فوتو: egemen.kz/ ەرلان ومار
ءمينيستردىڭ ايتۋىنشا, مەملەكەتتىك بيۋدجەتتىڭ كىرىسى شامامەن 11 ترلن تەڭگە بولعان. ال رەسپۋبليكالىق بيۋدجەت 31 ملرد تەڭگەدەن اسا ارتىعىمەن ورىندالىپ, 100,5% اتقارىلعان. بۇل كورسەتكىش يمپورتقا سالىناتىن قوسىلعان قۇن سالىعى, شيكى مۇنايعا ەكسپورتتىق كەدەندىك باج جانە كورپوراتيۆتىك تابىس سالىعى تۇسىمدەرىنىڭ ەسەبىنەن تىركەلگەن.
جەرگىلىكتى بيۋدجەتتەر دە سەنىمدى ءوسىم كورسەتكەن كىرىستەر 117% نەمەسە 656,6 ملرد تەڭگەگە جەتكەن. ۇكىمەتتىڭ ءباسپاسوز قىزمەتىنىڭ حابارلاۋىنشا, جوسپاردىڭ ارتىعىمەن ورىندالۋى جەكە تابىس سالىعى, كورپوراتيۆتىك تابىس سالىعى جانە الەۋمەتتىك سالىق ەسەبىنەن قالىپتاسقان. وتكەن جىلدىڭ 6 ايىمەن سالىستىرعاندا كىرىستەردىڭ ءوسۋ قارقىنى مەملەكەتتىك بيۋدجەت بويىنشا - 118,8%, ونىڭ ىشىندە رەسپۋبليكالىق بيۋدجەت بويىنشا - 122% جانە جەرگىلىكتى بيۋدجەت بويىنشا - 114,3% قۇراعان.
سونىمەن قاتار, سالىقتىق, كەدەندىك اكىمشىلەندىرۋدىڭ ارقاسىندا 492 ملرد. تەڭگە قوسىمشا تۇسىمدەر تۇسكەن. جىل باسىنان بەرى قوسىلعان قۇن سالىعىن قايتارۋ كولەمى, وتكەن جىلدىڭ دەڭگەيىنەن 12% ارتىق ورىندالىپ, 768 ملرد تەڭگەنى قۇراعان.
«بۇل جاي عانا تسيفرلاردىڭ ءوسۋى ەمەس – بۇل ەكونوميكاعا وتىمدىلىكتىڭ ناقتى اعىنى, ەكسپورتتاۋشىلاردى, وندىرۋشىلەردى جانە اگراريلەردى قولداۋ بولىپ سانالادى. مۇنداي سەرپىنگە, قوسىمشا قۇن سالىعىن قايتارۋدىڭ جەڭىلدەتىلۋىمەن جانە ەكسپورتتاۋشىلاردىڭ وتىنىمدەرىن باسىمدىق بەرە وتىرىپ قاراۋمەن قول جەتكىزىلدى. 2025 جىلى وتەماقىلاردىڭ جالپى كولەمى شامامەن 2 ترلن تەڭگە دەڭگەيىندە بولادى بولجانىپ وتىر», دەدى ءمادي تاكيەۆ.
