ءمامس پاكەتىنەن الىنعان قاراجاتقا ناقتى توقتالار بولساق, شىعىننىڭ باسىم بولىگى, ياعني 43,8 ملرد تەڭگەسى ستاتسيونارلىق كومەككە, شامامەن 2,8 ملرد تەڭگەسى كۇندىزگى ستاتسيونار قىزمەتىنە, 15,2 ملرد تەڭگە كونسۋلتاتيۆتىك-دياگنوستيكالىق قىزمەتتەرگە, جوعارى تەحنولوگيالاردىڭ كومەگىمەن جاسالاتىن وپەراتسيالارعا 10,3 ملرد تەڭگە, مەديتسينالىق رەابيليتاتسياعا 3,7 ملرد تەڭگە جۇمسالعان.
«مىندەتتى الەۋمەتتىك مەديتسينالىق ساقتاندىرۋدىڭ ارقاسىندا ازاماتتار جىل سايىن ءتۇرلى حيرۋرگيالىق وتالاردى جاساتۋعا مۇمكىندىك الىپ وتىر. ولاردىڭ اراسىندا باعاسىن كوپشىلىكتىڭ قالتاسى كوتەرە بەرمەيتىن قىمبات وپەراتسيالار دا بار. قۇنى بىرنەشە ميلليون تۇراتىن قىمبات وتالاردى ساقتاندىرىلعان ازاماتتار تولەگەن جارناسىنىڭ مولشەرىنە قاراماي جاساتا بەرەدى. ءمامس جۇيەسىندەگى ورتاق جاۋاپكەرشىلىكتىڭ ءمانى وسىندا», دەدى الەۋمەتتىك مەديتسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ءىلياس مۇحامەدجان.
مىسالى, وسى جىلى الماتى قالاسىندا جالپى العاندا 8,8 ملرد تەڭگەگە 2995 وپەراتسيا جاسالعان. ءبىر وتانىڭ قۇنى ورتا ەسەپپەن 3 ملن تەڭگەگە شىعادى. سونىمەن قاتار, 1871 نەيروحيرۋرگيالىق وپەراتسيا جاسالعان. وعان قور 3,2 ملرد تەڭگە تولەدى. تىزە مەن جامباس بۋىندارىن الماستىرۋ وپەراتسيالارىنا دەگەن سۇرانىس تا وتە جوعارى. الماتىدا 2009 بۋىن الماستىرۋ وتاسى جاسالىپتى. وپەراتسيالاردىڭ جالپى قۇنى 3,2 ملرد تەڭگەگە جەتىپ جىعىلادىتاعى دا نەيرو-قان تامىر جانە قان-تامىر جۇيەسىنە جاساعان 2083 وتاعا قور 2,9 ملرد. تەڭگە تولەدى. سونىمەن قاتار, وڭتۇستىك استانامىزدا جالپى قۇنى 244,7 ملن تەڭگەلىك 38 باۋىر, بۇيرەك جانە جۇرەك الماستىرىلدى. مۇنداي ءبىر وتانىڭ قۇنى 10 ملن تەڭگەگە دەيىن جەتىپ جىعىلادى جانە بۇگىندە بۇل شىعىندار ءمامس قاراجاتى ەسەبىنەن وتەلىپ جاتىر.
ەڭ قىمبات وتالار ۇشتىگىنە يمپلانتتالاتىن قوسالقى جۇرەك جۇيەسى (LVAD) كىردى, بۇل - جۇرەككە قاندى ايداۋعا كومەكتەسەتىن مەحانيكالىق قوندىرعى. ول ترانسلانتاتسيانى كۇتىپ جۇرگەن نەمەسە جۇرەگىن الماستىرۋعا بولمايتىن ناۋقاستارعا قولدانىلادى. بىرەۋىنىڭ قۇنى – 77,5 ملن تەڭگە. 2025 جىلى وسىنداي 1 وتا جاسالدى;
ەكىنشى ورىندا جۇرەكتىڭ ميترالدى قاقپاقشاسىن الماستىرۋ تۇر, ونىڭ قۇنى – 17 ملن تەڭگە. 2025 جىلى وسىنداي 2 وتا جاسالدى
بۇل ۇشتىكتىڭ ىشىندە اللوگەندى گەموپوەتيكالىق ءدىڭ جاسۋشالارىن الماستىرۋ دا بار, قۇنى – 17 ملن تەڭگە.
