جارىستىڭ سالتاناتتى اشىلۋىندا قۇرمەتتى قوناقتار قاتارىندا الماتى وبلىسىنىڭ اكىمى مارات سۇلتانعازيەۆ, «Oceanman» فرانشيزاسىنىڭ يەسى فەرمين ەگيدو, سونداي-اق باس ۇيىمداستىرۋشى, «Oceanman Kazakhstan» فرانشيزاسىنىڭ يەسى ەرالى ورالوۆ بولدى.
«قۇرمەتتى سپورتسۇيەر قاۋىم! قۇرمەتتى قاتىسۋشىلار! بۇل تانىمال حالىقارالىق بايقاۋ وبلىسىمىزدا وسىمەن ءتورتىنشى رەت وتۋدە. «Oceanman Kazakhstan» جارىسى العاش رەت 2022 جىلى باستالدى. اتالعان دودا بارلىق جاس ساناتىنداعى حالىق اراسىندا بۇقارالىق سپورتتى ناسيحاتتاۋ مەن دامىتۋدا ماڭىزدى ءرول اتقاراتىنىن انىق كورسەتتى. بۇل ءبىز ءۇشىن ۇلكەن سپورتتىق جانە مادەني وقيعا. «Oceanman» بايقاۋى جىل سايىن الەمنىڭ ەڭ ادەمى تابيعي ورىندارىندا وتەدى. ولاردىڭ قاتارىنا قاپشاعاي سۋ قويماسى دا كىرەدى. ءدال وسىنداي اۋقىمدى شارالار بولاشاقتا جوعارى ساناتتى سپورتشىلاردى دايىنداپ, تاربيەلەۋگە سەپتىگىن تيگىزەدى, سونىمەن قاتار وڭىرىمىزدە دە, قازاقستاندا دا تۋريزم مەن سپورتتى دامىتۋعا قوسىمشا سەرپىن بەرەدى دەپ ويلايمىن. الەمنىڭ تۇكپىر-تۇكپىرىنەن كەلگەن قاتىسۋشىلار «Oceanman قازاقستان» جارىسىنان ەرەكشە اسەر الىپ قايتاتىنىنا سەنىمدىمىن. بارلىق قاتىسۋشىلارعا ساتتىلىك پەن جەڭىس تىلەيمىن!», - دەدى وبلىس اكىمى مارات سۇلتانعازيەۆ.
ءجۇزۋ جارىسى بەس قاشىقتىقتا وتەدى. اتاپ ايتساق, OCEANMAN 10 كم – 300 قاتىسۋشى, HALF OCEANMAN 5 كم – 400 قاتىسۋشى, SPRINT 2 كم – 800 قاتىسۋشى, OCEANKIDS 500 مەتر – 500 قاتىسۋشى جانە OCEANTEAM ەستافەتاسى 3ح500 مەترلىك جارىستا 90 قاتىسۋشى باق سىنايدى.
«جارىسقا كاسىپقويلار دا, اۋەسقويلار دا قاتىسادى. جاڭادان باستاۋشىلار ءۇشىن - قىسقا, ال تاجىريبەلى سپورتشىلار ءۇشىن ۇزاعىراق قاشىقتىق قاراستىرىلعان. دايىندىق جوعارى دەڭگەيدە ۇيىمداستىرىلعان. جالپى قازاقستاندىقتار - قوناقجاي حالىق. وسىنداي اۋقىمدى جارىستى وتكىزۋگە قولداۋ كورسەتكەنى ءۇشىن الماتى وبلىسى اكىمدىگىنە, باس دەمەۋشىلەرگە العىس ايتامىن. جەڭىمپازدار مەن جۇلدەگەرلەر بيىل جەلتوقسان ايىندا دۋبايدا وتەتىن الەم چەمپيوناتىنا قاتىسادى», - دەدى «Oceanmen» فرانشيزاسىنىڭ يەسى فەرمين ەگيدو.
قاپشاعاي سۋ قويماسىنداعى سۋدىڭ تەمپەراتۋراسى جۇزۋشىلەر ءۇشىن وتە قولايلى بولدى. قاتىسۋشىلاردى موتورلى قايىقتاردا, رەاكتيۆتى شاڭعىلاردا جانە بايداركالاردا ارنايى قۇتقارۋ قىزمەتتەرى قاداعالاپ ءجۇردى.
«بيىلعى جىلدىڭ ماڭىزدى ەرەكشەلىگى - جۇزۋدەن INSPIRATION ساناتىنداعى 15 بالانىڭ قاتىسۋى. بۇعان دەيىنگى جارىستا دا وسى ساناتتا جۇزۋشىلەر بولعان, بىراق بۇل جولى ەرەكشە قاجەتتىلىكتەرى بار بالالاردىڭ ارقايسىسىنىڭ قامقورشىسى بار. ايتا كەتۋ كەرەك, INSPIRATION ساناتىنداعى قاتىسۋشىلاردىڭ قاسىندا تاجىريبەلى سپورتشىلار بىرگە جۇرەدى. مۇنداعى قاۋىپسىزدىكتى كاسىبي قۇتقارۋشىلار قاداعالايدى. بىزدە توتەنشە جاعدايلار مينيسترلىگىنىڭ 22 ءجۇزۋ كەمەسى مەن 4 ۇلكەن قايىعى بار. ۆولونتەرلار ءار بۇرىلىستا قاتىسۋشىلارعا سۋسىندار ۇسىنىپ, ولاردىڭ ءارى قاراي جۇزۋىنە جاعداي جاسايدى», - دەدى جارىستىڭ باس ۇيىمداستىرۋشىسى, «Oceanman Kazakhstan» فرانشيزاسىنىڭ يەسى ەرالى ورالوۆ.
10 شاقىرىمدىق جۇزۋدەن باق سىناۋعا كەلگەن گارۆارد ۋنيۆەرسيتەتىنىڭ وقىتۋشىسى, ۇندىستاندىق ايشا مانسۋحاني كۇش پەن رۋحتى سىناۋعا بىرەگەي مۇمكىندىك بەرگەنى ءۇشىن ۇيىمداستىرۋشىلارعا العىس ءبىلدىردى.
«مەن قازاقستانعا العاش رەت كەلىپ وتىرمىن. بۇل ەلدىڭ تابيعاتى مەن حالقىنىڭ قوناقجايلىلىعى ءتانتى ەتتى. وتكەن جىلى يتاليادا وتكەن ءجۇزۋ جارىسىنا قاتىستىم. بيىل مۇمكىندىگىنشە كوپ ەلدەرگە بارعىم كەلەدى. «Oceanman» جارىسى باسەكەگە تولى. سوندىقتان بۇل دودادا مىقتىلار عانا جەڭىسكە جەتەدى»,- دەدى ايشا مانسۋكحاني
جارىستىڭ ءبىرىنشى كۇنى قاتىسۋشىلار 10 جانە 5 شاقىرىمعا جۇزۋدەن جارىستى. ال ەكىنشى كۇنى SPRINT, OCEANKIDS جانە OCEANTEAM قاشىقتىقتارى بويىنشا باق سىنايتىن بولادى.
الماتى وبلىسى.
