ءسوز كەيىپكەرى زامانىندا جىلجىمايتىن م ۇلىك جيناپ, مىزعىمايتىن ماگناتقا اينالعان نيۋ-يوركتىك فرەد ترامپتىڭ ءتورتىنشى پەرزەنتى. ارعى تەگى پايدالى قازبالاردى وندىرۋگە كەلگەن نەمىس يمميگرانتتارىنان. الايدا وتباسىنىڭ اۋقاتتى بولعانىنا قاراماستان, دونالد اكەسىنىڭ كومپانياسىندا ەڭ تومەنگى لاۋازىمدا قىزمەت ەتىپ شيراعان كورىنەدى.
الايدا شيراقتىق پەن وقۋعا دەگەن قۇشتارلىق ەكى ءتۇرلى دۇنيە ەكەنىن 13 جاستاعى دونالد مەكتەپتەن شىعارىلعاندا ءبىر-اق بىلەدى. ءسويتىپ اكەسى ونى اسكەري اكادەمياعا جىبەرەدى. الايدا تالاعىنىڭ ءبيتى بار تالاپتى ۇل كەيىن پەنسيلۆانيا شتاتىنداعى ۋورتون بيزنەس مەكتەبىن ءتامامداپ, اكەسىنىڭ بيزنەس-يمپەرياسىنا مۇراگەر بولۋعا باستى ۇمىتكەر اتانادى.
ترامپتىڭ ۇلكەن اعاسى فرەددي بيزنەسكە ەمەس, ۇشقىش بولۋا ۇمتىلعان. الايدا ول 1981 جىلى ىشكىلىككە سالىنىپ, مەزگىلسىز قايتىس بولادى. ءسويتىپ دونالد ترامپ اراق اتاۋلىدان سابىندى ەزىپ ىشكەندەي بەتى قايتىپ قالادى. اۋزىما تاتىپ المايمىن دەپ ۋادە بەرەدى.
كاسىپكەرلىك جولىن دونالد ترامپ اكەسىنەن شاعىن نەسيە الىپ باستايدى. «شاعىن» دەگەندى تىرناقشامەن شارباقتاپ قويعانىمىز دۇرىس. ويتكەنى ماگناتتان العان شاعىن قاراجاتتىڭ ءوزى 1 ملن دوللاردى قۇراعان ەكەن. بۇل قارجىعا ول ءوز الدىنا جىلجىمايتىن م ۇلىك جوبالارىن قولعا الادى. ءبىراز ۋاقىت جەكە جۇمىس ىستەپ, تاجىريبە جيناعان سوڭ, اكەسى باسقاراتىن كومپانياعا جوعارى لاۋازىممەن قايتا ورالادى.
العاشىندا ترامپ نيۋ-يوركتىڭ شەتكەرى اۋداندارىندا قۇرىلىس جوبالارىن جۇزەگە اسىرۋعا اتسالىسىپ جۇرەدى. 1971 جىلى ول وتباسى كومپانياسىنىڭ تىزگىنىن ءوز قولىنا الىپ, باس ديرەكتور اتانادى.
ماڭعاز ماگنات
دونالد ترامپتىڭ تۇسىندا وتباسىلىق بيزنەس جاڭا بەلەسكە كوتەرىلدى. ول برۋكلين مەن كۋينستەگى تۇرعىن ءۇي قۇرىلىسىنان مانحەتتەندەگى ءىرى جوبالارعا كوشىپ, ەسكى Commodore قوناقۇيىن Grand Hyatt سەكىلدى تابىستى مەكەمەگە اينالدىردى.
سول تۇستا ترامپ ءوزىنىڭ ەڭ ايگىلى عيماراتى – 68 قاباتتى Trump Tower-ءدى سالدى. كەيىن بۇل قاتارعا Trump World Tower, Trump International Hotel جانە باسقا دا عيماراتتار قوسىلدى.
ارتىنشا قوناقۇي جانە كازينو جەلىسىن دە جەتكىزەم دەپ جەلپىندى. دەگەنمەن بۇل سالاداعى ءىسى ءتورت مارتە بانكروتقا ۇشىرادى. ارام اقشا قاشان بەرەكەلى اكەلىپ ەدى؟
سول كەزدە ترامپ شوۋ-بيزنەسكە دە ارالاستى. 1996–2015 جىلدار ارالىعىندا ول «اقش ارۋى» جانە «عالام ارۋى» سۇلۋلىق بايقاۋلارىنىڭ يەسى بولدى. 2003 جىلى NBC تەلەارناسىندا ءوزى پروديۋسەرلىك ەتىپ, جۇرگىزۋشىسى بولعان «كانديدات» رەاليتي-شوۋىن باستادى. كينوعا دا كوپتەپ ءتۇستى. ايگىلى «ۇيدە جالعىز قالعاندا» فيلمىندەگى كەۆينگە جول كورسەتىپ جىبەرەتىن ەپيزودتىق ءرولدى دونالد ترامپ ويناپ شىققان.
بۇل باعدارلامادا قاتىسۋشىلار ترامپتىڭ بيزنەس-يمپەرياسىندا مەنەدجەر بولۋ ءۇشىن باق سىنايتىن. «قاي جەڭگەنىڭ مەنىكى» دەيتىن وسى شىعار بالكىم. 14 ماۋسىم ىشىندە ميللياردەر NBC ارناسىنان 213 ملن دوللار تابىس تاپتى.
ول بىرنەشە كىتاپ جازىپ, مويىنداعى گالستۋكتەن باستاپ بوتەلكەدەگى سۋعا دەيىن ءتۇرلى تاۋارلار ساتاتىن ساۋدا جەلىسىنە يەلىك ەتتى. Forbes جۋرنالى ترامپتىڭ بايلىعىن 3,7 ميلليارد دوللار دەپ باعالاسا, ءوزى بۇل ساندى «10 ملرد» دەيدى.
جۇبايلار «جىرى»
ترامپ ومىرىندە ءۇش رەت ۇيلەنىپتى. ايگىلى جۇبايلارىنىڭ ىشىندەگى ەڭ تانىمالى – چەحيالىق سپورتشى ءارى مودەل يۆانا زەلنيچكوۆا. ولاردىڭ ءۇش بالاسى بولادى: كىشى دونالد, يۆانكا جانە ەريك. الايدا 1990 جىلى ەرلى-زايىپتىلار ءدام-تۇزى جاراسپاي اجىراسىپ تىنادى.
كەيىن 1993 جىلى ترامپ اكتريسا مارلا مەيپلزبەن شاڭىراق كوتەرىپ, ولاردان تيففاني ەسىمدى قىزى دۇنيەگە كەلدى. ون التى جىلدان كەيىن ولار دا اجىراسامىز دەپ شەشەدى.
قازىرگى جارى – سلوۆاكيالىق مودەل مەلانيا كناۋسس. ەكەۋى 2005 جىلدان بەرى بىرگە. بۇل جۇپتىڭ ۇلى – بەررون ۋيليام ترامپ.
ترامپتىڭ ءبىرىنشى نەكەدەن تارىداي شاشىراعان بالالارى بۇگىندە Trump Organization دەپ اتالاتىن وتباسىلىق بيزنەستى باسقارۋعا كومەكتەسىپ ءجۇر. بىراق كومپانيانىڭ رەسمي جەتەكشىسى ءالى دە دونالد ترامپتىڭ ءوزى.
ساياساتتاعى العاشقى ساياحات نەمەسە «وباماعا وبال بولدى»
دونالد ترامپ پرەزيدەنت بولامىن دەگەن پەيىلىن العاش رەت 1987 جىلى بىلدىرگەن. ءتىپتى 2000 جىلى رەفورما پارتياسىنىڭ اتىنان پرايمەريزگە قاتىسىپ كورىپ, كەيىن ءوز كانديداتۋراسىن قايتارىپ الدى.
2008 جىلعى سايلاۋدان كەيىن, ياعني باراك وباما جەڭىسكە جەتكەن سوڭ, ترامپ ونىڭ اقش-تا دۇنيەگە كەلمەگەنىن ايتىپ, كونستيتۋتسياعا ساي پرەزيدەنت بولا المايتىنىن العا تارتتى.
الايدا كەيىن بۇل تەوريا رەسمي تۇردە تەرىسكە شىعارىلدى: وبامانىڭ گاۆاي ارالدارىندا تۋعانى دالەلدەندى. سايلاۋالدى ناۋقان كەزىندە ترامپ بۇعان قاتىستى قاتەلەسكەنىن مويىنداعانىمەن, وبامادان وبال بولدى دەپ كەشىرىم سۇراعان جوق.
2015 جىلدىڭ ماۋسىمىندا ترامپ پرەزيدەنت بولۋعا رەسمي تۇردە بەلىن بەكەم بايلادى. «بىزگە بۇل ەلدى قايتادان ۇلى ەتەتىن ادام كەرەك. بۇل قولىمىزدان كەلەدى», دەپ جار سالدى جاھانعا ول سول جولى.
ول سايلاۋ ناۋقانىن وزگەلەردەن ايىرماشىلىعى – ەشكىمنىڭ قارجىلاي قولداۋىنا مۇقتاج ەمەستىگىن ايتىپ باستادى. «ياعني مەن ەشكىمنىڭ مۇددەسىن كوزدەپ وتىرعان جوقپىن», دەدى ول.
ونىڭ كوپتەگەن مالىمدەمەلەرى مەن ۇسىنىستارى قوعامدا قارسىلىق تۋعىزسا دا, ترامپ پرايمەريزدە قارسىلاستارىنا ەش مۇمكىندىك بەرمەي, سايلاۋعا رەسپۋبليكالىق پارتيا اتىنان ۇمىتكەر رەتىندە شىقتى.
ءسويتىپ 2017 جىلى اق ءۇيدىڭ تابالدىرىعىن پرەزيدەنت بولىپ اتتادى. اراعا ءتورت جىل سالىپ تىزگىن 79 جاستاعى دجو بايدەنگە ءوتتى. الايدا بىرەۋ اتتان ءتۇسىپ بەرسە دە, اتاعىنان ءتۇسىپ بەرە مە؟ ول ارالىقتا دا ترامپ بەلسەندىلىگىن وشىرمەي, ساياسي ناۋقانىن جۇرگىزە بەردى. ناتيجەسىندە 2025 جىلى پرەزيدەنت ورنىنا قايتادان قونجيدى.
