فوتو: قازاقپارات
تالقىعا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, قارجى ءمينيسترى ءمادي تاكيەۆ جانە بەينە كونفەرەنتسيا بايلانىسى ارقىلى ىشكى ىستەر ءمينيسترى ەرجان سادەنوۆ, مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي قاتىستى.
بۇگىنگى تاڭدا ەلىمىزدە اينالىمعا 257,5 ملرد تسيفرلىق تەڭگە شىعارىلعان. ۇلتتىق بانك توراعاسى تيمۋر سۇلەيمەنوۆ پلاتفورما قازىر تاجىريبەلىك-ونەركاسىپتىك پايدالانۋ كەزەڭىندە, الداعى جەلتوقسان ايىندا ونى تولىققاندى ىسكە قوسىلاتىنىن ايتتى.
ۇلتتىق بانكتىڭ تسيفرلىق ترانسفورماتسيالاۋ جەتەكشىسى بينۇر جالەنوۆ تسيفرلىق تەڭگە بۇگىندە وننان استام باعىت بويىنشا سىنالعانىن باياندادى. اتاپ ايتقاندا, تسيفرلىق ققس سالىقتى قايتارۋ مەرزىمىن 75-تەن 5 جۇمىس كۇنىنە دەيىن قىسقارتۋعا مۇمكىندىك تۋعان. جولداردى جوندەۋگە ارنالعان قاراجاتتى تاڭبالاۋ «پاۆلودار – اتىراۋ» جانە «مۇقىر – قۇلسارى» جوبالارىندا سىنالعان. سونداي-اق «دوستىق – مويىنتى» تەمىر جولىنىڭ جانە «تالدىقورعان – ءۇشارال» گاز قۇبىرى ۋچاسكەسىنىڭ قۇرىلىسىن قوسا العاندا, ۇلتتىق قوردان قارجىلاندىرىلاتىن جوبالارعا بولىنگەن قارجىنىڭ ماقساتتى جۇمسالۋىن باقىلاۋ ءۇشىن دە پايدالانىلىپ جاتىر. الداعى ۋاقىتتا «بەينەۋ – بوزوي – شىمكەنت» گاز قۇبىرىن, گاز ءبولۋ كەشەنى جانە «باقتى – اياگوز» تەمىرجول ۋچاسكەسى سياقتى جوبالاردى جۇزەگە اسىرۋ جوسپارلانعان. بۇدان باسقا, «اۋىل اماناتى» شاعىن نەسيەلەۋ باعدارلاماسى اياسىندا قاراجاتتى ۋاقىتشا بۇعاتتاۋ تەتىگى سىناقتان ءساتتى وتكەن.
تسيفرلىق تەڭگەنى ەنگىزۋ جىلجىمايتىن م ۇلىك جانە اۆتوكولىك سالاسىندا مامىلەلەر جاساۋ, مەكتەپتەگى تاماقتانۋ, قىمبات تاۋارلاردى ساتىپ الۋ, اگروونەركاسىپتىك كەشەندەگى مەملەكەتتىك نەسيەلەۋ قۇرالدارى سياقتى باسقا دا باعىتتاردا پىسىقتالىپ جاتىر.
جيىندا سونداي-اق نورماتيۆتىك-قۇقىقتىق بازانى جەتىلدىرۋگە دە نازار اۋدارىلدى. بۇگىنگى تاڭدا «تولەمدەر جانە تولەم جۇيەلەرى تۋرالى» زاڭعا, تسيفرلىق شوت ۇعىمىن جانە باسقا دا ىلەسپە نورمالاردى ەنگىزۋدى قوسا العاندا, بىرقاتار تۇزەتۋلەر دايىندالعان.
پرەمەر-مينيستر تسيفرلىق تەڭگەنىڭ نەگىزگى ارتىقشىلىقتارىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس, تسيفرلىق تەڭگەنىڭ كومەگىمەن اقشانى تاڭبالاۋ جانە قاداعالاۋ بويىنشا پيلوتتىق جوبالار كەزەڭ-كەزەڭىمەن جۇزەگە اسىرىلۋدا. تسيفرلىق تەڭگە بيۋدجەت قاراجاتىن ماقساتتى پايدالانۋدا تولىق اشىقتىقتى جانە جۇيەلى باقىلاۋدى قامتاماسىز ەتەدى. اقشانى تاڭبالاۋدى كەڭەيتۋدى ءتيىمدى جۇزەگە اسىرۋ ءۇشىن اقپاراتتىق جۇيەلەردىڭ «تسيفرلىق تەڭگە» پلاتفورماسىمەن ۋاقتىلى ينتەگراتسيالانۋىن قامتاماسىز ەتۋ قاجەت. سونداي-اق ءتيىستى نورماتيۆتىك قۇقىقتىق بازانى پىسىقتاۋ تالاپ ەتىلەدى. «بويالعان اقشا» تەتىگىن ەنگىزۋ ساپالى جانە تولىق كولەمدە جۇزەگە اسىرىلۋى ءتيىس. جاقىن ارادا ۇلتتىق قور مەن بيۋدجەت ەسەبىنەن قارجىلاندىرىلاتىن كەمىندە ءجۇز ءىرى جوبانى «تسيفرلىق تەڭگە» فورماتىنا اۋىستىرۋدى تاپسىرامىن», دەدى ولجاس بەكتەنوۆ.
جيىن قورىتىندىسى بويىنشا پرەمەر-مينيستر مەملەكەتتىك ورگاندارعا ۇلتتىق بانكپەن جانە مۇددەلى ۇيىمدارمەن بىرلەسىپ, ەكونوميكانىڭ جەكەلەگەن سەكتورلارىنا تسيفرلىق تەڭگەنى كەڭ كولەمدە جەدەل ينتەگراتسيالاۋ جونىندەگى جول كارتاسىن ازىرلەۋدى تاپسىردى.
