استانادا وتكەن Kazakhstan Open 2025 حالىقارالىق ءتۋرنيرى بيىل ەرەكشە وقيعامەن ەستە قالدى. قازاقستان كاراتە فەدەراتسياسى ۇيىمداستىرعان دودادا التى ەلدەن كەلگەن 560-تان اسا سپورتشى ءوزارا مىقتىنى انىقتادى. كاتا, كۋميتە جانە كوماندالىق كۋميتە بويىنشا وتكەن 58 ساناتتاعى تارتىس بيىل اۋىل جاستارى ءۇشىن تاريحي كەزەڭگە اينالدى. سەبەبى العاش رەت حالىقارالىق ارەنادا قازاقتىڭ اۋىل بالالارى ونەر كورسەتكەن.
بۇل – Halyk قايىرىمدىلىق قورى جۇزەگە اسىرىپ جاتقان «AUYL SPORT» جوباسىنىڭ ناتيجەسى. ءىرى كاسىپكەر, سپورت جاناشارى تيمۋر ق ۇلىباەۆتىڭ اۋىلداعى تالانتتى جاستارعا جول اشۋ جونىندەگى ستراتەگيالىق باستاماسىمەن «Halyk» قورى بۇقارالىق سپورتتى قولداۋعا جۇيەلى تۇردە قارجى ءبولىپ كەلەدى.
جوبا اياسىندا ىرىكتەلگەن 6 اۋىل بالاسى ەل نامىسىن قورعاپ, ەكى بىردەي جۇلدەمەن ورالدى. ماڭعىستاۋ وبلىسى قىزىلساي اۋىلىنىڭ 14 جاستاعى سپورتشىسى ماتجان مادەنيەت 52 كەلى سالماقتا كۇمىس مەدال جەڭىپ السا, باسقۇدىق اۋىلىنان انيششەنكو زاحار 60 كەلى سالماقتا قولا جۇلدەگە يە بولدى. بۇل – بۇكىل اۋىلعا, ۇستاز بەن اتا-اناعا, جاس جەتكىنشەككە شابىت بەرەتىن تاريحي ءسات. سپورتشىلار تاتاميگە تەك مەدال ءۇشىن ەمەس, اۋىلدىڭ نامىسىن ارقالاپ شىقتى.
«بۇل مەنىڭ عانا ەمەس, مەنى باپتاعان جاتتىقتىرۋشىمنىڭ, دەمەۋ بولعان اتا-انام مەن اۋىلداستارىمنىڭ جەڭىسى. العاش رەت شەتەلدەن كەلگەن قارسىلاستارمەن تاتاميگە شىقتىم. قوبالجىدىم, بىراق اۋىلدىڭ ءۇمىتىن اقتاۋ ءۇشىن بارىمدى سالدىم. ەندى الەم چەمپيونى بولامىن دەگەن ارمانىما سەنەمىن. “AUYL SPORT” جوباسىنا جانە Halyk قورىنا شەكسىز العىس ايتامىن», دەيدى جاس سپورتشى ماتجان مادەنيەت.
ايتا كەتەيىك, تۋرنير قورىتىندىسى بويىنشا, جاستار قۇراماسى جاساقتالىپ, 2025 جىلعى قىركۇيەكتە قىتايدىڭ حانچجوۋ قالاسىندا وتەتىن ازيا چەمپيوناتىنا جولداما الادى.
«Halyk» قورى ءتۋرنيردى جوعارى دەڭگەيدە ۇيىمداستىرعان قازاقستان كاراتە فەدەراتسياسىنا العىس ءبىلدىرىپ, جاس سپورتشىلاردىڭ باعىن اشۋعا ىقپال ەتكەن كاسىبيلىك پەن ادال ەڭبەكتى ەرەكشە اتاپ ءوتتى.
«بۇل تۋرنير اۋىل بالالارىنىڭ ارمانىنا جول اشقان ۇلكەن الاڭ. ءبىزدىڭ ماقسات – ءاربىر اۋىل بالاسىنا ءوز دارىنىن تانىتىپ, ۇلكەن سپورتقا قادام باسۋعا مۇمكىندىك بەرۋ. Kazakhstan Open 2025 – وسى جولداعى ماڭىزدى بەلەس. بۇل مۇمكىندىك بۇگىنگى جەڭىستەن دە ماڭىزدى», دەدى Halyk قايىرىمدىلىق قورىنىڭ اتقارۋشى ديرەكتورى عالىمبەك جاقسىلىق ۇلى.
ايتا كەتەيىك, «AUYL SPORT» – «Halyk» قايىرىمدىلىق قورى قولعا العان ماڭىزدى الەۋمەتتىك جوبا. باعدارلاما 2024 جىلدان باستاپ اۋىلدىق جەرلەردە بۇقارالىق سپورتتى دامىتۋ, تالانتتى بالالاردى قولداۋ جانە كاسىبي سپورتقا باعىتتاۋعا جۇمىس ىستەيدى. بۇگىندە بۇل باستاما اياسىندا ەلىمىزدىڭ تۇكپىر-تۇكپىرىندە 10 مىڭنان استام ءبالا تۇرلى سپورت تۇرىمەن جۇيەلى تۇردە اينالىسىپ ءجۇر.
AUYL SPORT باعدارلاماسىنىڭ تيىمدىلىگىن دالەلدەيتىن تاعى ءبىر ايعاق – سەربيادا وتكەن GYMNASIADE حالىقارالىق سايىسىندا 12 اۋىل بالاسىنىڭ 6 مەدال جەڭىپ الۋى. ەندى سول تاجىريبە Kazakhstan Open اياسىندا جالعاسىپ, اۋىل سپورتشىلارى حالىقارالىق ارەناعا سەنىمدى قادام باسىپ وتىر.
ال قايىرىمدىلىق قورى ەلىمىزدىڭ تۇكپىر-تۇكپىرىندەگى مۇقتاج جاندارعا قولداۋ كورسەتىپ, الەۋمەتتىك جاۋاپكەرشىلىكتى سەرىك ەتكەن ءىرى ۇيىم. قور اۋىل سپورتىنا عانا 500 ميلليون تەڭگەگە جۋىق قارجى بولىپ قويماي, جالپى سانى 120-دان استام الەۋمەتتىك جوبانى جۇزەگە اسىرىپ, 85 ميلليارد تەڭگە كولەمىندە قاراجات جۇمساعان.
