مينيسترلىك سۋدى ۇنەمدەۋدىڭ ءتيىمدى تاسىلدەرىن ۇسىندى

جالپى كوپشىلىككە باعىتتالعان ۇسىنىستاردى تۇرمىستا ۇستانۋ - سۋ تاپشىلىعىنىڭ الدىن الۋعا ايتارلىقتاي كومەك. 

ۆەدومستۆو ۇسىنىسىندا مىناداي ادىستەر بار: 

كىر جۋعىش جانە ىدىس جۋعىش ماشينالاردى تەك تولىق جۇكتەمەمەن پايدالانۋ, ءتىستى جۋعاندا كراندى جاۋىپ, سۋدى ارنايى ىدىسقا قۇيىپ پايدالانۋ, ۆاننا قابىلداۋدىڭ ورنىنا قىسقا دۋش قابىلداۋ, كوكونىس پەن جەمىستەردى ىدىستاعى سۋمەن جۋ, اۆتوماتتى سەنسورلى كرانداردى قولدانۋ, ۋنيتازدارعا ەكى دەڭگەيلى سۋ جىبەرۋ جۇيەسىن ورناتۋ; سۋ اعىنىن رەتتەيتىن ارنايى ساپتامالار (اەراتورلار) پايدالانۋ; سونداي-اق كراندارداعى اقاۋلاردى ۇنەمى باقىلاپ, سۋدىڭ اعۋىن دەر كەزىندە جويۋ.

ەندى وسى كەڭەستەر ەل اۋماعىندا ارنايى باننەرلەرگە جازىلىپ, ناسيحاتتالماق. مينيسترلىك  باننەرلەردى جەرگىلىكتى اتقارۋشى ورگانداردىڭ قولداۋىمەن قازاقستاننىڭ بارلىق وڭىرىندەگى كوشەلەردە, ءبىلىم بەرۋ مەكەمەلەرىندە, تەمىرجول ۆوكزالدارىندا, اۋەجايلاردا جانە باسقا دا قوعامدىق ورىنداردا ورنالاستىرۋدى كوزدەپ وتىر. 

ء«بىز تۇرمىستا سۋدى ۇنەمدەۋدىڭ ماڭىزىن مۇمكىندىگىنشە كوپ ادامعا جەتكىزگىمىز كەلەدى. ءاربىر ازامات ەلدىڭ سۋ رەسۋرستارىن ساقتاۋعا ۇلەس قوسا الادى. مينيسترلىك ازىرلەگەن ۇسىنىستار سۋدى ۇنەمدەۋ – وڭاي ءارى ءتيىمدى ەكەنىن كورسەتىپ وتىر. ەندى ءبىز اقپاراتتىق-ءتۇسىندىرۋ جۇمىستارىن كۇشەيتىپ, بۇل قاراپايىم تاسىلدەر تۋرالى قازاقستاننىڭ بارلىق وڭىرىنە جەتكىزگىمىز كەلەدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.