وسى جىلدىڭ باسىنان بەرى ءتورت بىردەي زاماناۋي وتكىزۋ بەكەتى پايدالانۋعا بەرىلدى. اتاپ ايتقاندا, قىتايمەن شەكارادا – «قالجات» پەن «الاكول», ال وزبەكستانمەن شەكارادا – «كاپلانبەك» پەن «اتامەكەن» وتكىزۋ پۋنكتتەرى جاڭارتىلعان. جىل سوڭىنا دەيىن تاعى بەس بەكەتتى – «قازىعۇرت», «تاجەن», «تەمىر بابا», «مايقاپشاعاي» جانە «باقتى» وتكىزۋ بەكەتتەرىن جاڭعىرتۋ اياقتالادى دەپ جوسپارلانىپ وتىر.
بەكەتتەر حالىقارالىق تالاپتارعا ساي جاڭا تەحنولوگيالارمەن جابدىقتالعان. كولىكتەردى سكانەرلەۋ, اۆتوماتتى تەكسەرۋ جانە ولشەۋ قۇرىلعىلارى تولىق ورناتىلعان. سونىمەن قاتار, جاڭا ۇلگىدەگى باقىلاۋ جۇيەلەرى جۇرگىزۋشىلەردىڭ كولىكتەن تۇسپەي-اق باقىلاۋدان وتۋىنە مۇمكىندىك بەرەدى. بۇل ءوز كەزەگىندە شەكارادان ءوتۋ ۋاقىتىن 30 مينۋتقا دەيىن قىسقارتۋعا جول اشىپ وتىر.
وتكىزۋ بەكەتتەرىنىڭ جاڭا ۇلگىسىندە ء«بىر تەرەزە» قاعيداسىنا نەگىزدەلگەن ءبىرىزدى تەحنولوگيالىق ءدالىز ىسكە قوسىلعان. بۇل جۇيە بارلىق باقىلاۋ تۇرلەرىن قوسىمشا توقتاۋسىز ءبىر جەردەن وتكىزۋگە مۇمكىندىك بەرەدى.
قارجى مينيسترلىگى بەكەتتەردى جاڭعىرتۋمەن قاتار, كەدەن راسىمدەرىن اۆتوماتتاندىرۋ مەن تسيفرلاندىرۋ باعىتىندا دا بىرقاتار جۇمىستار جۇرگىزىپ جاتىر. 2023 جىلدان باستاپ ەۋرازيالىق ەكونوميكالىق وداقتىڭ سىرتقى شەكارالارىنداعى بارلىق اۆتوكولىك وتكىزۋ بەكەتتەرىندە «CarGoRuqsat» ەلەكتروندى كەزەك جۇيەسى ەنگىزىلدى. بۇل كولىك كەپتەلىسىن ازايتىپ, جۇك تاسىمالداۋ ۇدەرىسىنىڭ اشىقتىعى مەن تيىمدىلىگىن ارتتىردى.
بۇگىندە 76 بيزنەس-پروتسەسس وڭتايلاندىرىلىپ, كولىك قۇرالدارىنىڭ وتكىزۋ ۋاقىتىن ءۇش ەسەگە قىسقارتۋعا مۇمكىندىك بەردى. ءۇش اۆتوحاب پەن ءبىر كولىك-لوگيستيكالىق ورتالىق ىسكە قوسىلدى. «نۇر جولى» وتكىزۋ پۋنكتى تاۋلىك بويى جۇمىس رەجيمىنە اۋىستىرىلىپ, «الاكول» مەن «مايقاپشاعاي» بەكەتتەرىنىڭ جۇمىس ۋاقىتى ۇلعايتىلدى.
2024 جىلدان باستاپ «كەدەن» اتتى بىرىڭعاي تسيفرلىق پلاتفورما كەزەڭ-كەزەڭىمەن ەنگىزىلۋدە. ونىڭ 20 ءمودۋلىنىڭ 13-ءى قازىردىڭ وزىندە جۇمىس ىستەپ تۇر. ەلەكتروندى دەكلاراتسيالاۋ, فورماتتى-لوگيكالىق باقىلاۋ جۇيەسى ەنگىزىلىپ, «قورعاس» حالىقارالىق ورتالىعىندا تاۋارلاردى ەسەپكە الۋ تولىعىمەن تسيفرلاندىرىلدى. قىزمەتتەردىڭ بىرىكتىرىلگەن باقىلاۋى اۆتوماتتاندىرىلىپ, ترانزيت راسىمدەرى جەدەلدەتىلدى, كەدەندىك قىزمەتتەرمەن ءوزارا ارەكەتتەسۋ ونلاين-فورماتقا كوشىرىلدى.
ناتيجەسىندە 2022 جىلى 640 مىڭ كولىك قۇرالى وتكىزىلسە, 2024 جىلى بۇل كورسەتكىش 1,4 ميلليونعا جەتتى. جاڭعىرتۋ جۇمىستارى ەلىمىزدىڭ شەكاراداعى ەكونوميكالىق بەلسەندىلىگىن ارتتىرىپ, تاۋار اينالىمىنىڭ اشىقتىعى مەن جىلدامدىعىن قامتاماسىز ەتۋگە باعىتتالىپ وتىر.
