فوتو: ۇلتتىق ۇلاننىڭ ءباسپاسوز قىزمەتى
ۇلتتىق ۇلان ساربازدارىنىڭ كومەگىمەن 73 ءىز-ءتۇسسىز جوعالعان بالا تابىلىپ, وتباسىلارىنا تابىستالعان جانە 24 ءورتتى ءسوندىرۋ جانە ادامداردى قۇتقارۋ وقيعاسى تىركەلدى. اسكەري قىزمەتشىلەر ءتۇرلى جاعدايدا بولعان 32 ادامعا دەر كەزىندە العاشقى مەديتسينالىق جاردەم كورسەتكەن جانە 54 جوعالعان زات پەن 113 ۇيالى تەلەفوندى يەلەرىنە قايتارىپ بەرگەن.
ۇلاندىقتار 343 مادەني-بۇقارالىق جانە سپورتتىق ءىس-شارالاردا قوعامدىق قاۋىپسىزدىك پەن ءتارتىپتى قامتاماسىز ەتكەن, سول ورايدا باتىلدىق پەن جانقيارلىق تانىتقان 190 اسكەري قىزمەتشى ءتۇرلى ماراپاتتارعا يە بولعان. سونىمەن قاتار, ۇلان ساربازدارى ودان بولەك 35 ىزدەستىرۋ جۇمىسىنا قاتىسقان.
ۇلتتىق ۇلاننىڭ مالىمەتىنشە جىل باسىنان بەرى تىيىم سالىنعان زاتتاردى قىلمىستىق-اتقارۋ جۇيەسى مەكەمەلەرىنىڭ اۋماعىنا وتكىزۋگە قاتىستى 77 ارەكەتتىڭ جولى كەسىلىپ, وسىعان بايلانىستى 55 ادام ۇستالعان. سونىمەن قاتار قوعامدىق ءتارتىپتى بۇزعان 9 919 ازامات (ونىڭ ىشىندە 379 ادام – قىلمىس جاسادى دەگەن كۇدىكپەن) ىشكى ىستەر ورگاندارىنا جەتكىزىلگەن.
قۇقىقتىق ءتارتىپ اسكەرىنىڭ جەكە قۇرامى پوليتسيامەن بىرلەسىپ ەلىمىزدىڭ 21 قالاسىندا قوعامدىق ءتارتىپتى قاداعالايدى. بۇل مىندەتتى ورىنداۋعا كۇن سايىن 8 مىڭنان استام ۇلاندىق اتسالىسادى.
