فوتو: bbc.com
جاتتىعۋدىڭ نەگىزگى ماقساتى – تۇرعىندار مەن ارميانى قىتاي تاراپىنان ءتونۋى مۇمكىن شابۋىلعا دايىن بولۋعا باۋلۋ. سونىمەن قاتار بۇل شارا تايۆاننىڭ قورعانىس قابىلەتىن پاش ەتىپ, بەيجىڭگە ناقتى ەسكەرتۋ سيگنالىن بەرۋگە باعىتتالعان.
تايبەي ۇكىمەتىنە قاراستى ۇلتتىق قورعانىس جانە قاۋىپسىزدىك ينستيتۋتىنىڭ ساراپشىسى چە چۋن: «بيىلعى جاتتىعۋ جوسپارى قىتاي شابۋىلى جاعدايىندا ورىن الۋى ىقتيمال شىنايى ستسەناريلەردى كوبىرەك قامتيدى. بۇل – ۇزاقمەرزىمدى قارسى تۇرۋ مەن ازاماتتىق تۇراقتىلىقتى كۇشەيتۋگە باعىتتالعان شارا», دەپ مالىمدەدى.
تايۆاننىڭ قازىرگى پرەزيدەنتى لاي چين-تە قىتاي تاراپىنان بولۋى مۇمكىن اسكەري قاۋىپكە قارسى دايىندىقتى باستى باسىمدىق رەتىندە بەلگىلەگەن. ول سوڭعى اپتادا بىرنەشە ۇندەۋ جاساپ, جۇرتتى ۇلتتىق بىرلىككە شاقىردى. بۇعان بەيجىڭ نارازىلىق ءبىلدىردى. ال وتكەن جىلدىڭ قىركۇيەگىندە لاي چين-تە ازاماتتىق قورعانىس كوميتەتىنىڭ العاشقى وتىرىسىن وتكىزىپ, كەز كەلگەن توتەنشە جاعداي كەزىندە ارالدىڭ تۇراقتى جۇمىس ىستەۋىن قامتاماسىز ەتۋ قاجەتتىگىن العا تارتقان بولاتىن.
قىتاي تايۆاندى ءوزىنىڭ بولىنگەن اۋماعى ساناپ, ونى كۇشتەپ بولسا دا «قايتا بىرىكتىرەمىز» دەپ مالىمدەپ كەلەدى. بۇل ايتىلعان سوزدەر تايۆانعا قاتىستى جاعدايدى قيىنداتىپ جاتىر. سول سەبەپتى اقش قاتىسۋى مۇمكىن ۇلكەن سوعىس باستالىپ كەتە مە دەگەن قاۋىپ بار.
