تەگىن ۇيىرمەلەرگە جولداما بەرەتىن جۇيە جاڭارتىلدى

QOSYMSHA.KZ - مەملەكەت ەسەبىنەن ۇيىرمەلەرگە, سپورت سەكتسيالارىنا جانە شىعارماشىلىق ستۋديالارعا تەگىن قاتىسۋعا مۇمكىندىك بەرەتىن بۇرىنعى جۇيەنىنىڭ جاڭارعان نۇسقاسى. 

2021 جىلدان بەرى قازاقستاندا قوسىمشا ءبىلىم بەرۋگە ارنالعان ۆاۋچەرلىك قارجىلاندىرۋ جۇيەسى ىسكە قوسىلعان.  جۇيە ارقىلى مەملەكەت ءار بالانىڭ ءبىر ۇيىرمەگە قاتىسۋىنا قارجى بولەدى. ال اتا-انا بالاسىنىڭ قىزىعۋشىلىعى مەن بوس ۋاقىتىنا ساي باعىتتى ءوزى تاڭدايدى.

بيىل ەلوردالىق 25 000-نان استام بالا وسى باعدارلاما ارقىلى تەگىن قوسىمشا ءبىلىم الىپ ءجۇر. ەل بويىنشا بۇل كورسەتكىش 500 000-نان استام بالانى قامتيدى. دەسە دە بۇرىنعى جۇيە قولدانىلعان تۇستا اتا-انالار بىرقاتار كەمشىلىكتەردىڭ بارىن ءجيى ايتقان بولاتىن.

سونىڭ ءبىرىنشىسى, ءبىلىم, سپورت جانە مادەنيەت باسقارمالارىنىڭ ءۇش ءتۇرلى كەزەگى.

ەكىنشى, «تىركەلگەنى وتەدى» قاعيداسى. مۇندا الەۋمەتتىك وسال توپ بالالارى قوسىمشا بىلىمنەن تىس قالىپ, كەي بالالاردىڭ ەكى ۆاۋچەر العانى بايقالعان.

قالا اكىمدىگى اتالعان ولقىلىقتاردى جويۋ ءۇشىن E-ORDA ينفراقۇرىلىمىنا نەگىزدەلگەن QOSYMSHA.KZ مەملەكەتتىك تسيفرلىق جۇيەسىن ەنگىزدى.

QOSYMSHA.KZ جاڭالىعى – الەۋمەتتىك جىكتەۋ

قالا اكىمدىگىنىڭ حابارلاۋىنشا, ەندى ءوتىنىم بەرۋ, ۆاۋچەر ءبولۋ جانە قاتىسۋدى باقىلاۋ ءبىر تەرەزە قاعيداتىمەن جۇزەگە اسادى.

جۇيەنىڭ باستى جاڭالىعى الەۋمەتتىك جىكتەۋدىڭ ەنگىزىلۋى. وتىنىمدەر ەندى بەرىلگەن ۋاقىتىنا ەمەس, بالانىڭ الەۋمەتتىك مارتەبەسىنە قاراي سۇرىپتالادى.

 12 سانات بەكىتىلگەن, ارقايسىنا بولەك كوەففيتسيەنت بەلگىلەنگەن:
• ەرەكشە ءبىلىمدى قاجەت ەتەتىن بالالار – كوەففيتسيەنت 5;
• ااك الاتىن وتباسىلارداعى, مۇگەدەكتىگى بار اتا-اناسى بار, جەتىم بالالار – كوەففيتسيەنت 3-4;
• كوپبالالى وتباسىنداعى بالالار – كوەففيتسيەنت 2;
• 4-18 جاس ارالىعىنداعى باسقا بالالار – كوەففيتسيەنت 1.

وسىلايشا, كوپبالالى نەمەسە الەۋمەتتىك جاعدايى تومەن وتباسىنداعى بالا ءوتىنىمدى كەيىنىرەك بەرگەن كۇننىڭ وزىندە, جالپى تىزىمدە وزگەلەرمەن سالىستىرعاندا جوعارى ورىنعا كوتەرىلەدى. بۇل «كىم ءبىرىنشى باتىرمانى باسسا – سوعان بەرىلەدى» دەگەن جارىستى بولدىرماي, تەڭ قولجەتىمدىلىكتى قامتاماسىز ەتەدى.

سونداي-اق, ەندى ۆاۋچەر ناقتى ءبىر ۇيىرمەگە ەمەس, تىكەلەي بالاعا بەرىلەدى. مۇندا اتا-انالار ۆاۋچەر العان سوڭ ۇيىرمەنى بالا جاسىنا, قىزىعۋشىلىعىنا جانە كەستەسىنە ساي ەركىن تاڭداي الادى.

QOSYMSHA.KZ-كە تىركەلۋ قاجەت پە؟

تەگىن قوسىمشا ءبىلىم بەرۋ قۇقىعىن پايدالانۋ ءۇشىن QOSYMSHA.KZ سايتىنا تىركەلۋ مىندەتتى. جۇيەدە اتا-انا مەن بالانىڭ جسن-ءىن كورسەتۋ, دەرەكتەردىڭ دۇرىستىعىن راستاۋ كەرەك.

مەملەكەتتىك قارجىلاندىرۋدى جالعاستىرۋ ءۇشىن اي سايىن جەكە كابينەتكە كىرىپ, بالانىڭ ۇيىرمەگە قاتىسۋىن راستاۋ دا ماڭىزدى.

ەگەر بالا قازىردىڭ وزىندە قانداي دا ءبىر ۇيىرمەگە بارىپ جۇرسە, سول ۇيىمعا بارىپ, ونىڭ دەرەكتەرىن جۇيەگە ەنگىزۋدى سۇراۋ قاجەت.

ايتا كەتەيىك, ءوتىنىمدى تەك استانا قالاسىندا تىركەلگەن (تۇراقتى نەمەسە ۋاقىتشا) وتباسىلار عانا بەرە الادى.