فوتو: اشىق دەرەككوز
ايدا بالاەۆا قازىرگى بالالار مەن جاسوسپىرىمدەردىڭ فەنتەزي, دەتەكتيۆ, فانتاستيكا جانە كوميكس سەكىلدى جانرلارعا ەرەكشە قىزىعۋشىلىق تانىتاتىنىن اتاپ ءوتىپ, بۇل باعىتتاعى ادەبيەتتەردى كوبەيتىپ, كىتاپحانالار قورىن جاڭارتۋدىڭ جانە قازىرگى اۆتورلاردى قولداۋدىڭ ماڭىزدى ەكەنىن ايتتى.
«بالالارعا كىتاپتى كۇشتەپ وقىتۋ ەمەس, قىزىقتىرا وتىرىپ ۇيرەتۋ قاجەت. ولار ادەبيەتكە جاڭا فورمالار ارقىلى عاشىق بولۋى مۇمكىن. دەمەك, ءبىز ادەبيەت پەن مادەنيەتتە مۇرانى ساقتاي وتىرىپ, بولاشاقتى قالىپتاستىرۋ ميسسياسىن قاتار الىپ ءجۇرۋىمىز كەرەك», دەدى مينيستر.
سونىمەن قاتار ول مەملەكەت تاراپىنان كىتاپ شىعارۋعا بولىنەتىن قارجىنى ءتيىمدى پايدالانۋ, مازمۇندىق جاڭعىرتۋ مەن جازۋشىلاردى جۇيەلى تۇردە قولداۋدىڭ ماڭىزدىلىعىن اتاپ ءوتتى. ا.بالاەۆانىڭ سوزىنشە, بۇل تەك بىرجولعى ءىس ەمەس, ستراتەگيالىق تۇرعىدان قاراۋدى قاجەت ەتەتىن ۇزاق مەرزىمدى جۇمىس.
ءمينيستردىڭ ايتۋىنشا, پرەزيدەنت اكىمشىلىگىنىڭ تاپسىرماسىنا سايكەس, 2025 جىلى جارىق كورەتىن كىتاپتار اراسىندا زاماناۋي كوركەم ادەبيەت, پۋبليتسيستيكالىق (non-fiction), عىلىمي-كوپشىلىك, بالالار مەن جاسوسپىرىمدەر ادەبيەتى جانە اۋدارما ەڭبەكتەردىڭ ۇلەسى 80%-عا دەيىن ۇلعايعان.
سونداي-اق, تاۋەلسىزدىك جىلدارىنان بەرى مەملەكەت تاپسىرىسى اياسىندا جازۋشىلاردىڭ كىتاپتارى تۇراقتى تۇردە جارىق كورىپ, بۇكىل رەسپۋبليكاداعى كىتاپحانالارعا تاراتىلادى. 2017–2024 جىلدارى ارالىعىندا وسىنداي تاپسىرىسپەن 1 487 كىتاپ 4,9 ميلليون دانامەن باسىلىپ شىققان. سونىمەن قاتار قالامگەرلەرگە قالاماقى تولەۋ جۇيەسى دە قالىپتاسقان.
