باستاپقىدا Grok-تىڭ كەيبىر جاۋاپتارى جەلى قولدانۋشىلارى تاراپىنان سىنعا ۇشىراپ, جۇرتشىلىق نارازىلىعىن تۋدىرعان بولاتىن. اتاپ ايتقاندا, بريتاندىق The Guardian باسىلىمى چات-بوتتىڭ ادولف گيتلەردى اشىق ماداقتاپ, ءوزىن «MechaHitler», ياعني «مەحانيكالىق گيتلەر» دەپ اتاعانى تۋرالى جازدى. سونداي-اق چات-بوت كەيبىر جاۋاپتارىندا ەۆرەي ۇلتىنا قاتىستى وشپەندىلىك سيپاتىنداعى پىكىرلەر ايتقان.
بۇل وقيعادان كەيىن چات-بوتتىڭ بۇدان وزگە دە بىرنەشە رەت گيتلەردى وڭ باعالاپ, اشىق تۇردە انتيسەميتتىك سوزدەر ايتقانى انىقتالدى. وسىعان بايلانىستى xAI كومپانياسى جۇيەنىڭ مازمۇن سۇزگىسىن قايتا قاراپ, وشپەندىلىككە قۇرىلعان كونتەنتتى اۆتوماتتى تۇردە بۇعاتتاۋ شارالارىن جەدەل قولعا العانىن حابارلادى.
اتالعان جاعداي جاساندى ينتەللەكت جۇيەلەرىنىڭ ەتيكا مەن جاۋاپكەرشىلىك ماسەلەسىندە ءالى دە تالاي سىننان ءوتۋى ءتيىس ەكەنىن كورسەتىپ وتىر. تسيفرلىق داۋىردە تەحنولوگيانىڭ شەگى عانا ەمەس, شەكاراسى دا ادامگەرشىلىك ولشەمىمەن ايقىندالۋى قاجەت.
ايتا كەتەيىك, يلون ماسك مۇنداي داۋعا ءبىرىنشى رەت قالىپ وتىرعان جوق. اقش پرەزيدەنتى دونالد ترامپتى ۇلىقتاۋ راسىمىندە كاسىپكەر فاشيستىك گەرمانيانىڭ يشاراسىن قايتالاپ كوزگە تۇسكەن ەدى.
