فوتو: ۇكىمەت
ۇلتتىق بانكتىڭ مالىمەتىنشە, بيىلعى ماۋسىم ايىنىڭ قورىتىندىسى بويىنشا ينفلياتسيا جىلدىق ماندە 11,8%-دى قۇراعان. بۇل كورسەتكىشكە الەمدىك نارىقتاردىڭ تۇراقسىزدىعى, تاريفتىك رەفورمالار, تۇتىنۋشىلىق سۇرانىستىڭ كۇشەيۋى جانە ينفلياتسيالىق جورامالدار سىندى بىرقاتار سىرتقى جانە ىشكى فاكتور اسەر ەتكەن.
باعانىڭ ءوسۋىن تەجەۋ ماقساتىندا ۇكىمەت ۇلتتىق بانكپەن جانە جەرگىلىكتى اتقارۋشى ورگاندارمەن بىرلەسكەن جۇمىستاردى قولعا العان. سونىڭ ءبىرى - ۇلتتىق بانكتىڭ بەلسەندى قاتىسۋىمەن ينفلياتسيانى باقىلاۋ جانە تومەندەتۋ جونىندەگى قىسقا ءارى ۇزاقمەرزىمدى قامتيتىن شارالار كەشەنى. قۇجات قاراۋدىڭ سوڭعى ساتىسىندا تۇر جانە ۇكىمەتتىڭ جەكە قاۋلىسىمەن قابىلدانادى. نەگىزگى باعىتتاردىڭ قاتارىنا ىشكى ءوندىرىستى ۇلعايتۋ, تاريفتىك ساياساتتىڭ بولجامدىلىعىن ارتتىرۋ, بازالىق تاۋارلارعا باعانى تۇراقتاندىرۋ جانە ينفلياتسيالىق كۇتۋلەردى تومەندەتۋ جاتادى. سونداي-اق وتاندىق ءوندىرىستى قولداۋ, ىشكى نارىقتى قامتۋ جانە ساۋدا ۇستەمەلەرىن باقىلاۋ جالعاسىپ جاتىر.
ۇلتتىق ەكونوميكا مينيسترلىگىنىڭ اقپاراتى بويىنشا, جىل باسىنان بەرى 15% شەكتى ساۋدا ۇستەمەسىن اسىرعانى ءۇشىن 1 847 اكىمشىلىك قاۋلى شىعارىلعان. رەتتەلەتىن كوممۋنالدىق قىزمەتتەرگە تاريفتەردىڭ نەگىزسىز وسۋىنە جول بەرمەۋ بويىنشا دا جۇمىستار جۇرگىزىلۋدە. جىل باسىنان بەرى وسى باعىت بويىنشا ينفلياتسياعا جيىنتىق ۇلەس 0,5 پايىزدىق تارماقشانى قۇراعان.
جيىندا 2023 جىلى شارالار كەشەنىن جۇزەگە اسىرۋ ينفلياتسيالىق قىسىمدى 4,16 پايىزدىق تارماقشاعا, 2024 جىلى 2,3 پايىزدىق تارماقشاعا تومەندەتۋگە مۇمكىندىك بەرگەنى ايتىلدى. قازىرگى ۋاقىتتا شارالار كەشەنى وزەكتەندىرىلىپ, 2026 جىلعا دەيىن ۇزارتىلعان.
ساۋدا جانە ينتەگراتسيا مينيسترلىگىنىڭ مالىمەتىنشە, قازاقستان الەۋمەتتىك ماڭىزى بار ازىق-ت ۇلىك تاۋارلارى بويىنشا باسەكەلەستىك باعانى ساقتاپ وتىر: سيىر ەتىنىڭ قۇنى ەاەو جانە ورتالىق ازيا ەلدەرىنە قاراعاندا 30%-عا, كارتوپ پەن ءسابىز 38%-عا, پياز 47%-عا, قىرىققابات 50%-عا تومەن. وسى جىلدىڭ باسىنان باستاپ نارىقتىق باعادان تومەن باعامەن 3 مىڭنان استام اۋىل شارۋاشىلىعى تاۋارلارى جارمەڭكەسى وتكىزىلگەن. سالالىق وداقتارمەن مەموراندۋمدارعا قول قويىلىپ, سونىڭ ناتيجەسىندە جۇمىرتقا باعاسى 8,7%-عا تومەندەگەن. ماۋسىمنان تىس ۋاقىتتا باعانى تۇراقتاندىرۋ ءۇشىن 30,3 مىڭ جەتكىزىپ بەرۋ كەلىسىمشارتتارى جاسالعان. قىتايدان, پاكىستاننان جانە وزبەكستاننان بىرنەشە توننا ەرتە پىسەتىن كوكونىستەر جەتكىزىلگەن. ونىمدەردى, ونىڭ ىشىندە كارتوپتى, انالىق مالدى جانە بۇقاشىقتاردى ەلدەن اكەتۋگە شەكتەۋلەر ەنگىزىلگەن.
