ەكسپرەسسيونيست-كومپوزيتور, حح عاسىردىڭ كورنەكتى نەمىس كومپوزيتورلارىنىڭ ءبىرى كارل ورف جازعان ميستيكالىق, باۋراپ الار «Carmina Burana» كانتاتاسى فيلوسوفيالىق ءارى ەموتسيونالدى بالەتتىڭ نەگىزىنە اينالدى. بۇل – حح عاسىردىڭ ەڭ جۇمباق ءارى تاڭعالدىرارلىق قۋاتى بار تۋىندىلاردىڭ ءبىرى. زاماناۋي مادەنيەتتە ول كلاسسيكا مەن تانىمال مۋزىكا اراسىندا ەرەكشە ورىن الادى.
كومپوزيتور كانتاتانىڭ ماعىناسىن ادام رۋحىنىڭ جەڭىسى رەتىندە سيپاتتاپ, ءوز شىعارماسىن وپتيميستىك ءارى قۋانىشقا تولى دەپ سانادى. بۇل شىعارمادا فورتۋنا قۇدايىنىڭ تاقىرىبى استارلاپ جەتكىزىلەدى. ول تاعدىر دوڭگەلەگىن اينالدىرىپ, ادام بالاسىن بىردە تۇڭعيىققا قۇلاتىپ, بىردە باقىتقا كەنەلتەدى.
«Carmina Burana» بالەتى – ادام بالاسىنىڭ بولمىسى, جان ارپالىسى مەن ازابى, ادامنىڭ كۇدىرەت كۇشىمەن ۇزىلمەس بايلانىسى تۋرالى وي-تولعاۋ. بالەت ساحناسىندا ماتەريالدىق جانە رۋحاني, جاسامپاز جانە قيراتۋشى كۇش تەكەتىرەسى كورسەتىلەدى. مۇنىڭ ءبارى – فورتۋنا دوڭگەلەگىنىڭ ۇزدىكسىز قوزعالىسى, جالىنداعان ءومىر مەن جاننىڭ رەينكارناتسياسى تۋرالى باياندايدى.
بالەت وقيعاسى ەكى جاننىڭ (بوزبالا مەن بويجەتكەن) اينالاسىندا ءوربيدى. ولار بىرىنە-ءبىرى ىنتىق. ەكەۋارا پاك سەزىمدەرى ماحابباتقا ۇلاسادى. بىراق, بولمىسىڭدى ساقتاپ, ماحاببات سىرىن تانۋ ءۇشىن وزگەنىڭ الداپ-ارباۋىنان, ازعىرۋىنان بويىڭدى اۋلاق ۇستاساڭ عانا مۇمكىن ەكەن.
سپەكتاكل بەينەلەرى ورفتىڭ مۋزىكاسىنان عانا ەمەس, قايتا ورلەۋ ءداۋىرى سۋرەتشىلەرىنىڭ تۋىندىلارىنان دا شابىت العان. سپەكتاكلدە جاسامپاز جانە جويقىن كۇشتەر, شارتتى تۇردە جاراتۋشى جانە ازعىرۋشىمەن بايلانىستى رامىزدىك كەيىپكەرلەر رەتىندە كورىندى.
«Carmina Burana» بالەت-كانتاتاسىن, شارتتى تۇردە, ءبىر-بىرىنەن مۋزىكالىق جاعىنان ەرەكشەلەنەتىن ءتورت بولىمگە بولۋگە بولادى. قويىلىم توبى مۇنى پلاستيكالىق تۇردە جەتكىزۋدى ءجون كوردى. سپەكتاكلدە ارتىستەر كلاسسيكالىق حورەوگرافيادان ەركىن پلاستيكاسى جانە contemporary ەلەمەنتتەرى بار بيگە اۋىسىپ وتىردى.
«ارتىستەرگە وسىنداي ءارتۇرلى مۋزىكالىق ماتەريالمەن جانە ءتۇرلى پلاستيكالىق ماتەريالمەن جۇمىس ىستەگەن وتە ماڭىزدى», دەپ اتاپ ءوتتى قويۋشى-بالەتمەيستەر تيمۋر زاگيدۋللين.
جاڭا حورەوگرافيالىق تۋىندىنى جاساۋعا دارىندى ونەر قايراتكەرلەرى قاتىستى. كارل ورفتىڭ مۋزىكاسى قويىلىمنىڭ نەگىزىنە الىنىپ, ونىڭ اۋقىمى مەن ەموتسيونالدى تەرەڭدىگىن ارتتىرا ءتۇستى. قويۋشى-بالەتمەيستەرلەر مۋكارام ابۋباحريەۆا (اۆاحري) جانە تيمۋر زاگيدۋللين شىعارمانىڭ دراماتۋرگياسىن جەتكىزەتىن كوركەم حورەوگرافيا ءتىلىن قولداندى.
كوستيۋم سۋرەتشىسى ۆارۆارا پلەتنەۆا ستسەنوگرافيا مەن كوستيۋمدەردەگى سيمۆوليزم مەن زاماناۋي تانىمدى بىرىكتىرە وتىرىپ, قويىلىمنىڭ كورنەكى بەينەسىن جاسادى. جارىق سۋرەتشىسى دەنيس سولنتسەۆ ءدال جانە مانەرلى جارىق شەشىمدەرى ارقىلى ءىس-ارەكەتكە ەرەكشە اتموسفەرا دارىتتى. بەينەسۋرەتشى مارات ساعادينوۆ ساحنا كەڭىستىگىنە تابيعي تۇردە ورىلگەن ديناميكالىق پروەكتسيالار ارقىلى سپەكتاكلدىڭ كورنەكى اسەرىن كۇشەيتە ءتۇستى.
قويىلىمنىڭ مۋزىكالىق جەتەكشىسى ءارى ديريجەرى ارمان ورازعاليەۆ تەاتردىڭ سيمفونيالىق وركەسترىنىڭ كۇشىمەن قۋاتتى ءارى اسەرلى مۋزىكالىق سۇيەمەلدەۋدى قامتاماسىز ەتتى. ۆوكالدى ءبولىم گۇلميرا قۇتتىباداموۆانىڭ جەتەكشىلىگىندەگى حوردىڭ قاتىسۋىمەن جۇزەگە اسىرىلىپ, كورەرمەندى ءتانتى ەتكەن سپەكتاكلدىڭ اۋقىمى مەن دىبىستىق كەرنەۋىن ارتتىرۋعا مۇمكىندىك بەردى.
«Carmina Burana» بالەتىنىڭ پرەمەراسى تىڭ دۇنيە دەسە بولعانداي. العاش رەت حور, وركەستر جانە بالەت ءبىرتۇتاس ونەر كەڭىستىگىندە بىرىگىپ, اۋقىمدى ءارى جانىڭدى باۋراپ اكەتەر قويىلىم جاسادى. مۇندا مۋزىكالىق ەكپىننەن پلاستيكالىق قيمىلعا دەيىنگى ءاربىر ەلەمەنت – وسى ماڭگىلىك شىعارمانىڭ تەرەڭ ماعىناسىن اشا تۇسۋگە كۇش سالدى.
