فوتو: اشىق دەرەككوز
وقۋ-اعارتۋ مينيسترلىگىنىڭ حابارلاۋىنشا, باعدارلاما مەملەكەتتىك جالپىعا مىندەتتى مەكتەپكە دەيىنگى تاربيە مەن وقىتۋ ستاندارتىنا ساي ازىرلەنگەن جانە مەكتەپكە دەيىنگى ءبىلىم مەن باستاۋىش ءبىلىم اراسىنداعى ساباقتاستىقتى نىعايتۋعا باعىتتالعان.
«وقىتۋ مەرزىمى ءبىر ايعا ەسەپتەلگەن. ساباقتار كۇن سايىن 30 مينۋتتان, 10 مينۋتتىق ۇزىلىستەرمەن وتەدى. بالالارعا باستاۋىش سىنىپتىڭ بىلىكتى مۇعالىمدەرى نەمەسە مەكتەپالدى دايارلىق پەداگوگتەرى ساباق بەرەدى. اسىرەسە, بالالاردىڭ فيزيكالىق, كوممۋنيكاتيۆتىك, زياتكەرلىك, شىعارماشىلىق جانە الەۋمەتتىك-ەموتسيونالدىق داعدىلارىن دامىتۋعا, سونداي-اق مەكتەپكە دەگەن وڭ كوزقاراس قالىپتاستىرۋعا باسا نازار اۋدارىلادى», دەدى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.
ايتا كەتەيىك, ماۋسىم مەن شىلدە ايلارىندا باعدارلاماعا 25 مىڭعا جۋىق بالا قاتىسقان. ال تامىز ايىندا تاعى 5,3 مىڭ توپ اشىلىپ, 65,2 مىڭ بالانى قامتۋ جوسپارلانىپ وتىر. وسىلايشا, جاز بويى 90 مىڭعا جۋىق بالا قىسقا مەرزىمدى مەكتەپكە دايارلىق كۋرستارىمەن قامتىلماق.
