فوتولار: ءماجىلىستىڭ ءباسپاسوز قىزمەتى
2023 جىلى 1 قاراشادا جۇمىسىن باستاعان اتالعان ورتالىق – زەينەتكەرلەرگە قىسقا مەرزىمدەگى دەمالۋ مەن ەم الۋ مۇمكىندىگىن ۇسىناتىن ارنايى مەكەمە. العاشىندا 70 ورىنعا ەسەپتەلگەنىمەن, بۇگىندە ءبىر مەزەتتە جولدامامەن كەلگەن 120 زەينەتكەردى قابىلداي الادى.
دەپۋتات دانابەك يسابەك مەكەمەنىڭ جۇمىسىمەن جان-جاقتى تانىسىپ, قاريالاردىڭ حال-جاعدايىن سۇرادى.
«مۇندا قاريالار ءۇشىن بارلىق جاعداي جاسالعان. مەديتسينالىق كومەك, مادەني-تانىمدىق ءىس-شارالار, كۇندەلىكتى تۇرمىسقا قاجەتتى قولداۋ ءبارى ويلاستىرىلعان. مۇنداي ورتالىقتار قارتتارىمىزدىڭ وزدەرىن قوعامنىڭ تولىققاندى مۇشەسى رەتىندە سەزىنۋىنە مۇمكىندىك بەرەدى. سوندىقتان مۇنداي تاجىريبەنى ەلىمىزدىڭ باسقا وڭىرلەرىنە دە كەڭىنەن تاراتۋ قاجەت. قارياعا قۇرمەت – ۇرپاققا ونەگە. بۇل باعىتتاعى جۇمىستار ءاردايىم مەملەكەت نازارىندا بولۋى ءتيىس», دەدى دەپۋتات د.يسابەك.
مەكەمە باسشىلىعىنىڭ ايتۋىنشا, دەمالۋشىلارعا كۇنىنە 4 مەزگىل ىستىق تاعام ۇسىنىلادى. مەكەمە عيماراتىنىڭ جالپى اۋماعى – 3 699,9 شارشى مەتر. تازا اۋادا سەرۋەندەۋگە ارنالعان اۋلا, كوگالداندىرىلعان الاڭدار, ورىندىقتار, سۋ بۇرقاق جانە شاعىن ساياباق قاراستىرىلعان. بۇل قاريالاردىڭ تىنىعۋى مەن پسيحولوگيالىق دەمالىسى ءۇشىن قولايلى جاعداي جاساۋعا باعىتتالعان.
مەكەمەدە دەمالۋشىلار مەديتسينالىق جانە الەۋمەتتىك قىزمەتپەن تولىق قامتىلعان. دارىگەر قابىلداۋىنان ءوتىپ, دەنساۋلىعىنا قاراي ارنايى ەمدىك شارالاردان وتكەن ءار زەينەتكەر ورتالىقتىڭ قىزمەتىنە ريزاشىلىقتارىن ءبىلدىرىپ, العىستارىن ايتىپ, باتالارىن بەرىپ ءجۇر.
ايتا كەتەلىك, «ىزەتتى زەينەتكەر» ورتالىعىنا جولداما الۋ پروتسەسى تولىق تسيفرلاندىرىلعان. زەينەتكەرلەر geo-shym.kz پورتالى ارقىلى ەلەكتروندى تسيفرلىق قولتاڭبامەن تىركەلىپ, ونلاين ءوتىنىم بەرە الادى. ءوتىنىش بەرگەننەن كەيىن كەزەك رەتىن دە ەلەكتروندى جۇيە ارقىلى باقىلاۋعا مۇمكىندىك بار.
