يگى باستاما قاراعاندى وبلىسى قازاقستان حالقى اسسامبلەياسى مەن انالار كەڭەسىنىڭ ۇيىمداستىرۋىمەن جۇزەگە اسىرىلدى. سالتاناتتى ءىس-شاراعا قاتىسقان انالار كەڭەسىنىڭ مۇشەلەرى مەن اسسامبلەيا وكىلدەرى پەرزەنتحانالاردا بولىپ, سابيلەر مەن انالاردى مەرەكەمەن قۇتتىقتاپ, العاشقى بولىپ دۇنيەگە كەلگەن نارەستەلەرگە دومبىرا تابىستادى.
– دومبىرا – ۇلتتىق بولمىسىمىزدىڭ, مادەنيەتىمىزدىڭ سيمۆولى. سابيگە دومبىرا سىيلاۋ – ۇرپاعىمىزعا ءداستۇر مەن رۋحاني قۇندىلىقتاردى امانات ەتۋ دەگەن ءسوز, – دەدى قاراعاندى وبلىستىق انالار كەڭەسىنىڭ ءتورايىمى ايجان قياسوۆا.
ۇيىمداستىرۋشىلاردىڭ ايتۋىنشا, شارانىڭ ماقساتى – جاس وتباسىلاردى ۇلتتىق مۇراعا جاقىنداتۋ, كوپۇلتتى قوعامدا ءوزارا سىيلاستىقتى ارتتىرۋ جانە قازاقستاندىق بىرلىكتى نىعايتۋ.
ايتا كەتەيىك, ۇلتتىق دومبىرا كۇنى 2018 جىلدان بەرى شىلدەنىڭ العاشقى جەكسەنبىسىندە تويلانىپ كەلەدى. بيىل مەرەكە استانا كۇنىمەن قاتار كەلىپ, ەلىمىزدىڭ ءتۇرلى وڭىرىندە كورمەلەر, كونتسەرتتەر, شەبەرلىك ساباقتارى جانە مەرەكەلىك اكتسيالار وتكىزىلۋدە.
