اسكەري وركەستر مۋزىكاسى ويناعان سالتاناتتى اشىلۋ راسىمىنە شىمكەنت گارنيزونىنىڭ باستىعى پودپولكوۆنيك سەرگەي بيبۋلاتوۆ, ءال-فارابي اۋدانىنىڭ اكىمى ماراتبەك مىقتىبەكوۆ, كاسىپكەرلەر قاۋىمداستىعىنىڭ وكىلدەرى مەن اسكەري قالاشىق تۇرعىندارى قاتىستى.
العاشقى ءسوزدى العان پودپولكوۆنيك سەرگەي بيبۋلاتوۆ بۇگىنگى وقيعانىڭ ەرەكشە ماڭىزعا يە ەكەنىن اتاپ ءوتتى. سەبەبى ءوزى دە بالا-شاعاسىمەن وسى قالاشىقتا تۇرادى. سوندىقتان اتا-انا رەتىندە بارشا وتباسىنىڭ قۋانىشىنا ورتاق ەكەنىن جەتكىزدى.
«قۇرمەتتى ماراتبەك سامەنبەك ۇلى, وسى قالاشىقتىڭ تۇرعىنى رەتىندە بالالارىمىزدىڭ قىزىقتى بالالىق شاعى ءۇشىن ەڭبەك ەتىپ, تەر توگىپ جاتقانىڭىز ءۇشىن سىزگە ۇلكەن العىسىمدى بىلدىرەمىن. الداعى ۋاقىتتا دا بىرلەسكەن جۇمىسىمىز نىعايا تۇسەدى دەپ سەنەمىن. ويتكەنى, بالالار – ءبىزدىڭ بولاشاعىمىز», دەدى ول.
ءوز سوزىندە اۋدان اكىمى العاشقى كۇندەردەن باستاپ جوبانىڭ جۇزەگە اسۋىنا بەلسەندى اتسالىسقان بارلىق كاسىپكەرلەرگە ءوز اتىنان العىس ايتتى.
«وسىناۋ بالالار مەن سپورت الاڭشاسىندا وسكەن بۇلدىرشىندەرىمىز ەرتەڭگى كۇنى شىنىعىپ, بولاشاقتا مىقتى سپورتشى مەن ەلجاندى پاتريوتتار بولىپ وسەتىنىنە سەنىمدىمىن. قولعا العان باستامامىز تۇرعىنداردىڭ كوڭىلىنەن شىقتى دەگەن ويدامىز. ەندى ولار بوس ۋاقىتتارىن پايدالى ءارى ءتيىمدى ماقساتقا جۇمسايتىن بولادى» دەدى ول.
ايتا كەتۋ كەرەك ويىن الاڭشاسى بىرنەشە ايماقتان تۇرادى: ءبىر بولىگىندە كىشكەنتاي بالالارعا ارنالعان قاۋىپسىز ويىن الاڭى ورنالاسسا, ەكىنشى جاعىندا ەرەسەك بالالارعا ارنالعان سپورتتىق جابدىقتار مەن جابىق ميني-فۋتبول الاڭى جايعاسقان. الاڭنىڭ اينالاسىندا دەمالۋعا ارنالعان ورىندىقتار مەن باستىرمالار قويىلعان. بۇل بالالارىن ەرتىپ كەلگەن اتا-انالارعا جايلى جاعداي تۋعىزۋ ءۇشىن ارنايى وسىلاي جاسالعان.
شىمكەنت
