلەدى. ەڭبەك جولىن ءورت ءسوندىرۋشى بولىپ باستاعان  سەرىك ەسەنوۆ بۇگىندە اسا ماڭىزدى نىسانداردى قورعاۋ ءبولىمىن باسقارادى. كەلەر جىلى زەينەتكە شىعاتىن ول باس قالادان باسپانالى بولۋىن ەڭبەكتىڭ وتەۋىنە بالايدى.

«كەيىنگى جىلدارى قۇتقارۋشىلاردىڭ جاعدايىن وڭالتۋعا جەتكىلىكتى دارەجەدە كوڭىل ءبولىنىپ جاتىر. جاقىندا ءورت سوندىرۋشىلەرگە دە تۇرعىن ءۇي تولەمى بەرىلەتىنى تۋرالى حابار دا كوڭىلگە قۋانىش سىيلادى. بۇدان بولەك تەحنيكالىق بازا دا جاڭارتىلىپ جاتىر. مۇنىڭ ءبارى ءمىنسىز قىزمەت ەتۋگە ەداۋىر ىقپال ەتەدى», دەدى ول.

قۇتقارۋشىلارعا بەرىلگەن باسپانا تەك سالا ساڭلاعىنىڭ عانا ەمەس - ونىڭ وتباسىنىڭ دا ورتاق جەڭىسى. ەندى سەرىكتىڭ جۇبايى انارمەن بىرگە ءتالىم قۇيىپ وتىرعان 3 بالاسى دا ءوز ۇيىندە ەركىن ەر جەتەدى.  جانۇيا تاريحىندا قالاتىن ايتۋلى كۇندە  انار ەسەنوۆا كۇن-ءتۇن قىزمەت جولىندا قايمىقپاعان جۇبايىنىڭ ەڭبەگى ەلەنگەنىنە ءدان ريزا.

«24 جىل قۇتقارۋشى بولىپ قىزمەت ەتكەن جولداسىم جۇمىسىنا قاتىستى ەش شاعىم ايتىپ كورمەپتى. مەن مۇنىسىن ءار كۇنى قاۋىپ-قاتەرمەن بەتپە-بەت كەلسە دە جۇمىسىن جاقسى كورەتىنى دەپ تۇسىنەمىن. جولداسىمنىڭ قىزمەتىنىڭ قيىن تۇسىن ءبىز دە تەرەڭ تۇيسىنەمىز. سوندىقتان جۇمىسىنا اللاعا امانات ەتىپ شىعارىپ سالامىز. بۇگىن مىنە, ءمينيستردىڭ قولىنان پاتەر كىلتىن الدى. بۇل  - اركىمگە بۇيىرا بەرمەيتىن باق, مارتەبە», دەدى انار نۇربەكقىزى.

قۇتقارۋشىلاردى زاماناۋي تەحنيكالارمەن قامتاماسىز ەتۋ دە قىزمەتتىڭ تيىمدىلىگىن ارتتىرىپ, ادام ءومىرىن دەر شاعىندا اراشالاۋعا ايتارلىقتاي كومەك. بۇگىنگى شارادا تەحنيكالىق بازانى دا جاڭارتۋ نازاردان تىس قالماي, 18 تجم قۇرامدارى 18 اۆتوكولىپەن تولىقتى. كولىك كىلتىن العاندار اراسىندا جەدەل قۇتقارۋ جاساعىنىڭ بولىمشە كومانديرى ازامات بەردىقۇلوۆ تا بار.

«2015 جىلدان جەدەل قۇتقارۋ سالاسىندا قىزمەت ەتىپ كەلەمىن. قازىرگى ۋاقىتتا تەحنولوگيا تۇرلەنىپ, زاماناۋي قۇرىلعىلار شىعىپ جاتىر. ونىڭ ءبارى ادام ءومىرىن جەڭىلدەتىپ نەمەسە ساقتاۋعا ارنالعان دەپ ايتۋعا بولادى. ءبىز وسىنداي ماڭىزدى ىسپەن اينالىساتىندىقتان تەحنولوگيالىق جەتىستىكتەردى يگەرۋىمىز كەرەك. جەتىلدىرىلگەن كولىكتەر بىزگە وسىنداي مۇمكىندىكتەر بەرەدى. بىلتىر ەل اۋماعىندا بولعان سۋ تاسقىنى كەزىندە بالشىق جولدارمەن قيىندىقسىز وتكەن وسىنداي تيپتەگى كولىكتەر كوبەيگەنى قىزمەتتەگىلەر مەن حالىق ءۇشىن ورتاق پايدا», دەدى ازامات بەردىقۇلوۆ.

سالا باسشىسى شىڭعىس ءارىنوۆ, ءوز كەزەگىندە قۇتقارۋشىلاردى ومىرلىك قاجەتتىلىكتەرمەن قامتاماسىز ەتۋ ولاردىڭ باستى ىسكە – ادام ءومىرىن قۇتقارۋعا تولىق كوڭىل بولۋگە جاعداي جاسايتىنىن اتاپ ءوتىپ, يگى باستاما جالعاساتىنىن جەتكىزدى.