كوميتەتتىڭ پىكىرىنشە, قاتاڭ اقشا-كرەديت ساياساتىن ساقتاۋ – ينفلياتسيانى تۇراقتاندىرۋ مەن حالىقتىڭ سەنىمىن ارتتىرۋدىڭ باستى قۇرالى.
«ينفلياتسيانىڭ باياۋلاعانىنا قاراماستان, ول ءالى دە ەكى تاڭبالى دەڭگەيدە قالىپ وتىر. تاريفتەردىڭ ءوسۋى, تۇتىنۋشىلىق سۇرانىستىڭ جوعارى بولۋى جانە جەكەلەگەن نارىقتىق قىزمەتتەردىڭ قىمباتتاۋى جالپى باعاعا قىسىم تۇسىرۋدە. وسىعان بايلانىستى ءبىز بازالىق مولشەرلەمەنى قازىرگى دەڭگەيدە ساقتاۋ تۋرالى شەشىم قابىلدادىق», دەپ ءتۇسىندىردى ۇلتتىق بانك.
2025 جىلعى ماۋسىمدا جىلدىق ينفلياتسيا 11,8% بولدى. قىزمەت كورسەتۋ باعاسى 16,1%, ال ازىق-ت ۇلىك باعاسى 10,6% وسكەن. بۇل ءوسىم, ءبىرىنشى كەزەكتە, يمپورتتىق تاۋارلاردىڭ قىمباتتاۋى, اۋىل شارۋاشىلىعى ونىمدەرىنىڭ باعاسى, جانە رەتتەلەتىن قىزمەتتەردىڭ تاريفتەرىمەن بايلانىستى.
ينفلياتسيانىڭ ايلىق كورسەتكىشى مامىرمەن سالىستىرعاندا ءسال تومەندەپ, 0,8% بولدى. الايدا بازالىق ينفلياتسيا – 0,9%, ال ماۋسىمدىق فاكتورلاردى ەسەپكە الماعاندا – 1,0%.
ء«بىزدىڭ باعالاۋىمىزشا, حالىق تاراپىنان تۇتىنۋشىلىق سۇرانىس ءالى دە جوعارى. بۇل – جالاقى وسىمىمەن, بولشەك نەسيەلەۋدىڭ قارقىندى دامۋىمەن جانە ينفلياتسيالىق كۇتۋلەردىڭ ءالى دە جوعارى بولۋىمەن بايلانىستى», دەدى ۇلتتىق بانك وكىلدەرى.
ۇلتتىق بانك دەرەكتەرىنە سۇيەنسەك, الداعى 12 ايعا ارنالعان ينفلياتسيالىق كۇتۋلەر تومەندەگەن. الايدا ساراپشىلار بۇل كورسەتكىشتەردىڭ قۇبىلمالى ءارى تۇراقسىز ەكەنىن ايتادى.
«ينفلياتسيالىق كۇتۋلەردىڭ تومەندەۋى – وڭ بەلگى. الايدا ساۋالناما ناتيجەلەرىنەن حالىقتىڭ باعا وسىمىنە دەگەن الاڭداۋشىلىعى ساقتالعانىن كورىپ وتىرمىز. بۇل فاكتورلار اقشا-كرەديت ساياساتىنا قىسىم تۋدىرۋى مۇمكىن», دەدى كوميتەت مۇشەلەرى.
نارىقتاعى كاسىبي قاتىسۋشىلار ينفلياتسيا 2025 جىلى 10,7–11% اراسىندا بولادى دەپ بولجايدى.
سىرتقى ينفلياتسيالىق قىسىم ءسال السىرەگەنىمەن, الەمدىك نارىقتارداعى قۇبىلمالىلىق ساقتالىپ وتىر. جەتەكشى ەلدەردەگى ينفلياتسيا باسەڭدەگەنىمەن, ورتالىق بانكتەر ساق ءارى بايىپتى ساياسات جۇرگىزۋگە ءماجبۇر.
«قارجى نارىقتارىنداعى قۇبىلمالىلىق, گەوساياسي شيەلەنىستەر مەن ساۋدا قاتىناستارىنداعى بەلگىسىزدىك سىرتقى قىسىمنىڭ تولىق جويىلماعانىن كورسەتىپ وتىر. وسى رەتتە مۇناي باعاسى ءبىزدىڭ وپتيميستىك ستسەناريگە جاقىن دەڭگەيدە ساقتالىپ كەلەدى», دەلىنگەن رەسمي حابارلامادا.
قاڭتار-مامىر ايلارىندا قازاقستان ەكونوميكاسى 6% ءوسىم كورسەتتى. بۇل ءوسىم نەگىزىنەن كولىك سالاسى (23,1%), قۇرىلىس (15,4%), ساۋدا (7,8%) جانە ونەركاسىپ سەكتورىنداعى بەلسەندىلىكپەن بايلانىستى.
تۇتىنۋشىلىق كرەديتتەۋ 32,4% جىلدىق وسىممەن العا جىلجىپ وتىر. حالىق اراسىنداعى بولشەك نەسيەگە سۇرانىستىڭ ارتۋى, ماركەتينگتىك ناۋقاندار مەن ءبولىپ تولەۋ تەتىگىنىڭ كەڭىنەن قولدانىلۋى ىشكى سۇرانىستى ارتتىرىپ كەلەدى.
«قازىرگى سۇرانىس دەڭگەيى وتە جوعارى. بۇل – ەكونوميكانىڭ جاندانعانىن كورسەتكەنىمەن, ينفلياتسيالىق قىسىمدى دا كۇشەيتەتىن فاكتور», دەيدى ۇلتتىق بانك.
الدا نە كۇتەمىز؟ ۇلتتىق بانك الداعى ۋاقىتتا بازالىق مولشەرلەمەنى وزگەرىسسىز ساقتاۋ نەمەسە قاجەت بولعان جاعدايدا ارتتىرۋ نۇسقالارىن قاراستىرادى. بۇل شەشىمدەر ماكروەكونوميكالىق بولجامنىڭ جاڭا راۋندىنا بايلانىستى قابىلدانادى.
كەلەسى جوسپارلى شەشىم 2025 جىلعى 29 تامىزدا جاريالانادى.
