ءبىرىنشى توپتاعى مۇگەدەك, 34 جاستاعى توبىلدىق اندرەي لوبا وسى باسپانانى الۋ ءۇشىن 14 جىل كۇتكەن. بىراق پاتەردىڭ ساپاسى كوڭىل كونشىتپەيدى دەيدى. جوندەۋ جۇرگىزىلمەگەن جانە مۇگەدەكتىگى بارلارعا يكەمدەلمەگەن.
لوبا وتباسىنا 19 ناۋرىزدا ءبىرىنشى قاباتىنان ءبىر بولمەلى پاتەر بەرىلدى. ول اناسىمەن بىرگە تۇرادى, ونىڭ ايتۋىنشا, پاتەردە باستاپقىدا ەشقانداي پروبلەما بايقالماعان.
الايدا اقاۋلار كەيىنىرەك پايدا بولا باستادى. قابىرعالارداعى سىزاتتار, لينولەۋمداعى تەسىكتەر, قيسىق توسەلگەن ەدەن, تۇراقسىز تاقتايشالاردى بايقادى. راكوۆينانىڭ استىنان جاعىمسىز ءيىس شىعىپ, سۋ اعىپ كەتەدى. پاتەردە گاز ءالى قوسىلماعان, تۇرعىندار ەلەكتر پليتاسىن پايدالانادى.
سونىمەن قاتار مۇگەدەكتەر ارباسىمەن ءجۇرۋ ىڭعايسىز دەيدى. سەبەبى بيىك تابالدىرىقتىڭ كەسىرىنەن بالكونعا مۇمكىن ەمەس. الدىڭعى ەسىك ەلەكتر پانەلىنە سوعىلادى, ال جۋىناتىن بولمە تۇتقالارمەن جابدىقتالماعان. ۆاننا دىرىلدەپ تۇر, دارەتحانا بەكىتىلمەگەن, ەسەپتەگىشتەر قيىن جەردە ورنالاسقان.
- ماعان جەردە ۇيىقتاۋعا بولمايدى, ەندى ۇرلەمەلى ماتراسقا جاتۋعا ءماجبۇرمىن. بىزگە كەرەۋەت كەرەك, جىلى ەدەن كەرەك. جوندەۋ جۇمىستارىن جۇرگىزە المايمىز, – دەدى اندرەي.
ەر ادامنىڭ جاردەماقىسى 102 مىڭ تەڭگە, اناسى زەينەتكەر, اراسىندا تازالىقشى بولىپ جۇمىس ىستەيدى. ولاردىڭ ۇيگە جوندەۋ جۇرگىزۋگە اقشالارى جوق. اندرەي اكىمدىك پەن تكش بولىمىنە حابارلاسىپ, نە جوندەۋگە 20 ميلليون تەڭگە ءبولۋدى, نە بولماسا ماتەريال ساتىپ الۋدى ۇسىندى. ءار تيىننىڭ ەسەبىن بەرۋگە دە دايىن بولدى. الايدا ونىڭ ايتۋىنشا, جەرگىلىكتى بيلىك تاراپىنان ەشقانداي جاۋاپ جوق.
اندرەي تۇرعىن ءۇي كەزەگىنە سوناۋ 2011 جىلى قوسىلعانىن, ناقتى ىلگەرىلەۋ تەك پرەزيدەنتكە حات جازعاننان كەيىن بولعانىن ايتادى. ۇندەۋىنەن كەيىن التى اي وتكەندە وعان اكىمدىكتەن تەلەفون سوعىپ, پاتەر ۇسىنىلدى.
- مەن زاڭ بۇزعان جوقپىن. مەن تەك ءوز قۇقىعىمدى الۋعا تىرىستىم. مەن دە باسقالار سياقتى اداممىن. مەن ءومىر سۇرگىم كەلەدى, وتباسىن قۇرعىم كەلەدى, – دەيدى ول.
