قازاقستاندىق رەجيسسەر اسحات كۋچينچەرەكوۆتىڭ «باۋىرىنا سالۋ» كوركەم ءفيلمى يتاليانىڭ يسكيا ارالىندا وتكەن 23-ءشى Ischia Film Festival حالىقارالىق كينوفەستيۆالىندە «ۇزدىك تولىقمەتراجدى فيلم» نوميناتسياسى بويىنشا باس جۇلدەگە يە بولدى.
«باۋىرىنا سالۋ» بۇعان دەيىن دە بىرقاتار بەدەلدى فەستيۆالدەردە توپ جارعان:
- Asia Pacific Screen Awards بايقاۋىندا – «ەڭ ۇزدىك جاستار ءفيلمى» اتاندى,
- Baku International Film Festival (ازەربايجان) – باس جۇلدە,
- Cinema Heritage Festival (فرانتسيا) – ارنايى ماراپات,
- وپەراتور جاناربەك ەلەۋبەك – Asia World Film Festival اياسىندا «ۇزدىك وپەراتور» نوميناتسياسىن جەڭىپ الدى.
سونىمەن قاتار تۋىندى «وسكار-2025» سىيلىعىنا «شەت تىلىندەگى ۇزدىك فيلم» نوميناتسياسى بويىنشا قازاقستان اتىنان رەسمي ۇسىنىلدى.
كارتينانىڭ سيۋجەتى – ەجەلگى قازاق ءداستۇرى بويىنشا اجەسىنىڭ تاربيەسىندە بولعان بالانىڭ تاعدىرىنا نەگىزدەلگەن. اجەسى قايتىس بولعان سوڭ, بالا اتا-اناسىنا ورالىپ, جاڭا ورتاعا بەيىمدەلۋدە قيىندىقتارعا تاپ بولادى.
Ischia Film Festival – 2003 جىلدان بەرى وتكىزىلىپ كەلە جاتقان, ەۋروپاداعى ەڭ كوركەم جانە ەرەكشە كينوفەستيۆالدەردىڭ ءبىرى. ورتاعاسىرلىق اراگون سارايىنىڭ اۋماعىندا وتەتىن بۇل شارا ءتۇسىرىلىم ورىندارىنىڭ كوركەمدىك جانە مادەني ماڭىزىن باعالاۋعا ەرەكشە ءمان بەرەدى.
