الدىمەن دەپۋتاتتار مۋزەي اۋماعىندا سالىنىپ جاتقان ۆيزيت-ورتالىقتىڭ قۇرىلىسىمەن تانىسىپ, نىساننىڭ قازىرگى جاي-كۇيىن كوزبەن كوردى. مەكەمە ديرەكتورى گۇلميرا مۇحتاروۆانىڭ ايتۋىنشا, تۋريستەرگە ارنالعان بۇل نىساننىڭ قۇرىلىسى 2023 جىلى باستالعان. قازىرگى تاڭدا تەك نەگىزگى جۇمىستىڭ 75 پايىزى ورىندالعانىمەن, تولىق اياقتاۋعا قاجەتتى قاراجات بولىنبەگەن. باستاپقى جوبالىق-سمەتالىق قۇجاتتاما بويىنشا 292,3 ملن تەڭگە قاراستىرىلسا, ازىرگە 87,7 ملن تەڭگە عانا يگەرىلگەن. قۇرىلىس ماتەريالدارى مەن جۇمىس كۇشىنىڭ قىمباتتاۋىنا بايلانىستى جوبانىڭ جالپى قۇنى 446,1 ملن تەڭگەگە دەيىن ۇلعايعان.
«قۇرىلىستىڭ ۇشتەن ءبىرى توقتاپ تۇر. بۇل ورتالىق وڭىرگە كەلگەن تۋريستەر ءۇشىن نەگىزگى ۆيزيت-نۇكتە بولۋى ءتيىس ەدى. قارجى تولىق بولىنبەگەندىكتەن تەك عيمارات ەمەس, سۋ جۇيەسىنە قوسۋ, كوگالداندىرۋ سياقتى ينفراقۇرىلىمدىق جۇمىستار دا توقتاپ قالدى. سونداي-اق مۋزەي قورىنداعى التىن ادامنىڭ سۇيەگىن عىلىمي نەگىزدە ەكسپوزيتسياعا شىعارۋ جۇمىستارى جىلدار بويى ىسكە اسپاي كەلەدى. مۋزەي مەن جەرگىلىكتى مەكتەپ اراسىنداعى بوس اۋماقتا ەتنواۋىل قۇرۋ جوباسى دا قولداۋ تاپپاي وتىر», – دەدى مۋزەي ديرەكتورى.
ءماجىلىس دەپۋتاتى ايدوس سارىم ەسىك مۋزەيىنىڭ تاريحي جانە مادەني ماڭىزىن اتاپ ءوتىپ, التىن ادام تابىلعان بۇل مەكەننىڭ رەسپۋبليكالىق قانا ەمەس, حالىقارالىق تۋريستىك مارشرۋتتىڭ ماڭىزدى بولىگىنە اينالۋى ءتيىس ەكەنىن ايتتى. ونىڭ سوزىنشە, بۇل نىسان تەك ارحەولوگيانىڭ ەمەس, تۇتاس ۇلتتىق بولمىستىڭ سيمۆولىنا اينالۋى كەرەك. دەپۋتاتتار اتالعان پروبلەمالاردى ۇكىمەت پەن ءتيىستى مينيسترلىكتەر دەڭگەيىندە كوتەرۋگە ۋادە بەردى.
ساپار اياسىندا حالىق قالاۋلىلارى تالعار اۋدانىنداعى Oi-Qaragai تاۋ-كۋرورتىنداعى ينفراقۇرىلىم جايىنا دا نازار اۋداردى. كۋرورت باسشىلىعىنىڭ ايتۋىنشا, جىل سايىن ءجۇز مىڭداعان تۋريست قابىلدايتىن دەمالىس ايماعى بولاشاقتا وڭىرلىك ءتۋريزمنىڭ نەگىزگى ورتالىعىنا اينالۋى مۇمكىن. دەگەنمەن, جاڭا نىساندار سالۋعا قاجەتتى جەر تەلىمدەرى ماسەلەسى ۇزاق جىلدار بويى شەشىمىن تاپپاعان.
ءماجىلىس دەپۋتاتى باقىتجان بازاربەكتىڭ ايتۋىنشا, Oi-Qaragai ماڭىنداعى بىرقاتار جەر ۋچاسكەلەرى كەزىندە ءتۇرلى لاۋازىمدى تۇلعالاردىڭ اتىنا راسىمدەلىپ, بۇگىندە يگەرۋسىز بوس تۇر.
«Oi-Qaragai اۋماعىن كەڭەيتۋگە ينۆەستورلار دايىن. بىراق تاۋدىڭ بوكتەرىندەگى بىرقاتار جەر تەلىمدەرى كەزىندە ءتۇرلى لاۋازىمدى تۇلعالارعا بەرىلگەنىمەن, يگەرىلمەي بوس تۇر. كۋرورت اكىمشىلىگى بۇل ماسەلەنى بىرنەشە رەت كوتەردى. جەر كودەكسىنىڭ 92-بابىنا سايكەس, مۇنداي تەلىمدەردى مەملەكەتكە قايتارۋ پروتسەسىن وسى جوبا اياسىندا قولعا الامىز. بۇل باعىتتا ءتيىستى جۇمىستاردى باستايمىز», – دەدى باقىتجان بازاربەك.
ايتا كەتۋ كەرەك, وڭىردە «AMANAT» پارتياسى تاۋ ءتۋريزمىن دامىتۋعا باعىتتالعان «الاتاۋ اماناتى» جوباسىن ىسكە قوستى. جوبا اياسىندا الماتى وبلىسىنداعى بىرەگەي تابيعي جانە تاريحي نىسانداردى بىرىكتىرەتىن, ۇزىندىعى 1200 شاقىرىمنان اساتىن ۇلتتىق تۋريستىك سوقپاق سالۋ جوسپارلانعان.
الماتى وبلىسى.
