فوتو: ءماجىلىستىڭ ءباسپاسوز قىزمەتى
حالىق قالاۋلىلارى الدىمەن «ۇلتتىق يندۋستريالىق مۇناي-حيميا تەحنوپاركى» ارنايى ەكونوميكالىق ايماعىنا بارىپ, ايماقتاعى ءىرى نىسانداردىڭ ءبىرى «Karabatan Utility Solutions» جشس-گە قاراستى ەلەكتر ستانتسياسىنىڭ جۇمىسىن كوردى. قازىرگى تاڭدا قۋاتتىلىعى 310 مۆت بولاتىن بۇل نىسان KPI زاۋىتىن ۇزدىكسىز ەنەرگيامەن قامتاماسىز ەتىپ وتىر. الداعى ۋاقىتتا ستانتسياعا تاعى ەكى ءىرى زاۋىتتىڭ قوسىلۋى جوسپارلانعان.
«بۇگىن ىسكە قوسىلعانىنا بەس جىل بولعان, ارنايى ەكونوميكالىق ايماقتى ەنەرگيامەن قامتيتىن قۋاتتى ەلەكتر ستانتسياسىنىڭ جۇمىسىمەن تانىستىق. سوڭعى ۋاقىتتا شاعىن جانە ورتا كاسىپ يەلەرى دە وسى ستانتسيادان قۋات الۋعا ءوتىنىش بىلدىرە باستادى. وسىعان بايلانىستى قوسالقى ستانتسيا قۇرىلىسىن قارجىلاندىرۋ قاجەتتىلىگى تۋىنداپ وتىر. قىركۇيەكتە پارلامەنت سەسسياسى باستالعان سوڭ بۇل ماسەلەلەردى زاڭنامالىق دەڭگەيدە كوتەرىپ, شەشۋ جولدارىن قاراستىرامىز», دەدى د.تۇرعانوۆ.
الايدا, باسقارما توراعاسىنىڭ ورىنباسارى رۋسلان قاليەۆ حابارلاعانداي, باستاپقى جوبا شاعىن جانە ورتا كاسىپكەرلىك نىساندارىن ەلەكتر قۋاتىمەن قامتۋدى قامتىماعان. قازىرگى سۇرانىستى قامتاماسىز ەتۋ ءۇشىن قۋاتتىلىعى 165 مۆت بولاتىن جاڭا قوسالقى ستانتسيانىڭ تەحنيكالىق-ەكونوميكالىق نەگىزدەمەسى ازىرلەنىپ, ساراپتامادان وتكىزىلگەن. جوباعا قارجى بولىنسە, نىسان 2028–2029 جىلدارى ىسكە قوسىلادى دەپ جوسپارلانىپ وتىر.
ساپار بارىسىندا دەپۋتاتتار ەلەكتر قۋاتىنىڭ جەتىسپەۋشىلىگى وڭىرلىك كاسىپكەرلىك باستامالاردىڭ جۇزەگە اسۋىنا كەدەرگى كەلتىرىپ وتىرعانىن ەرەكشە اتاپ ءوتتى.
ءماجىلىس دەپۋتاتى ءادىل جۇبانوۆ تا بۇل باعىتتاعى ماسەلەلەرگە نازار اۋداردى. ونىڭ ايتۋىنشا, ارنايى ەكونوميكالىق ايماقتا گاز-حيميا سالاسىنا قاتىستى جوبالاردى جۇزەگە اسىرۋعا دايىن كاسىپكەرلەر بار. الايدا ولاردى توقتاتىپ تۇرعان باستى فاكتور – ينفراقۇرىلىمنىڭ, سونىڭ ىشىندە ەلەكتر قۋاتىنىڭ جەتكىلىكسىزدىگى.
«بۇل – ءبىز ءۇشىن ۇلكەن سىن. ەنەرگەتيكا مينيسترلىگىنىڭ سالعىرتتىعى سالدارىنان وسىنداي جاعداي قالىپتاسىپ وتىر دەپ ەسەپتەيمىن. سەبەبى كۇردەلى ماسەلەنى شەشۋ ءۇشىن اسا كوپ قارجى قاجەت ەمەس. ماسەلەن, قازىرگى كەزدە مۇندا 20 مۆت قۋاتقا سۇرانىس بار. بۇل شامامەن 12 جوباعا قاتىستى, ال ونى ىسكە اسىرۋ ءۇشىن نەبارى 1,1 ميلليارد تەڭگە قاجەت. ايماقتا بوس جەر جەتكىلىكتى. الايدا قاجەتتى ينفراقۇرىلىم بولماعاندىقتان, وزگە كاسىپورىندار كەلۋگە ق ۇلىقسىز», دەدى ءا.جۇبانوۆ.
دەپۋتاتتار بۇل ماسەلەنى پارلامەنتتىڭ كۇن تارتىبىنە شىعارىپ, سالالىق مينيسترلىكپەن بىرلەسىپ شەشىم قابىلداۋعا كۇش سالاتىندارىن جەتكىزدى.
